ನವದೆಹಲಿ : ವಿಶ್ವದ ಹಲವಾರು ದೇಶಗಳಲ್ಲಿ ತೀವ್ರವಾದ ಶಾಖದ ಅಲೆ ಬೀಸಲು ಮತ್ತು ಬರಗಾಲ ಉಂಟಾಗಲು ಕಾರಣವಾಗುವ ಎಲ್ ನಿನೊ ಹವಾಮಾನದ ಅಲೆ ಪ್ರಬಲವಾಗುತ್ತಿದೆ. ಭಾರತದಲ್ಲಿಯೂ ಎಲ್ ನಿನೋ ಪರಿಣಾಮ ಕಾಣಿಸಿಕೊಳ್ಳಲಿದೆ. ಈ ಶಾಖದ ಅಲೆಯಿಂದ ಉಂಟಾಗುವ ಪ್ರತಿಕೂಲ ಪರಿಣಾಮಗಳಿಂದ ವಿಶ್ವ ಆರ್ಥಿಕತೆಗೆ ಕನಿಷ್ಠ 3 ಟ್ರಿಲಿಯನ್ ಡಾಲರ್ ಹಾನಿಯಾಗಬಹುದು ಎಂದು ಜರ್ನಲ್ ಸೈನ್ಸ್ (journal Science) ಜರ್ನಲ್ನಲ್ಲಿ ಪ್ರಕಟವಾದ ವರದಿ ಹೇಳಿದೆ.
ಸಮುದ್ರದಲ್ಲಿ ದಕ್ಷಿಣ ಅಮೆರಿಕದಿಂದ ಏಷ್ಯಾದವರೆಗೆ ವ್ಯಾಪಿಸಿರುವ ಬಿಸಿ ನೀರಿನ ಅಲೆಯು ದೂರಗಾಮಿ ಹವಾಮಾನ ಬದಲಾವಣೆಗಳನ್ನು ಪ್ರಚೋದಿಸುತ್ತದೆ. ಈ ಹಿಂದೆ ಇದು ಹಲವಾರು ದೇಶಗಳಲ್ಲಿನ ಆರ್ಥಿಕ ಬೆಳವಣಿಗೆಯನ್ನು ನಿರಂತರವಾಗಿ ಕಡಿಮೆ ಮಾಡಿದೆ. 1982-83 ರಲ್ಲಿ ಮತ್ತು 1997-98 ರಲ್ಲಿ ಇದು ಸಂಭವಿಸಿದಾಗ ವಿಶ್ವದ ಆರ್ಥಿಕತೆಗೆ ಕ್ರಮವಾಗಿ 4.1 ಟ್ರಿಲಿಯನ್ ಡಾಲರ್ ಮತ್ತು 5.7 ಟ್ರಿಲಿಯನ್ ಡಾಲರ್ ಹಾನಿ ಮಾಡಿತ್ತು. ಸಂಶೋಧನೆಯ ಪ್ರಕಾರ ಸಮುದ್ರ ಮೇಲ್ಮೈ ತಾಪಮಾನವು ಸಾರ್ವಕಾಲಿಕವಾಗಿ ಹೆಚ್ಚಾಗಿರುವ 2023ರ ಈ ಸಮಯದಲ್ಲಿ ಎಲ್ ನಿನೋ ಬರುತ್ತದೆ ಎಂದು ಊಹಿಸಲಾಗಿದೆ.
ಈ ಹಿಂದಿನ ಪ್ರಮುಖ ಎಲ್ ನಿನೋ ಪರಿಣಾಮ 2016 ರಲ್ಲಿ ಸಂಭವಿಸಿತ್ತು ಮತ್ತು ಆ ವರ್ಷ ಇತಿಹಾಸದಲ್ಲಿ ಅತ್ಯಂತ ಬಿಸಿಯಾದ ವರ್ಷ ಎಂದು ದಾಖಲಾಗಿದೆ. ಆಗಿನಿಂದ ಏಳು ವರ್ಷಗಳಲ್ಲಿ ಜಾಗತಿಕ ತಾಪಮಾನವು ತೀವ್ರಗೊಳ್ಳುತ್ತಲೇ ಸಾಗಿದೆ. ಜೊತೆಗೆ, ಪ್ರಪಂಚವು ವಿಸ್ತೃತ ಲಾ ನಿನಾದಿಂದ ಹೊರಬರುತ್ತಿದೆ ಮತ್ತು ಇವೆರಡೂ ಹಂತಗಳು ಪರಸ್ಪರ ಪ್ರತಿಯೊಂದನ್ನು ಬಲಪಡಿಸಬಹುದು ಎಂದು ಸಂಶೋಧಕರು ತಿಳಿಸಿದ್ದಾರೆ.
