ದರ್ಶನ್ ಅಭಿನಯದ ರಾಜವೀರ ಮದಕರಿ ನಾಯಕ ಚಿತ್ರದ ಬಗ್ಗೆ ಇಂದಿಗೂ ಸರಿಯಾದ ಸ್ಪಷ್ಟನೆ ದೊರೆತಿಲ್ಲ. ಈ ಸಿನಿಮಾ ಇನ್ನು ನಿಂತಂತೆಯೇ ಎಂದು ಕೆಲವರು ಹೇಳಿದರೆ ಮತ್ತೊಂದು ಮೂಲಗಳ ಪ್ರಕಾರ ಸಿನಿಮಾ ತಡವಾಗಿ ಆರಂಭವಾಗುವುದು ಎನ್ನಲಾಗುತ್ತಿದೆ. ಕೊರೊನಾದಿಂದ ಚಿತ್ರರಂಗ ನಷ್ಟದಲ್ಲಿರುವಾಗ ಬಿಗ್ ಬಜೆಟ್ ಸಿನಿಮಾ ಮಾಡುವುದು ಸರಿಯಲ್ಲ ಎಂದು ರಾಕ್ಲೈನ್ ವೆಂಕಟೇಶ್ ಹಾಗೂ ದರ್ಶನ್ ನಿರ್ಧರಿಸಿದ್ದಾರಂತೆ.
ಇದನ್ನೂ ಓದಿ: ವಿಶೇಷ ಚೇತನ ಮಕ್ಕಳೊಂದಿಗೆ ನಟ ದರ್ಶನ್: ವಿಡಿಯೋ ನೋಡಿ
ಈ ನಡುವೆ ದರ್ಶನ್ ರಾಕ್ಲೈನ್ ವೆಂಕಟೇಶ್ ಪುತ್ರ ಯತೀಶ್ ಸಿನಿಮಾದಲ್ಲಿ ನಟಿಸಲಿದ್ದು ಆ ಚಿತ್ರಕ್ಕೆ 'ಗೋಲ್ಡ್ ರಿಂಗ್' ಎಂದು ಹೆಸರು ಇಡಲಾಗಿದೆಯಂತೆ. ಈ ವಿಚಾವನ್ನು ರಾಕ್ಲೈನ್ ವೆಂಕಟೇಶ್ ಪುತ್ರ ಯತೀಶ್ ಹೇಳಿಕೊಂಡಿದ್ದಾರೆ. ಈ ಹಿಂದೆ ಒಂದೆರೆಡು ಚಿತ್ರಗಳಿಗೆ ಸಹ ನಿರ್ಮಾಪಕರಾಗಿ ಕೆಲಸ ಮಾಡಿದ ಅನುಭವವಿರುವ ಯತೀಶ್, ಈ ಚಿತ್ರದ ಮೂಲಕ ಸ್ವತಂತ್ರ ನಿರ್ಮಾಪಕರಾಗುತ್ತಿದ್ದಾರೆ. 'ಗೋಲ್ಡ್ ರಿಂಗ್' ಬಗ್ಗೆ ಹೇಳುವುದಾದರೆ ಕಥೆ ಮತ್ತು ಟೈಟಲ್ ಫೈನಲೈಸ್ ಆಗಿರುವುದು ಬಿಟ್ಟರೆ, ಮಿಕ್ಕಂತೆ ಏನೂ ಪಕ್ಕಾ ಇಲ್ಲವಂತೆ. ಈ ಚಿತ್ರವನ್ನು ಯಾರು ನಿರ್ದೇಶಿಸುತ್ತಾರೆ, ಯಾರೆಲ್ಲಾ ತಂತ್ರಜ್ಞರು ಈ ಚಿತ್ರದಲ್ಲಿ ತೊಡಗಿಸಿಕೊಳ್ಳುತ್ತಾರೆ ಮತ್ತು ಯಾರೆಲ್ಲಾ ಕಲಾವಿದರು ನಟಿಸುತ್ತಾರೆ ಎಂಬ ವಿಷಯವನ್ನು ಯತೀಶ್ ಬಹಿರಂಗಪಡಿಸಿಲ್ಲ. ಸದ್ಯಕ್ಕೆ ಈ ವಿಷಯಗಳ ಕುರಿತು ಚರ್ಚೆ ನಡೆಯುತ್ತಿದ್ದು, ಇನ್ನೆರೆಡು ತಿಂಗಳುಗಳಲ್ಲಿ ಈ ಚಿತ್ರದ ಬಗ್ಗೆ ಪೂರ್ಣ ವಿವರ ಸಿಗುವ ಸಾಧ್ಯತೆ ಇದೆ.
