ನವದೆಹಲಿ: ಸಾಮಾಜಿಕ ಜಾಲತಾಣದಲ್ಲಿ ಸುಳ್ಳು ಮಾಹಿತಿಗಳು ಹರಡುವುದನ್ನು ತಡೆಯಲು ಮಾಹಿತಿ ಮತ್ತು ತಂತ್ರಜ್ಞಾನ ಕಾಯ್ದೆಗೆ ಮಾಡಲಾದ ತಿದ್ದುಪಡಿಗಳು ನೆರವಾಗಲಿವೆ ಎಂದು ಕೇಂದ್ರ ಐಟಿ ಇಲಾಖೆ ಸಚಿವ ರಾಜೀವ್ ಚಂದ್ರಶೇಖರ್ ಅಭಿಪ್ರಾಯಪಟ್ಟಿದ್ದಾರೆ.
ಟ್ವಿಟ್ಟರ್, ಫೇಸ್ಬುಕ್ ಸೇರಿದಂತೆ ಸೋಷಿಯಲ್ ಮೀಡಿಯಾ ಕುಂದುಕೊರತೆಗಳನ್ನು ಮೇಲ್ವಿಚಾರಣೆ ಮಾಡಲು ಸಾಮಾಜಿಕ ಮಾಧ್ಯಮ ಕುಂದುಕೊರತೆ ಮೇಲ್ಮನವಿ ಸಮಿತಿ ರಚಿಸುವ ಬಗ್ಗೆ ಕೇಂದ್ರ ಸರ್ಕಾರ ಅಧಿಸೂಚನೆ ಹೊರಡಿಸಿತ್ತು.
ಈ ಬಗ್ಗೆ ಮಾಹಿತಿ ನೀಡಿದ ಸಚಿವರು, ಸಾಮಾಜಿಕ ಮಾಧ್ಯಮದಲ್ಲಿ ಹರಡಲಾಗುತ್ತಿರುವ ಸುಳ್ಳು ಮಾಹಿತಿಯನ್ನು ನಿಯಂತ್ರಿಸುವ ಕುರಿತಾಗಿ ದೇಶದ ಲಕ್ಷಾಂತರ ಜನರು ಆಯಾ ಕಂಪನಿಗೆ ದೂರು ನೀಡಿದಾಗ್ಯೂ ಕ್ರಮ ವಹಿಸದ ಕಾರಣ, ಇದರ ಮೇಲೆ ಕಣ್ಣಿಡಲು ಸರ್ಕಾರವೇ ಮೂವರು ಸದಸ್ಯರ ಸಮಿತಿ ರಚಿಸಿದೆ ಎಂದು ತಿಳಿಸಿದರು.
ಸಾಮಾಜಿಕ ಮಾಧ್ಯಮ ಕಂಪನಿಗಳು ಡಿಜಿಟಲ್ ನಾಗರಿಕರ ಹಿತಾಸಕ್ತಿಗಳನ್ನು ಕಾಪಾಡುವ ಕೆಲಸ ಮಾಡಬೇಕು. ಇದನ್ನು ಆಯಾ ದೇಶದ ಸರ್ಕಾರಗಳು ಬಯಸುತ್ತವೆ. ಈ ಹಿಂದೆ ನಿಯಮಗಳ ಬಗ್ಗೆ ಬಳಕೆದಾರರಿಗೆ ಮಾಹಿತಿ ನೀಡುವುದಷ್ಟೇ ಮಧ್ಯವರ್ತಿಗಳ ಕೆಲಸವಾಗಿತ್ತು. ಆದರೆ, ಅದು ಬದಲಾಗಿ ಅವರೂ ಕೂಡ ಹೆಚ್ಚಿನ ಹೊಣೆಗಾರಿಕೆ ಹೊರಬೇಕಾಗುತ್ತದೆ. ಕಾನೂನುಬಾಹಿರ ಪೋಸ್ಟ್ ಆಗದಂತೆ ಮಧ್ಯವರ್ತಿಗಳು ತಡೆಯಬೇಕು ಎಂದರು.