ಈ ಬೇಸಿಗೆಯ ಕೊನೆಯಲ್ಲಿ ಎಲ್ ನಿನೋ ಪ್ರಾರಂಭವಾಗುವ ಸಾಧ್ಯತೆಗಳು 80 ಪ್ರತಿಶತಕ್ಕಿಂತ ಹೆಚ್ಚು ಎಂದು ಅಮೆರಿಕದ ನ್ಯಾಶನಲ್ ಓಷಿಯಾನಿಕ್ ಅಂಡ್ ಅಟ್ಮಾಸ್ಫಿಯರಿಕ್ ಅಡ್ಮಿನಿಸ್ಟ್ರೇಷನ್ ಸಂಸ್ಥೆ ಅಂದಾಜಿಸಿದೆ. "ವಾಸ್ತವದಲ್ಲಿ ಬಹುದೊಡ್ಡ ಎಲ್ ನಿನೊ ಸಂಭವಿಸಲು ಅಗತ್ಯವಿರುವ ಎಲ್ಲ ಅಂಶಗಳು ಸಿದ್ಧವಾಗಿವೆ. ಈ ಎಲ್ ನಿನೊ ಮುಂದಿನ ಒಂದು ದಶಕದವರೆಗೆ ಉಷ್ಣವಲಯದ ದೇಶಗಳಲ್ಲಿ ಆರ್ಥಿಕ ಬೆಳವಣಿಗೆಯನ್ನು ಕುಗ್ಗಿಸುವ ಸಾಧ್ಯತೆಯಿದೆ ಎಂದು ನಮ್ಮ ಫಲಿತಾಂಶಗಳು ಸೂಚಿಸುತ್ತವೆ" ಎಂದು ಅಮೆರಿಕದ ಡಾರ್ಟ್ಮೌತ್ ಕಾಲೇಜಿನ ಡಾಕ್ಟರೇಟ್ ಅಭ್ಯರ್ಥಿ ಕ್ರಿಸ್ಟೋಫರ್ ಕ್ಯಾಲಹನ್ ಹೇಳಿದರು.
ಎಲ್ ನಿನೊ ಬರದಿದ್ದರೆ ವಿಶ್ವದ ಆರ್ಥಿಕತೆ ಹೇಗಿರಬಹುದು ಎಂಬುದಕ್ಕೆ ಹೋಲಿಸಿದರೆ ಎಲ್ ನಿನೊ ಸಂಭವಿಸಿದಾಗ ವಿಶ್ವದ ಆರ್ಥಿಕತೆಗೆ ಎಷ್ಟೋ ಟ್ರಿಲಿಯನ್ ಡಾಲರ್ ಹಾನಿಯಾಗಬಹುದು. ಹವಾಮಾನ ಬದಲಾವಣೆಯು ಎಲ್ ನಿನೊದ ಆವರ್ತನ ಮತ್ತು ಶಕ್ತಿಯನ್ನು ಸಮರ್ಥವಾಗಿ ವರ್ಧಿಸುವುದರಿಂದ 21 ನೇ ಶತಮಾನದ ಜಾಗತಿಕ ಆರ್ಥಿಕ ನಷ್ಟವು 84 ಟ್ರಿಲಿಯನ್ ಡಾಲರ್ ಆಗಿರುತ್ತದೆ. ಇಂಗಾಲದ ಹೊರಸೂಸುವಿಕೆಯನ್ನು ಕಡಿಮೆ ಮಾಡಲು ವಿಶ್ವ ನಾಯಕರ ಪ್ರಸ್ತುತ ಪ್ರತಿಜ್ಞೆಗಳು ಕಾರ್ಯರೂಪಕ್ಕೆ ಬಂದರೂ ಸಹ ಇಷ್ಟೊಂದು ಪ್ರಮಾಣದ ಹಾನಿ ಸಂಭವಿಸಲಿದೆ.
2023 ರಲ್ಲಿ ಕಾಣಿಸಿಕೊಳ್ಳಬಹುದಾದ ಸಂಭಾವ್ಯ ಎಲ್ ನಿನೋ ಮಾತ್ರವೇ ಜಾಗತಿಕ ಆರ್ಥಿಕತೆಯನ್ನು 2029 ರ ವೇಳೆಗೆ 3 ಟ್ರಿಲಿಯನ್ ಡಾಲರ್ಗಳಷ್ಟು ಹಿಮ್ಮೆಟ್ಟಿಸಬಹುದು ಎಂದು ಊಹಿಸಲಾಗಿದೆ. "ನಮ್ಮ ಯೋಗಕ್ಷೇಮವು ನಮ್ಮ ಜಾಗತಿಕ ಆರ್ಥಿಕತೆಯನ್ನು ಅವಲಂಬಿಸಿದೆ ಮತ್ತು ನಮ್ಮ ಜಾಗತಿಕ ಆರ್ಥಿಕತೆಯು ಹವಾಮಾನದೊಂದಿಗೆ ಸಂಬಂಧ ಹೊಂದಿದೆ. ಹವಾಮಾನ ಬದಲಾವಣೆ ಎಷ್ಟು ದುಬಾರಿಯಾಗಬಹುದು ಎನ್ನುವುದಕ್ಕಿಂತ ಹವಾಮಾನದಲ್ಲಿನ ಏರಿಳಿತ ಎಷ್ಟು ದುಬಾರಿಯಾಗಬಹುದು ಎಂಬುದನ್ನು ಯೋಚಿಸಬೇಕಾಗುತ್ತದೆ ಎಂದು ಭೌಗೋಳಿಕ ಸಹಾಯಕ ಪ್ರಾಧ್ಯಾಪಕ ಮ್ಯಾನ್ಕಿನ್ ಹೇಳಿದರು.
ಇದನ್ನೂ ಓದಿ : ಇನ್ಮುಂದೆ ಯೂಟ್ಯೂಬ್ ಜಾಹೀರಾತು ಸ್ಕಿಪ್ ಮಾಡಲಾಗದು: ಯಾಕೆ ಗೊತ್ತಾ?
