ನವದೆಹಲಿ : ಮೆಟಾ ಒಡೆತನದ ಕಂಪನಿ ಇನ್ಸ್ಟಾಗ್ರಾಮ್ ಜೂನ್ ಕೊನೆಯ ವೇಳೆಗೆ ಟ್ವಿಟರ್ ಮಾದರಿಯ ಮೈಕ್ರೊ ಬ್ಲಾಗಿಂಗ್ ಪ್ಲಾಟ್ಫಾರ್ಮ್ ಒಂದನ್ನು ಆರಂಭಿಸಲಿದೆ. ಈ ಮೂಲಕ ಎಲೋನ್ ಮಸ್ಕ್ ಒಡೆತನದ ಟ್ವಿಟರ್ಗೆ ಮೆಟಾ ಪೈಪೋಟಿ ಒಡ್ಡಲಿದೆ. ಹೊಸ ಟೆಕ್ಸ್ಟ್ ಆಧರಿತ ಟ್ವಿಟರ್ ಮಾದರಿಯ ಆ್ಯಪ್ ಗೆ ಸದ್ಯ P92 ಅಥವಾ ಬಾರ್ಸಿಲೋನಾ ಎಂದು ತಾತ್ಕಾಲಿಕವಾಗಿ ಹೆಸರಿಸಲಾಗಿದೆ ಎಂದು ತಂತ್ರಜ್ಞಾನ ವಿಶ್ಲೇಷಕ ಲಿಯಾ ಹ್ಯಾಬರ್ಮನ್ ಹೇಳಿದ್ದಾರೆ. ನಿಮಗಾಗಿ ಸಂಭಾಷಣೆ ನಡೆಸಲು ಬರುತ್ತಿರುವ ಇನ್ಸ್ಟಾಗ್ರಾಮ್ ಟೆಕ್ಸ್ಟ್ ಆಧರಿತ ಆ್ಯಪ್ನಲ್ಲಿ ಮತ್ತಷ್ಟು ಮಾತನಾಡಿ. ನಿಮ್ಮ ಪ್ರೇಕ್ಷಕರು ಮತ್ತು ಗೆಳೆಯರೊಂದಿಗೆ ನೇರವಾಗಿ ಮಾತನಾಡಿ ಎಂದು ಆ್ಯಪ್ನ ವಿವರಣೆಯಲ್ಲಿ ಹೇಳಲಾಗಿದೆ.
ಹೊಸ ಅಪ್ಲಿಕೇಶನ್ ಇನ್ಸ್ಟಾಗ್ರಾಮ್ ಮತ್ತು ಟ್ವಿಟರ್ನ ಮಿಶ್ರಣದಂತೆ ಕಾಣುತ್ತದೆ. ಮಾಹಿತಿಯ ಪ್ರಕಾರ, ಶೀಘ್ರದಲ್ಲೇ ಈ ಅಪ್ಲಿಕೇಶನ್ Mastodon ನಂತಹ ಕೆಲವು ಇತರ ಅಪ್ಲಿಕೇಶನ್‌ಗಳೊಂದಿಗೆ ಹೊಂದಿಕೊಳ್ಳುತ್ತದೆ. ನಿಮಗೆ ಯಾರು ರಿಪ್ಲೈ ಮಾಡಬಹುದು ಮತ್ತು ನಿಮ್ಮ ಖಾತೆಯನ್ನು ಮೆನ್ಷನ್ ಮಾಡಬಹುದು ಎಂಬುದನ್ನು ನಿಯಂತ್ರಿಸಲು ಇದರಲ್ಲಿ ಸೆಟ್ಟಿಂಗ್‌ ಮಾಡಬಹುದು ಎಂದು ಮೆಟಾ ಹೇಳಿದೆ.
ನೀವು ಬ್ಲಾಕ್ ಮಾಡಿದ ಖಾತೆಗಳು ಇನ್ಸ್ಟಾಗ್ರಾಮ್ನಿಂದ ಕ್ಯಾರಿ ಓವರ್ ಆಗುತ್ತವೆ ಮತ್ತು ಎಲ್ಲರೂ ಸುರಕ್ಷಿತವಾಗಿ ಮತ್ತು ಅಧಿಕೃತವಾಗಿ ಸಂವಹನ ನಡೆಸುವುದನ್ನು ಖಚಿತಪಡಿಸಿಕೊಳ್ಳಲು ನಾವು ಅದೇ ಸಮುದಾಯ ಮಾರ್ಗಸೂಚಿಗಳನ್ನು ಜಾರಿಗೊಳಿಸುತ್ತಿದ್ದೇವೆ ಎಂದು ವಿವರಣೆ ತಿಳಿಸಿದೆ. ನೀವು ಸಾರ್ವಜನಿಕ ಜೀವನದಲ್ಲಿರುವ ವ್ಯಕ್ತಿಯಾಗಿದ್ದರೆ ಅಥವಾ ನೀವು ಖಾಸಗಿ ವ್ಯಕ್ತಿಯಾಗಿದ್ದರೆ ಮತ್ತು ಅವರನ್ನು ಅನುಯಾಯಿಗಳಾಗಿ ಅನುಮೋದಿಸಿದರೆ ಈ ಇತರ ಅಪ್ಲಿಕೇಶನ್‌ಗಳಲ್ಲಿನ ಬಳಕೆದಾರರು ನಿಮ್ಮ ಪ್ರೊಫೈಲ್ ಮತ್ತು ವಿಷಯವನ್ನು ಹುಡುಕಲು, ಅನುಸರಿಸಲು ಮತ್ತು ಸಂವಹನ ಮಾಡಲು ಸಾಧ್ಯವಾಗುತ್ತದೆ. ಇನ್ಸ್ಟಾಗ್ರಾಮ್ನ ಹೊಸ ಪಠ್ಯ ಆಧಾರಿತ ಅಪ್ಲಿಕೇಶನ್ ಟೈಮ್‌ಲೈನ್‌ನಲ್ಲಿ ಟ್ವಿಟರ್ ತರಹದ ಪೋಸ್ಟ್‌ಗಳನ್ನು ನೀವು ರಚಿಸಬಹುದು ಎಂದು ವರದಿ ತಿಳಿಸಿದೆ.