ನೆಲದ ಕಾನೂನು ಪಾಲನೆ ಕಡ್ಡಾಯ: ಸಾಮಾಜಿಕ ಮಾಧ್ಯಮ ಕಂಪನಿಗಳ ಕೇಂದ್ರ ಕಚೇರಿ ವಿದೇಶದ ಯಾವುದೇ ಮೂಲೆಯಲ್ಲಿರಲಿ, ಅದು ಕಾರ್ಯನಿರ್ವಹಿಸುವ ದೇಶದ ನೆಲದ ಕಾನೂನನ್ನು ಅನುಸರಿಸಲೇಬೇಕು. ಭಾರತದಲ್ಲಿರುವ ಎಲ್ಲ ಕಂಪನಿಗಳು ಇಲ್ಲಿನ ಕಾನೂನನ್ನು ಗೌರವಿಸಿ, ಅದರಡಿ ಕೆಲಸ ಮಾಡಬೇಕು. ಭಾರತೀಯರ ಸಾಂವಿಧಾನಿಕ ಹಕ್ಕುಗಳನ್ನು ಅವರು ನಿರಾಕರಿಸುವಂತಿಲ್ಲ ಎಂದು ಹೇಳಿದ್ದಾರೆ.
ಸುಳ್ಳು ಮಾಹಿತಿ ರದ್ದಿಗೆ 72 ಗಂಟೆ ಅವಧಿ: ಹಿಂಸಾಚಾರವನ್ನು ಪ್ರಚೋದಿಸುವ, ಧರ್ಮ ಅಥವಾ ಜಾತಿಯ ಆಧಾರದ ಮೇಲೆ ದ್ವೇಷವನ್ನು ಉತ್ತೇಜಿಸುವ ಯಾವುದೇ ತಪ್ಪು ಮಾಹಿತಿ ಸಾಮಾಜಿಕ ಮಾಧ್ಯಮದಲ್ಲಿ ಭಿತ್ತರವಾಗಿದ್ದರೆ, ಅದನ್ನು ಆ ಕಂಪನಿ 72 ಗಂಟೆಗಳ ಅವಧಿಯೊಳಗೆ ಅಳಿಸಿ ಹಾಕಬೇಕು. ಇದು ತುಸು ಹೆಚ್ಚು ಸಮಯವೇ ಆದರೂ, ನಿರ್ದಿಷ್ಟ ಸಮಯದೊಳಗೆ ಅಂತಹ ವಿಷಯಗಳನ್ನು ತೆಗೆದುಹಾಕಬೇಕು ಎಂದು ಹೇಳಿದರು.
ಕಂಪನಿಗಳಿಗೆ ದಂಡ ವಿಧಿಸುವ ಬಗ್ಗೆ ಮಾತನಾಡಿದ ಸಚಿವರು, ಈ ಬಗ್ಗೆ ಸರ್ಕಾರ ಯಾವುದೇ ಆಸಕ್ತಿ ಹೊಂದಿಲ್ಲ. ದೇಶದ ಕಾನೂನನ್ನು ಪಾಲಿಸಿ ನಡೆಯುವ ಕಂಪನಿಗಳ ಮೇಲೆ ಯಾವುದೇ ಒತ್ತಡ ಇರುವುದಿಲ್ಲ. ಅದು ಮೀರಿದಲ್ಲಿ ಮುಂದಿನ ಕ್ರಮಗಳ ಬಗ್ಗೆ ಸರ್ಕಾರ ಮುಂದಡಿ ಇಡಲಿದೆ ಎಂದರು.
ಇದನ್ನೂ ಓದಿ: ಹೃದಯಾಘಾತದಿಂದ 9ನೇ ತರಗತಿ ವಿದ್ಯಾರ್ಥಿನಿ ಸಾವು; ಪೋಷಕರಿಂದ ಮಗಳ ನೇತ್ರದಾನ
