ಕ್ರಿಯೇಟಿವಿಟಿ ಇತ್ತು ಅಂದ್ರೆ ಚಿತ್ರರಂಗಕ್ಕೆ ಯಾರು ಬೇಕಾದ್ರೂ ಎಂಟ್ರಿ ಕೊಡ್ಬೋದು ಅನ್ನೋದಕ್ಕೆ ಇಲ್ಲೊಂದು ತಾಜಾ ಉದಾಹರಣೆ ಇದೆ. ಹೌದು ಈ ಹಿಂದೆ ಸ್ಟಾರ್ ನಟರ ಹಾಗೂ ನಿರ್ದೇಶಕರ ಕಾರು ಚಾಲಕರಾಗಿ ಕೆಲಸ ಮಾಡುತ್ತಿದ್ದ ಈ ವ್ಯಕ್ತಿ ಇಂದು ನಿರ್ದೇಶಕರ ಕ್ಯಾಪ್ ತೊಟ್ಟು ಆಕ್ಷನ್ ಕಟ್ ಹೇಳೋಕೆ ರೆಡಿಯಾಗಿದ್ದಾರೆ. ಅವರು ಬೇರೆ ಯಾರೂ ಅಲ್ಲ ನಿರ್ದೇಶಕ ಎ.ಪಿ ಅರ್ಜುನ್ಗೆ ಕಾರು ಚಾಲಕನಾಗಿ ಕೆಲಸ ಮಾಡುತ್ತಿದ್ದ ಬಸವ ಅಲಿಯಾಸ್ ರಾಮ್.
ತಮ್ಮ ಹೆಸರನ್ನು ರಾಮ್ ಎಂದು ಬದಲಾಯಸಿಕೊಂಡು ಇದೀಗ 'ರಣಬೇಟೆಗಾರ' ಎಂಬ ಥ್ರಿಲ್ಲರ್ ಸಿನಿಮಾವನ್ನು ನಿರ್ದೇಶನ ಮಾಡಲು ಸಿದ್ದರಾಗಿದ್ದಾರೆ. ಸಿನಿಮಾದ ಮುಹೂರ್ತವು ಈಗಾಗಲೇ ನಡೆದಿದ್ದು, ಚಿತ್ರದ ಮುಹೂರ್ತದ ದಿನವೇ ಮೋಷನ್ ಪೋಸ್ಟರ್ ರಿಲೀಸ್ ಮಾಡಿದ್ದಾರೆ. ಬೆಂಗಳೂರಿನ ಕಲಾವಿದರ ಸಂಘದಲ್ಲಿ ನಡೆದ ಚಿತ್ರದ ಮುಹೂರ್ತ ಕಾರ್ಯಕ್ರಮಕ್ಕೆ 'ಆಕಾಶ್', 'ಅರಸು' ಖ್ಯಾತಿಯ ಮಹೇಶ್ ಬಾಬು, ಎ.ಪಿ ಅರ್ಜುನ್ ಹಾಗೂ ನಿರ್ಮಾಪಕ ಅಣಜಿ ನಾಗರಾಜ್ ಆಗಮಿಸಿ ತನ್ನ ಶಿಷ್ಯನ ಹೊಸ ಸಾಹಸಕ್ಕೆ ಸಾಥ್ ನೀಡಿದರು.
'ರಣಬೇಟೆಗಾರ' ಚಿತ್ರ ಸಸ್ಪೆನ್ಸ್ ಜೊತೆ ಥ್ರಿಲ್ಲರ್ ಇದ್ದು, ಸಿನಿಮಾದ ಮೂಲಕ ಪೃಥ್ವಿರಾಜ್ರನ್ನು ಚಂದನವನಕ್ಕೆ ಪರಿಚಯ ಮಾಡುತ್ತಿದ್ದಾರೆ. ಅಲ್ಲದೆ ಚಿತ್ರದಲ್ಲಿ ನಾಯಕನಿಗೆ ಟಕ್ಕರ್ ಕೊಡುವ ನೆಗೆಟಿವ್ ರೋಲ್ನಲ್ಲಿ ಹೊಸ ನಟ ಚೇತನ್ ಕೃಷ್ಣ ಅಭಿನಯಿಸುತ್ತಿದ್ದಾರೆ.
ಚಿತ್ರದಲ್ಲಿ ತನು ಹಾಗೂ ಅನ್ನಪೂರ್ಣ ಎಂಬ ಇಬ್ಬರು ನಾಯಕಿಯರಿದ್ದು, ಕಾಲೇಜು ಹುಡುಗಿಯರ ಪಾತ್ರದಲ್ಲಿ ಕಾಣಿಸಲಿದ್ದಾರೆ. ಇನ್ನು ಸಿನಿಮಾವನ್ನು ಎಟಿಪಿ ಸಿನಿ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿ ಅಶ್ವಿನಿ ಪಾಟೀಲ್ ನಿರ್ಮಾಣ ಮಾಡುತ್ತಿದ್ದಾರೆ. ಚಿತ್ರಕ್ಕೆ ಮುಂಜಾನೆ ಮಂಜು ಕ್ಯಾಮರಾವರ್ಕ್ ಇದ್ದು, ಡಿಸೆಂಬರ್ ಅಂತ್ಯದಲ್ಲಿ ಇಲ್ಲ ಜನವರಿಯಲ್ಲಿ ಶೂಟಿಂಗ್ ಪ್ಲಾನ್ ಮಾಡಿಕೊಂಡಿದೆ.
