ಡಾ. ರಾಜ್ಕುಮಾರ್ ಅವರ ಮೊಮ್ಮಗಳು ಮತ್ತು ನಟ ರಾಮ್ಕುಮಾರ್ ಅವರ ಮಗಳು ಧನ್ಯಾ ರಾಮ್ಕುಮಾರ್ 'ನಿನ್ನ ಸನಿಹಕೆ' ಎಂಬ ಚಿತ್ರದಲ್ಲಿ ನಟಿಸುತ್ತಿರುವ ವಿಷಯ ಗೊತ್ತೇ ಇದೆ. ಈ ಚಿತ್ರ ವರ ಮಹಾಲಕ್ಷ್ಮೀ ಹಬ್ಬದ ಪ್ರಯುಕ್ತ ಆಗಸ್ಟ್ 20ರಂದು ರಾಜ್ಯಾದ್ಯಂತ ಬಿಡುಗಡೆಯಾಗಲು ಸಜ್ಜಾಗಿದೆ. ಈ ಮಧ್ಯೆ, ಭಾನುವಾರ ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದೆ.
ರಘು ದೀಕ್ಷಿತ್ ಯೂಟ್ಯೂಬ್ ಮ್ಯೂಸಿಕ್ ಚಾನೆಲ್ನಲ್ಲಿ 'ನಿನ್ನ ಸನಿಹಕೆ' ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದ್ದು, ಇದುವರೆಗೆ ಎಂಟು ಲಕ್ಷಕ್ಕೂ ಹೆಚ್ಚು ವೀಕ್ಷಣೆಯನ್ನು ಪಡೆದಿದೆ. ನಾಯಕಿ ಅಮೃತಾ ಅಲಿಯಾಸ್ ಡಿಂಪಿಯ ಪರಿಚಯದಿಂದ ಶುರುವಾಗುವ ಈ ಟ್ರೈಲರ್ನಲ್ಲಿ, ಕ್ರಮೇಣ ನಾಯಕನ ಪರಿಚಯ, ಅವರಿಬ್ಬರ ಸ್ನೇಹ, ಪ್ರೀತಿ, ಕಿತ್ತಾಟ ಮುಂತಾದ ಹಲವು ದೃಶ್ಯಗಳಿವೆ. ಈ ಪ್ರೇಮಕಥೆ ಸುಖಾಂತ್ಯ ಕಾಣುತ್ತದಾ ಅಥವಾ ದುರಂತ ಅಂತ್ಯ ಕಾಣುತ್ತದಾ ಎಂಬುವುದನ್ನು ಆಗಸ್ಟ್ 20ರಂದು ತೆರೆಯ ಮೇಲೆ ನೋಡಬೇಕು.
ಇದನ್ನೂ ಓದಿ: ವಿಜಯಾನಂದ ಫಸ್ಟ್ಲುಕ್ ಬಿಡುಗಡೆ: ಬಯೋಪಿಕ್ ಆಗ್ತಿದೆ ಡಾ.ವಿಜಯ ಸಂಕೇಶ್ವರ ಜೀವನ
ವೈಟ್ ಆಂಡ್ ಗ್ರೇ ಫಿಲಂಸ್ ನಿರ್ಮಿಸಿರುವ ಈ ಚಿತ್ರವನ್ನು, ಸೂರಜ್ ಗೌಡ ನಿರ್ದೇಶನ ಮಾಡಿದ್ದಾರೆ. ಎರಡು ವರ್ಷಗಳ ಹಿಂದೆ ಚಿತ್ರ ಪ್ರಾರಂಭವಾದಾಗ, ನಿರ್ದೇಶಕರಾಗಿ ಸುಮನ್ ಜಾದೂಗರ್ ಇದ್ದರು. ಆದರೆ, ಅವರಿಗೆ ಅಪಘಾತವಾಗಿ ಚಿತ್ರೀಕರಣ ಮುಂದುವರೆಸುವುದಕ್ಕೆ ಕಷ್ಟವಾದ ಕಾರಣ, ನಿರ್ದೇಶನದ ಜವಾಬ್ದಾರಿಯನ್ನು ಸೂರಜ್ಗೆ ನೀಡಲಾಗಿದೆ.
ಚಿತ್ರಕ್ಕೆ ಸೂರಜ್ ಬರೀ ಹೀರೋ ಅಷ್ಟೇ ಅಲ್ಲ, ಕಥೆ ಸಹ ಅವರದ್ದೇ. ಹಾಗಾಗಿ, ಈ ಚಿತ್ರ ನಿರ್ದೇಶಿಸುವುದಕ್ಕೆ ಅವರೇ ಸರಿ ಎಂಬ ಕಾರಣಕ್ಕೆ ಅವರಿಗೆ ನಿರ್ದೇಶನದ ಜವಾಬ್ದಾರಿ ವಹಿಸಲಾಗಿದೆ. ಸೂರಜ್, ಈ ಚಿತ್ರದಲ್ಲಿ ಕಥೆ, ನಿರ್ದೇಶನ ಮತ್ತು ನಟನೆಯ ಮೂರು ಜವಾಬ್ದಾರಿಗಳನ್ನು ಹೊತ್ತಿದ್ದಾರೆ.
ಧನ್ಯಾ ರಾಮ್ಕುಮಾರ್ ಮತ್ತು ಸೂರಜ್ ಗೌಡ ಅಲ್ಲದೆ, ಅರುಣಾ ಬಾಲರಾಜ್, ಚಿತ್ಕಲಾ ಬಿರಾದರ್, ಮಂಜುನಾಥ ಹೆಗಡೆ ಸೇರಿದಂತೆ ಹಲವರು ನಟಿಸಿರುವ 'ನಿನ್ನ ಸನಿಹಕೆ' ಚಿತ್ರಕ್ಕೆ ರಘು ದೀಕ್ಷಿತ್ ಸಂಗೀತ ಸಂಯೋಜಿಸಿದ್ದಾರೆ. ಅಭಿಲಾಷ್ ಕಲತ್ತಿ ಛಾಯಾಗ್ರಹಣ ಮಾಡಿದ್ದಾರೆ.
