ಶಿಕ್ಷಣ ಸಂಸ್ಥೆಗಳಲ್ಲಿ ವಿದ್ಯಾರ್ಥಿಗಳಿಗೆ ಹಿಜಾಬ್ ಧರಿಸಲು ಅನುಮತಿ ನೀಡಬೇಕೆ ಎಂಬ ಕುರಿತು ಕರ್ನಾಟಕ ರಾಜ್ಯದಲ್ಲಿ ಉಲ್ಬಣವಾಗಿರುವ ವಿವಾದದ ಬಗ್ಗೆ ಬಾಲಿವುಡ್ ನಟಿ ಸೋನಂ ಕಪೂರ್ ಪ್ರತಿಕ್ರಿಯೆ ನೀಡಿ, ತಮ್ಮ ಅಭಿಪ್ರಾಯ ತಿಳಿಸಿದ್ದಾರೆ. ಆದರೆ, ಅವರು ಇನ್ನೊಂದು ಧರ್ಮದ ವಿಚಾರಕ್ಕೆ ತಲೆ ಹಾಕಿ ಟ್ರೋಲ್ಗೊಳಗಾಗಿದ್ದಾರೆ.
ನಿನ್ನೆ ತಮ್ಮ ಇನ್ಸ್ಟಾಗ್ರಾಂ ಸ್ಟೋರಿಯಲ್ಲಿ ಫೋಟೋವೊಂದನ್ನು ಸೋನಂ ಕಪೂರ್ ಶೇರ್ ಮಾಡಿದ್ದರು. ಸಿಖ್ ಧರ್ಮದ ವ್ಯಕ್ತಿಯೊಬ್ಬರು ಪೇಟ ಧರಿಸಿರುವ ಹಾಗೂ ಮುಸ್ಲಿಂ ಧರ್ಮದ ಮಹಿಳೆಯೊಬ್ಬರು ಹಿಜಾಬ್ ಧರಿಸಿರುವ ಫೋಟೋ ಅದಾಗಿತ್ತು.
ಅದಕ್ಕೆ ನಟಿ, "ಪೇಟವು ಒಂದು ಆಯ್ಕೆಯಾದ್ರೆ, ಹಿಜಾಬ್ ಯಾಕಾಗಬಾರದು?" ಎಂದು ಕ್ಯಾಪ್ಶನ್ ನೀಡಿದ್ದರು. ಆದರೆ, ಹಿಜಾಬ್-ಕೇಸರಿ ಶಾಲೆ ವಿವಾದದ ನಡುವೆ ಸಿಖ್ ಧರ್ಮವನ್ನು ಎಳೆದಿದ್ದಕ್ಕೆ ಸೋನಂ ಕಪೂರ್ ವಿರುದ್ಧ ನೆಟ್ಟಿಗರು ಕಿಡಿ ಕಾರಿ, ಟ್ರೋಲ್ ಮಾಡಿದ್ದಾರೆ.
ಇದನ್ನೂ ಓದಿ: ಹಿಜಾಬ್ ಕುರಿತ ಕಂಗಾನಾ ಹೇಳಿಕೆಗೆ ಹಿರಿಯ ನಟಿ ಶಬಾನಾ ಅಜ್ಮಿ ಖಡಕ್ ಉತ್ತರ ಹೀಗಿತ್ತು..
ಬಾಲಿವುಡ್ನ ಅನೇಕ ತಾರೆಯರು ಹಿಜಾಬ್ ವಿವಾದದ ಬಗ್ಗೆ ಪ್ರತಿಕ್ರಿಯೆ ನೀಡುತ್ತಿದ್ದಾರೆ. ಇತ್ತೀಷೆಗಷ್ಟೇ ನಟಿ ಕಂಗನಾ ರಣಾವತ್ ಕೂಡ "ನೀವು ಧೈರ್ಯವನ್ನು ತೋರಿಸಲು ಬಯಸಿದರೆ, "ಆಫ್ಘಾನಿಸ್ತಾನದಲ್ಲಿ ಬುರ್ಖಾ ಧರಿಸದೆ ಧೈರ್ಯವನ್ನು ಪ್ರದರ್ಶಿಸಿ. ನಿಮ್ಮನ್ನು ಬಂಧಿಯಾಗಿಟ್ಟುಕೊಳ್ಳದೆ ಬಿಡಿಸಿಕೊಳ್ಳಲು ಕಲಿಯಿರಿ" ಎಂದು ಹೇಳಿಕೆ ನೀಡಿ ವಿವಾದಕ್ಕೆ ತುಪ್ಪ ಸುರಿದಿದ್ದರು.
