ಪಾರ್ವತಮ್ಮ ರಾಜ್​ಕುಮಾರ್ ಜನ್ಮದಿನದಂದು ಮ್ಯೂಸಿಯಂ ನಿರ್ಮಾಣಕ್ಕೆ ಚಾಲನೆ ದೊರೆಯುವ ಸಾಧ್ಯತೆ

ಸ್ಯಾಂಡಲ್​ವುಡ್​ ನಿರ್ಮಾಪಕಿ ಪಾರ್ವತಮ್ಮ ರಾಜ್​ಕುಮಾರ್ ಜನ್ಮದಿನದಂದು ಅವರ ಸಮಾಧಿ ಬಳಿ ಮ್ಯೂಸಿಯಂ ಸ್ಥಾಪನೆಗೆ ಚಾಲನೆ ದೊರೆಯುವ ಸಾಧ್ಯತೆ ಇದೆ. ಮ್ಯೂಸಿಯಂ ಸ್ಥಾಪನೆಗೆ ಅವಶ್ಯಕವಾದ ವಸ್ತುಗಳನ್ನು ಕೂಡಾ ಈಗಾಗಲೇ ಸಂಗ್ರಹಿಸಲಾಗಿದೆ ಎಂದು ಪುನೀತ್ ರಾಜ್​​ಕುಮಾರ್ ಹೇಳಿದ್ದಾರೆ.

ಡಿಸೆಂಬರ್​​ 6, ಕನ್ನಡ ಚಿತ್ರರಂಗದ ಅಮ್ಮ ಎಂದೇ ಕರೆಯಲಾಗುತ್ತಿದ್ದ ಪಾರ್ವತಮ್ಮ ರಾಜ್​ಕುಮಾರ್ ಅವರ ಜನ್ಮದಿನ. ಡಾ. ರಾಜ್​​​ಕುಮಾರ್ ಅವರ ಮಡದಿಯಾಗಿ, ಕನ್ನಡ ಚಿತ್ರರಂಗದ ನಿರ್ಮಾಪಕಿಯಾಗಿ ಅನೇಕ ಮಹತ್ತರ ಜವಾಬ್ದಾರಿಗಳನ್ನು ನಿರ್ವಹಿಸಿದ ಪಾರ್ವತಮ್ಮನವರು ತಮ್ಮ ಸಂಸ್ಥೆ ಮೂಲಕ ಅನೇಕ ನಾಯಕಿಯರನ್ನು ಚಿತ್ರರಂಗಕ್ಕೆ ಪರಿಚಯಿಸಿದವರು.

ಪುನೀತ್ ರಾಜ್​ಕುಮಾರ್

ಪಾರ್ವತಮ್ಮ ರಾಜ್​ಕುಮಾರ್ ನಿಧನರಾದ ನಂತರ ಕಂಠೀರವ ಸ್ಟುಡಿಯೋ ಬಳಿ ಡಾ. ರಾಜ್​ಕುಮಾರ್ ಸಮಾಧಿ ಬಳಿಯೇ ಅವರ ಸಮಾಧಿ ಕೂಡಾ ನಿರ್ಮಿಸಲಾಯ್ತು. '1978 ಆ್ಯಕ್ಟ್'​ ಸಿನಿಮಾ ಟೀಸರ್ ಬಿಡುಗಡೆ ಸಮಾರಂಭದಲ್ಲಿ ಪತ್ರಕರ್ತರೊಂದಿಗೆ ಮಾತನಾಡಿದ ಪುನೀತ್ ರಾಜ್​​ಕುಮಾರ್,​​ ''ಈ ಬಾರಿ ಅಮ್ಮನ ಹುಟ್ಟುಹಬ್ಬದಂದು ಮ್ಯೂಸಿಯಂ ನಿರ್ಮಾಣಕ್ಕೆ ಚಾಲನೆ ದೊರೆಯುವ ಸಾಧ್ಯತೆ ಇದೆ. ಇದಕ್ಕಾಗಿ ಈಗಾಗಲೇ ಅವಶ್ಯಕ ವಸ್ತುಗಳನ್ನು ಸಂಗ್ರಹಿಸಲಾಗಿದೆ. ಇದಕ್ಕೆ ಸರ್ಕಾರದ ಅನುಮತಿ ಬೇಕಿರುವುದರಿಂದ ಸ್ವಲ್ಪ ತಡವಾಗುತ್ತಿದೆ'' ಎಂದರು.

ಡಾ. ರಾಜ್​​​ಕುಮಾರ್, ಪಾರ್ವತಮ್ಮ ರಾಜ್​​ಕುಮಾರ್

''ಸಮಾಧಿ ಬಳಿ ಏನೇ ಕೆಲಸ ಆಗಬೇಕಿದ್ದರೂ ಅದು ಟ್ರಸ್ಟ್ ಮೂಲಕವೇ ಆಗಬೇಕಿದೆ. ಈ ಬಗ್ಗೆ ನಮಗೆ ಹಲವಾರು ಪ್ಲ್ಯಾನ್​​​ಗಳಿವೆ. ಎಲ್ಲವನ್ನೂ ಕಾರ್ಯರೂಪಕ್ಕೆ ತರಲು ಸಮಯ ಬೇಕು'' ಎಂದು ಹೇಳಿದ ಪುನೀತ್ ರಾಜ್​ಕುಮಾರ್, ಡಿಸೆಂಬರ್ ವೇಳೆಗೆ ಚಿತ್ರಮಂದಿರಗಳ ಪರಿಸ್ಥಿತಿ ಉತ್ತಮವಾಗಲಿದೆ ಎಂದು ಭರವಸೆ ವ್ಯಕ್ತಪಡಿಸಿದರು.