ಚಾಟ್ಜಿಪಿಟಿ ನಿರ್ಬಂಧಿಸಿದ ಆ್ಯಪಲ್: ಆ್ಯಪಲ್ ಕಂಪನಿಯು AI ಚಾಟ್‌ಬಾಟ್ ಚಾಟ್ಜಿಪಿಟಿ ಮತ್ತು ಗಿಟ್‌ಹಬ್‌ನ ಕಾಪಿಲೋಟ್‌ನ ಆಂತರಿಕ ಬಳಕೆಯನ್ನು ನಿರ್ಬಂಧಿಸಿದೆ ಎಂದು ವರದಿಯಾಗಿದೆ. ಬಳಕೆದಾರರ ಡೇಟಾವನ್ನು ಬಳಸುವ ವಿಷಯದಲ್ಲಿ ಎಐ ಮಾಡೆಲ್ಗಳಿಗೆ ತರಬೇತಿ ನೀಡಿದ ಡೆವಲಪರ್ಗಳ ಕೈಗೆ ತನ್ನ ಆಂತರಿಕ ಗೌಪ್ಯ ಡೇಟಾ ಸಿಗಬಹುದು ಎಂಬ ಆತಂಕದ ಹಿನ್ನೆಲೆಯಲ್ಲಿ ಆ್ಯಪಲ್ ಈ ಕ್ರಮ ಕೈಗೊಂಡಿದೆ.
ಆ್ಯಪಲ್ ತನ್ನದೇ ಆದ ಎಐ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುತ್ತಿರುವುದರಿಂದ ಈ ಕೆಲಸದಲ್ಲಿರುವವರು ತಂತ್ರಜ್ಞಾವನ್ನು ಹೊರಗಡೆ ಸೋರಿಕೆ ಮಾಡಬಹುದು ಎಂಬ ಆತಂಕ ಕೂಡ ಆ್ಯಪಲ್ಗೆ ಇದೆ ಎಂದು ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ. ಪರಿಶೀಲಿಸಿದ ದಾಖಲೆಯ ಪ್ರಕಾರ, ಆ್ಯಪಲ್ ಕೆಲವು ಉದ್ಯೋಗಿಗಳಿಗೆ ಚಾಟ್ಜಿಪಿಟಿ ಮತ್ತು ಇತರ ಬಾಹ್ಯ ಎಐ ಪರಿಕರಗಳ ಬಳಕೆಯನ್ನು ನಿರ್ಬಂಧಿಸಿದೆ.
ಸ್ಯಾಮ್ಸಂಗ್ ಕೂಡ ಈ ಹಿಂದೆ ಇದೇ ರೀತಿಯ ಕ್ರಮಕ್ಕೆ ಮುಂದಾಗಿತ್ತು. ಕಂಪನಿ ಮಾಲೀಕತ್ವದ ಸಾಧನಗಳು ಮತ್ತು ಆಂತರಿಕ ನೆಟ್‌ವರ್ಕ್‌ಗಳಲ್ಲಿ ಚಾಲನೆಯಲ್ಲಿರುವ ಕಂಪನಿಯೇತರ ಸಾಧನಗಳಲ್ಲಿ ಚಾಟ್ಜಿಪಿಟಿಯಂಥ AI ಪರಿಕರಗಳ ಬಳಕೆಯನ್ನು ಸ್ಯಾಮ್ಸಂಗ್ ನಿರ್ಬಂಧಿಸಿತ್ತು. ಸಾಫ್ಟ್‌ವೇರ್ ಅಭಿವೃದ್ಧಿ ಮತ್ತು ಅನುವಾದಕ್ಕಾಗಿ ಸ್ಯಾಮ್ಸಂಗ್ ತನ್ನದೇ ಆದ ಆಂತರಿಕ ಎಐ ಪರಿಕರಗಳನ್ನು ಅಭಿವೃದ್ಧಿಪಡಿಸುತ್ತಿದೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ : ಖಾಲಿಯಾಗುತ್ತಿವೆ ಸರೋವರಗಳು; 200 ಕೋಟಿ ಜನರಿಗೆ ನೀರಿನ ಕೊರತೆ ಸಂಭವ
