ತಿರುಪತಿ (ಆಂಧ್ರಪ್ರದೇಶ): ಸೂರ್ಯನ ಅಧ್ಯಯನಕ್ಕೆ ಆದಿತ್ಯ ಎಲ್ 1 ಮಿಷನ್ ಉಡಾವಣೆಗೆ ಕ್ಷಣಗಣನೆ ಆರಂಭವಾಗಿದೆ. ಈ ಹಿನ್ನೆಲೆಯಲ್ಲಿ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ದ ವಿಜ್ಞಾನಿಗಳು ತಿರುಮಲ ದೇವಸ್ಥಾನಕ್ಕೆ ತೆರಳಿ ಪ್ರಾರ್ಥನೆ ಸಲ್ಲಿಸಿದ್ದಾರೆ. ಚಂದ್ರಯಾನ -3ರ ಯಶಸ್ಸಿನ ಬೆನ್ನಲ್ಲೆ ಇಸ್ರೋ ಮತ್ತೊಂದು ಮಹತ್ವದ ಬಾಹ್ಯಾಕಾಶ ಅಧ್ಯಯನಕ್ಕೆ ಮುಂದಾಗಿದ್ದು, ನಾಳೆ (ಸೆಪ್ಟೆಂಬರ್ 02) ಆಂಧ್ರಪ್ರದೇಶದ ಶ್ರೀಹರಿಕೋಟಾ ಬಾಹ್ಯಾಕಾಶ ನಿಲ್ದಾಣದಿಂದ ಬೆಳಗ್ಗೆ 11.50ಕ್ಕೆ ಆದಿತ್ಯ ಎಲ್ 1 ಮಿಷನ್ ಹೊತ್ತ PSLV-C57 ರಾಕೆಟ್ ಉಡಾವಣೆಯಾಗಲಿದೆ.
ಇಸ್ರೋದ ವಿಜ್ಞಾನಿಗಳು ನಾಳೆ ನಡೆಯುವ ಉಡಾನಣೆ ಮತ್ತು ಆದಿತ್ಯ ಯೋಜನೆಯ ಯಶಸ್ಸಿಗಾಗಿ ತಿರುಮಲ ಬೆಟ್ಟದ ಮೇಲಿರುವ ವೆಂಕಟೇಶ್ವರ ದೇವಸ್ಥಾನಕ್ಕೆ ಭೇಟಿ ನೀಡಿ ಪ್ರಾರ್ಥಿಸಿದ್ದಾರೆ. ಆದಿತ್ಯ L1 ಬಾಹ್ಯಾಕಾಶ ನೌಕೆಯು ಸೌರ ಕರೋನದ ದೂರಸ್ಥ ವೀಕ್ಷಣೆಗಳನ್ನು ಒದಗಿಸಲು ಮತ್ತು ಭೂಮಿಯಿಂದ ಸುಮಾರು 1.5 ಮಿಲಿಯನ್ ಕಿಲೋಮೀಟರ್ ದೂರದಲ್ಲಿರುವ ಎಲ್1 (ಸೂರ್ಯ-ಭೂಮಿಯ ನಡುವಿನ ಗುರುತ್ವ ರಹಿತ ಪಾಯಿಂಟ್) ನಲ್ಲಿ ಸೌರ ಅಧ್ಯಯನ ಮಾಡಲಾಗುತ್ತದೆ.
ಇಸ್ರೋ ಈ ವರೆಗೆ ಒಂದು ತಿರುಪತಿಗೆ ತೆರಳಿ ಪ್ರಾರ್ಥಿಸುವುದನ್ನು ವಾಡಿಕೆ ಬೆಳೆಸಿಕೊಂಡು ಬಂದಿದೆ. ತನ್ನ ಮಹತ್ವದ ಯೋಜನೆಯ ಮೊದಲು ತಿರುಪತಿಗೆ ತೆರಳಿ ಪೂಜೆ ಸಲ್ಲಿಸುತ್ತಿದೆ. ಚಂದ್ರಯಾನ-3 ಉಡಾವಣೆಗೂ ಮುನ್ನ ಜುಲೈ 13ರಂದು ಇಸ್ರೋ ವಿಜ್ಞಾನಿಗಳು ಚಂದ್ರಯಾನದ ಸಣ್ಣ ಮಾದರಿಯೊಂದಿಗೆ ಆಂಧ್ರಪ್ರದೇಶದ ಪ್ರಸಿದ್ಧ ತಿರುಪತಿ ತಿರುಮಲ ದೇವಸ್ಥಾನಕ್ಕೆ ಭೇಟಿ ನೀಡಿದ್ದರು.
