ಬಾಲಿವುಡ್ ನಟ ತಹೀರ್ ರಾಜ್ ಭಶಿನ್ ಹೊಸ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರಕ್ಕೆ ಲೂಪ್ ಲಪೇಟ ಎಂದು ನಾಮಕರಣ ಮಾಡಿದ್ದು, ಈ ಸಿನಿಮಾ ಚಿತ್ರೀಕರಣಕ್ಕಾಗಿ ಕಾಯಲು ಸಾಧ್ಯವಿಲ್ಲ. ಅಷ್ಟು ಉತ್ಸುಕನಾಗಿದ್ದೇನೆ ಎಂದು ನಟ ತಹೀರ್ ರಾಜ್ ಭಶಿನ್ ಹೇಳಿದ್ದಾರೆ.
ಸಿನಿಮಾ ಚಿತ್ರೀಕರಣ ಯಾವಾಗ ಶುರುವಾಗುತ್ತದೆ ಎಂದು ಕಾಯುತ್ತಿದ್ದೇನೆ. ಇದೊಂದು ಅದ್ಭುತ ಕಥೆಯನ್ನು ಹೊಂದಿರುವ ಸಿನಿಮಾ. ಅಲ್ಲದೇ ಈ ಸಿನಿಮಾ ಕಥೆಗೂ ನನಗೂ ನಿಕಟ ಸಂಬಂಧವಿದೆ ಅನ್ನಿಸುತ್ತಿದೆ. ಚಿತ್ರದಲ್ಲಿ ನಾನೇ ಬದುಕುತ್ತಿದ್ದೇನೆ ಅನ್ನಿಸುತ್ತಿದೆ.
ಲಾಕ್ಡೌನ್ ವೇಳೆಯಲ್ಲಿ ಸಿನಿಮಾ ಕಥೆಯಲ್ಲಿ ಬದಲಾವಣೆಯಾಗಿದ್ದು, ಆ ಬದಲಾವಣೆಗೆ ಸಂಬಂಧಿಸದಂತೆ ನಾನು ತಯಾರಿ ನಡೆಸಿದ್ದೇನೆ. ಇದು ನನಗೆ ಖುಷಿಯ ಜೊತೆ ಚಾಲೆಂಜಿಂಗ್ ಆಗಿದೆ ಎಂದು ತಹೀರ್ ರಾಜ್ ಭಶಿನ್ ಹೇಳಿದ್ದಾರೆ. ಈ ಚಿತ್ರಕ್ಕೆ ಆಕಾಶ್ ಭಾಟಿಯ ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ.
ಲೂಪ್ ಲಪೇಟ ಚಿತ್ರದಲ್ಲಿ ತಹೀರ್ ರಾಜ್ ಭಶಿನ್ ಜೊತೆ ತಾಪ್ಸಿ ಪನ್ನು ಲೀಡ್ ರೋಲ್ ಪ್ಲೇ ಮಾಡಲಿದ್ದಾರೆ. ತಾಪ್ಸಿ ಪನ್ನು ಬಗ್ಗೆ ಹೇಳಿರುವ ತಹೀರ್ ರಾಜ್ ಭಶಿನ್, ತಾಪ್ಸಿ ಪನ್ನು ಅದ್ಭುತ ಡ್ಯಾನ್ಸರ್. ನನ್ನ ಮತ್ತು ತಾಪ್ಸಿಯ ಕೆಮಿಸ್ಟ್ರಿಯನ್ನು ಪ್ರೇಕ್ಷಕರು ಮೆಚ್ಚುತ್ತಾರೆ ಎಂದು ಹೇಳಿದ್ದಾರೆ.
ಬರೋಬ್ಬರಿ ಆರು ತಿಂಗಳು ಸ್ತಬ್ದವಾಗಿದ್ದ ಚಿತ್ರರಂಗ ಇದೀಗ ಮೆಲ್ಲಗೆ ಆರಂಭವಾಗಿರುವುದಕ್ಕೆ ತಹೀರ್ ರಾಜ್ ಭಶಿನ್ ಹರ್ಷ ವ್ಯಕ್ತಪಡಿಸಿದ್ದಾರೆ. ಲಾಕ್ಡೌನ್ ಸಮಯ ಎಲ್ಲರಿಗೂ ತಮ್ಮನ್ನು ತಾವು ಮೌಲ್ಯಮಾಪನ ಮಾಡಿಕೊಳ್ಳಲು ಅವಕಾಶ ಕೊಟ್ಟಿದೆ.
ಇದ್ರಿಂದಾಗಿ ಹಲವು ಕೆಲಸಗಳ ಸುಧಾರಣೆ ಕಂಡಿದ್ದು, ಕಥೆಯಲ್ಲಿ ಕೆಲವೊಂದು ಬದಲಾವಣೆಗಳಾಗಿದೆ. ಈ ಲಾಕ್ಡೌನ್ ಜನರಲ್ಲಿ ಆರೋಗ್ಯ ಮತ್ತು ಸುರಕ್ಷತೆ ಬಗ್ಗೆ ಹೆಚ್ಚು ಒತ್ತು ನೀಡುವುದನ್ನು ತಿಳಿಸಿಕೊಟ್ಟಿದೆ ಎಂದು ತಹೀರ್ ರಾಜ್ ಭಶಿನ್ ಹೇಳಿದ್ದಾರೆ.
