'ಯುವರತ್ನ' ಸೆಟ್​ನಲ್ಲಿ ಕಾಣಿಸಿಕೊಂಡ ಡೈನೋಸರ್: ಆನಂದ್ ರಾಮ್​ ಕೊಡ್ತಿರೋ ಸರ್​ಪ್ರೈಸ್​​ ಏನು?

ಹಲವು ವರ್ಷಗಳ ನಂತರ ನಟ ಪುನೀತ್ ರಾಜಕುಮಾರ್ 'ಯುವರತ್ನ' ಚಿತ್ರದಲ್ಲಿ ಕಾಲೇಜು ಹುಡುಗನ ಪಾತ್ರ ತೊಟ್ಟಿದ್ದಾರೆ. ಮೊನ್ನೆಯಷ್ಟೇ ಮೈಸೂರಿನ ಮಹಾರಾಜ ಕಾಲೇಜಿನಲ್ಲಿ ಶೂಟಿಂಗ್ ಮುಗಿಸಿಕೊಂಡು ಚಿತ್ರತಂಡ ಬೆಂಗಳೂರಿಗೆ ಬಂದಿದೆ.

ಈಗಾಗಲೇ ಶೇ.40 ರಷ್ಟು ಚಿತ್ರೀಕರಣ ಮುಗಿಸಿಕೊಂಡಿರುವ ಯುವರತ್ನ ತಂಡ,ಇನ್ನೆರಡು ದಿನಗಳಲ್ಲಿ ಮತ್ತೆ ಧಾರವಾಡಕ್ಕೆ ಲಗ್ಗೆಯಿಡಲಿದೆ. ಈ ನಡುವೆ ಚಿತ್ರತಂಡದಿಂದ ಇಂಟ್ರೆಸ್ಟಿಂಗ್ ವಿಚಾರವೊಂದನ್ನು ಹಂಚಿಕೊಂಡಿದ್ದಾರೆ ನಿರ್ದೇಶಕ ಸಂತೋಷ ಆನಂದ್​ ರಾಮ್. ಅವರು ತಮ್ಮ ಟ್ವಿಟರ್​ಲ್ಲಿ ಡೈನೋಸರ್ ಚಿತ್ರವೊಂದನ್ನು ಪೋಸ್ಟ್ ಮಾಡಿದ್ದಾರೆ. ಥರ್ಮಾಕೋಲ್​ನಿಂದ ತಯಾರಿಸಲಾಗಿರುವ ಈ ಡನೋಸರ್​ನ್ನು ಯುವರತ್ನ ಚಿತ್ರದಲ್ಲಿ ಬಳಸಲಾಗಿದೆ. ಚಿತ್ರದಲ್ಲಿ ಇದರ ಪಾತ್ರ ಏನು ಎಂಬುದು ಸದ್ಯ ಕುತೂಹಲ ಮೂಡಿಸಿದೆ.

'ರಾಜಕುಮಾರ' ಚಿತ್ರದ ಬಳಿಕ ಸಂತೋಷ ಆನಂದ್ ರಾಮ್ ಹಾಗೂ ಪುನೀತ್ ರಾಜಕುಮಾರ್ 'ಯುವರತ್ನ'ಕ್ಕೆ ಒಂದಾಗಿದ್ದಾರೆ. ಈ ವರ್ಷವೇ ಈ ಚಿತ್ರ ತೆರೆಕಾಣುವ ಸಾಧ್ಯತೆಯಿದೆ.