ಚಂದ್ರಯಾನ -3ರ ಲ್ಯಾಂಡರ್ ಆಗಸ್ಟ್ 23 ರಂದು ಚಂದ್ರನ ಮೇಲ್ಮೈಯಲ್ಲಿ ಯಶಸ್ವಿಯಾಗಿ ಇಳಿಯುವ ಮೂಲಕ ಇತಿಹಾಸವನ್ನು ಬರೆದಿದೆ. ಚಂದ್ರನ ದಕ್ಷಿಣ ಧ್ರುವದಲ್ಲಿ ಲ್ಯಾಂಡರ್ನ್ನು ಯಶಸ್ವಿಯಾಗಿ ಇಳಿಸಿದ ಏಕೈಕ ದೇಶ ಭಾರತವಾಗಿದೆ.
ಏನಿದು ಎಲ್ ಪಾಯಿಂಟ್: ಎಲ್ 1 ಪಾಯಿಂಟ್ ಎಂದರೆ ಲ್ಯಾಗ್ರೇಂಜಿಯನ್ ಪಾಯಿಂಟ್ ಎಂದಾಗುತ್ತದೆ. ಇದು ಸೂರ್ಯ ಮತ್ತು ಭೂಮಿ ಗುರುತ್ವ ಬಲ ಸಮಾನವಾಗಿರುವ ಬಾಹ್ಯಾಕಾಶದ ಸ್ಥಳವಾಗಿದೆ. ಇಲ್ಲಿ ನೌಕೆಯನ್ನು ನಿಲ್ಲಿಸುವುದರಿಂದ ಗ್ರಹಣದಂತಹ ಅಡ್ಡಿ ಆತಂಕಗಳಿಲ್ಲದೇ ಆದಿತ್ಯ ವೀಕ್ಷಣೆ ಸಾಧ್ಯ. ಇಲ್ಲಿ ನೌಕೆಯನ್ನು ನಿಲ್ಲಿಸುವುದರಿಂದ ಇಂಧನದ ಅಗತ್ಯತೆ ಇಲ್ಲದೇ ಕಾರ್ಯ ನಿರ್ವಹಿಸುತ್ತದೆ. ಇದಕ್ಕಾಗಿ ಈ ಎಲ್ 1 ಪಾಯಿಂಟ್ನ್ನು ಆಯ್ಕೆ ಮಾಡಲಾಗಿದೆ. ಇದರಿಂದ ದೀರ್ಘಕಾಲದವರೆಗೆ ಸೂರ್ಯನ ಅಧ್ಯಯನ ಮಾಡಬಹುದಾಗಿದೆ.
ಆದಿತ್ಯ ಎಲ್ 1 ನೌಕೆ 7 ಪೇಲೋಡ್ಗಳನ್ನು ಒಳಗೊಂಡಿದ್ದು, ಇವುಗಳ ಮೂಲಕ ಸೂರ್ಯನ ಅಧ್ಯಯನ ಮಾಡಲಿದೆ. ಸೂರ್ಯನ ಫೋಟೋಸ್ಪಿಯರ್, ಕ್ರೋಮೋಸ್ಪಿಯರ್ ಮತ್ತು ಸೂರ್ಯನ ಹೊರವಲಯ (ಕೊರೋನಾ)ವನ್ನು ಎಲೆಕ್ಟ್ರೋಮ್ಯಾಗ್ನೆಟಿಕ್, ಪಾರ್ಟಿಕರ್ ಮತ್ತು ಮ್ಯಾಗ್ನೆಟಿಕ್ ಪೀಲ್ಡ್ ಡಿಟೆಕ್ಟರ್ಗಳ ಮೂಲಕ ಅಧ್ಯಯನ ಮಾಡಲಿದೆ.
ಇದನ್ನೂ ಓದಿ: ಮಹತ್ವಾಕಾಂಕ್ಷೆಯ ಆದಿತ್ಯ ಎಲ್1 ಸೋಲಾರ್ ಮಿಷನ್ ಉಡ್ಡಯನಕ್ಕೆ ಕ್ಷಣಗಣನೆ: ಇಸ್ರೋ
