ಸಿನಿಮಾ ನಟರ ಅಭಿಮಾನಿಗಳಲ್ಲಿ ಕೆಲವರ ವರ್ತನೆ ಅತಿರೇಖಕ್ಕೆ ಹೋಗುವುದನ್ನು ನಾವು ನೋಡಿದ್ದೇವೆ. ನಟರ ಫೋಟೋಗಳಿಗೆ ರಕ್ತದ ತಿಲಕ ಇಡುವುದು, ಪ್ರಾಣಿಗಳನ್ನು ಬಲಿ ಕೊಡುವುದನ್ನು ಆಗ್ಗಾಗ್ಗೆ ಕೇಳಿರುತ್ತೇವೆ. ಇದೀಗ ಅಭಿಮಾನಿಯೊಬ್ಬರು ದರ್ಶನ್ ಪೋಟೋಗೆ ಹಾವಿನ ಹಾರ ಹಾಕುವ ಮೂಲಕ ಹುಚ್ಚಾಟ ತೋರಿದ್ದಾರೆ.
ಆಟೋ ಚಾಲಕನಾಗಿರುವ ರುದ್ರೇಶ್ ಎಂಬುವವರೇ ಈ ದುಸ್ಸಾಹಸಕ್ಕೆ ಕೈ ಹಾಕಿರುವ ಅಭಿಮಾನಿ. ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಈ ಅಭಿಮಾನಿ ಹಾವನ್ನು ಹೂವಿನ ಹಾರದಂತೆ ಹಿಡಿದು ತನ್ನ ಆಟೋ ಹಿಂದಿನ ದರ್ಶನ್ ಫೋಟೋಗೆ ಹಿಡಿದಿದ್ದಾರೆ. ರುದ್ರೇಶ್ ಹಾವಿನ ಹಾರ ಹಾಕಿರುವುದಲ್ಲದೆ, ಆ ವಿಡಿಯೋ ಮಾಡಿ ಸೋಷಿಯಲ್ ಮೀಡಿಯಾದಲ್ಲಿ ಅಪ್ಲೋಡ್ ಮಾಡಿದ್ದಾರೆ. ಜೊತೆಗೆ ಫ್ಯಾನ್ ಕ್ರೇಜ್ ಎಂದು ಕ್ಯಾಪ್ಷನ್ ಬರೆದುಕೊಂಡಿದ್ದಾರೆ. ಈತನ ಈ ಹುಚ್ಚಾಟಕ್ಕೆ ದರ್ಶನ್ ಅಭಿಮಾನಿಗಳು ಗರಂ ಆಗಿದ್ದಾರೆ. ಇದನ್ನು ನೋಡಿದ ನೆಟಿಜನ್ಸ್ ಹಾಗೂ ಪ್ರಾಣಿ ಪ್ರಿಯರು ಗರಂ ಆಗಿದ್ದಾರೆ. ಪ್ರಾಣಿಪ್ರಿಯ ದರ್ಶನ್ ಈ ವಿಡಿಯೋ ನೋಡಿ ಹೇಗೆ ಪ್ರತಿಕ್ರಿಯೆ ನೀಡುತ್ತಾರೆ ಎಂಬುದನ್ನು ಕಾದು ನೋಡಬೇಕಿದೆ.
