ಪರಭಾಷೆಯ ಅನೇಕ ಸಿನಿಮಾಗಳು ಕನ್ನಡಕ್ಕೆ ರೀಮೇಕ್ ಆಗಿವೆ. ಕೆಲವೊಂದು ಸೀಕ್ವೆಲ್ಗಳು ಕೂಡಾ ರೀಮೇಕ್ ಆಗಿವೆ. ತಮಿಳಿನಲ್ಲಿ ಸೆಲ್ವ ನಿರ್ದೇಶನದ 'ನಾನ್ ಅವನಿಲ್ಲೈ' ಸಿನಿಮಾ ಎರಡು ಭಾಗಗಳನ್ನು ತಯಾರಿಸಲಾಗಿತ್ತು. ಈ ಸಿನಿಮಾ ಕನ್ನಡದಲ್ಲಿ ಉಪೇಂದ್ರ ಅಭಿನಯದಲ್ಲಿ 'ಬುದ್ಧಿವಂತ' ಆಗಿ ತಯಾರಾಗಿತ್ತು. ಈಗ 'ಬುದ್ಧಿವಂತ-2' ತಯಾರಾಗುತ್ತಿದೆ.
ರಾಘವ ಲಾರೆನ್ಸ್ ಅಭಿನಯದ 'ಮುನಿ' ನಾಲ್ಕು ಸೀಕ್ವೆಲ್ಗಳಾಗಿ ಬಿಡುಗಡೆಯಾಗಿತ್ತು. ಉಪೇಂದ್ರ ಈ ಚಿತ್ರವನ್ನು ಕನ್ನಡದಲ್ಲಿ ಕಲ್ಪನ ಹೆಸರಿನಲ್ಲಿ ಎರಡು ಭಾಗಗಳನ್ನು ಮಾಡಿದ್ದರು. ಇದೀಗ 2015 ರಲ್ಲಿ ಬಿಡುಗಡೆ ಆದ ತಮಿಳು ಸಿನಿಮಾ 'ಪಿಚ್ಕಕ್ಕಾರನ್' ಸಮಯ. ತಮಿಳಿನಲ್ಲಿ 'ಪಿಚ್ಚಕ್ಕಾರನ್' ಭಾಗ 2 ತಯಾರಿಸುವುದಾಗಿ ವಿಜಯ್ ಆಂಟೋನಿ ಘೋಷಿಸಿದ್ದಾರೆ. ಈ ಸಿನಿಮಾ ತೆಲುಗಿನಲ್ಲಿ 'ಬಿಚ್ಚುಗಾಡು-2' ಆಗಿ ತಯಾರಾಗಲಿದೆ.
'ಪಿಚ್ಚಕ್ಕಾರಾನ್' ಸಿನಿಮಾ ಕನ್ನಡಕ್ಕೆ 'ಅಮ್ಮ ಐ ಲವ್ ಯು' ಹೆಸರನಲ್ಲಿ ತಯಾರಾಗಿತ್ತು. ಈ ಚಿತ್ರದಲ್ಲಿ ಯುವಸಾಮ್ರಾಟ್ ಚಿರಂಜೀವಿ ಸರ್ಜಾ ಹಾಗೂ ಸಿತಾರಾ ಚಿರು ಅಮ್ಮನಾಗಿ ನಟಿಸಿದ್ದರು. ಚಿತ್ರವನ್ನು ದ್ವಾರಕೀಶ್ ಚಿತ್ರ ಬ್ಯಾನರ್ನಲ್ಲಿ ತಯಾರಿಸಲಾಗಿತ್ತು. ಸೀಕ್ವೆಲ್ನಲ್ಲಿ ಅಭಿನಯಿಸಲು ಚಿರಂಜೀವಿ ಸರ್ಜಾ ಇಂದು ನಮ್ಮೊಂದಿಗೆ ಇಲ್ಲ. 'ಪಿಚ್ಚಕಾರನ್ 2' ಕನ್ನಡದಲ್ಲಿ ರೀಮೇಕ್ ಆಗಲಿದೆಯಾ ಅಥವಾ ಡಬ್ ಆಗಿ ಬರಲಿದೆಯೇ ಎಂಬ ಪ್ರಶ್ನೆಗೆ ಇನ್ನೂ ಉತ್ತರ ದೊರೆತಿಲ್ಲ.
ಒಂದು ವೇಳೆ ರಿಮೇಕ್ ಆಗುವುದಾದರೆ ಚಿತ್ರದಲ್ಲಿ ಚಿರು ಜಾಗದಲ್ಲಿ ಇಶಾನ್ ಬರಬಹುದು ಎನ್ನಲಾಗುತ್ತಿದೆ. ಏಕೆಂದರೆ ಈ ಚಿತ್ರಕ್ಕೆ ಮೊದಲು ಆಯ್ಕೆಯಾಗಿದ್ದು ಇಶಾನ್. ಆದರೆ ನಿರ್ದೇಶಕ ಕೆ.ಎಂ. ಚೈತನ್ಯ ಚಿರಂಜೀವಿ ಅವರನ್ನು ಆಯ್ಕೆ ಮಾಡಿಕೊಂಡರು. ಸದ್ಯಕ್ಕೆ ಇಶಾನ್, ಪವನ್ ಒಡೆಯರ್ ನಿರ್ದೇಶನದ 'ರೇಮೊ' ಚಿತ್ರದಲ್ಲಿ ನಟಿಸುತ್ತಿದ್ದಾರೆ. 'ಪಿಚ್ಚಕ್ಕಾರನ್' ಸೀಕ್ವೆಲ್ ಇಶಾನ್ ಪಾಲಾಗಲಿದೆಯಾ ಕಾದು ನೋಡಬೇಕು.
