ವಾಷಿಂಗ್ಟನ್: ಅಮೆರಿಕದಲ್ಲಿ ತನ್ನ ಎರಡು ಮಾದರಿಯ ಆ್ಯಪಲ್ ವಾಚ್ ಮಾರಾಟವನ್ನು ನಿಷೇಧಿಸುವ ಆದೇಶ ಜಾರಿಯಾಗದಂತೆ ಮಾಡುವ ಆ್ಯಪಲ್ನ ಪ್ರಯತ್ನಗಳು ವಿಫಲವಾಗಿವೆ. ಆದಾಗ್ಯೂ ಕೊನೆ ಕ್ಷಣದಲ್ಲಿ ಶ್ವೇತ ಭವನವೇನಾದರೂ ಮಧ್ಯಸ್ಥಿಕೆ ವಹಿಸಿದಲ್ಲಿ ಆ್ಯಪಲ್ ವಾಚ್ಗಳ ಮೇಲಿನ ನಿರ್ಬಂಧ ಹಿಂತೆಗೆಯಬಹುದು.
ಈ ವರ್ಷ ಬಿಡುಗಡೆಯಾದ ಎರಡು ಆ್ಯಪಲ್ ವಾಚ್ ಮಾದರಿಗಳಾದ ಆ್ಯಪಲ್ ವಾಚ್ ಸೀರಿಸ್ 9 ಮತ್ತು ಆಪಲ್ ವಾಚ್ ಅಲ್ಟ್ರಾ 2 ಅನ್ನು ಗುರುವಾರದಿಂದ ತನ್ನ ವೆಬ್ಸೈಟ್ನಲ್ಲಿ ಮತ್ತು ಭಾನುವಾರದ ನಂತರ ಆ್ಯಪಲ್ ಮಳಿಗೆಗಳಲ್ಲಿ ಮಾರಾಟ ಮಾಡುವುದನ್ನು ನಿಲ್ಲಿಸುವುದಾಗಿ ಆ್ಯಪಲ್ ಈ ವಾರದ ಆರಂಭದಲ್ಲಿ ತಿಳಿಸಿತ್ತು. ಆದರೆ, ಅದಕ್ಕೂ ಹಳೆಯ ಮಾದರಿಯ ವಾಚ್ಗಳ ಮಾರಾಟವನ್ನು ಕಂಪನಿ ಮುಂದುವರಿಸಲಿದೆ.
ಆ್ಯಪಲ್ ವಾಚ್ನಲ್ಲಿರುವ ಬ್ಲಡ್ ಆಕ್ಸಿಜನ್ ಸೆನ್ಸರ್ ತಂತ್ರಜ್ಞಾನವು ಆಸ್ಪತ್ರೆಗಳಿಗೆ ವೈದ್ಯಕೀಯ ಸಲಕರಣೆ ತಯಾರಿಸುವ ಕಂಪನಿಯಾದ ಮಾಸಿಮೊದ ಕಾಪಿರೈಟ್ ಉಲ್ಲಂಘನೆಯಾಗಿದೆ ಎಂದು ಇಂಟರ್ ನ್ಯಾಷನಲ್ ಟ್ರೇಡ್ ಕಮಿಷನ್ (ಐಟಿಸಿ) ಆದೇಶಿಸಿದೆ. ಹೀಗಾಗಿ ಅಮೆರಿಕದಲ್ಲಿ ಈ ತಂತ್ರಜ್ಞಾನ ಹೊಂದಿರುವ ಆ್ಯಪಲ್ ವಾಚ್ಗಳ ಮಾರಾಟವನ್ನು ನಿರ್ಬಂಧಿಸಲಾಗುತ್ತಿದೆ.
ಆದೇಶ ಜಾರಿಯಾದಲ್ಲಿ ಮಾರಾಟ ಮಾಡದಂತಹ ಸನ್ನಿವೇಶ: ಈ ಆದೇಶ ಜಾರಿಯಾದಲ್ಲಿ ವರ್ಷಾಂತ್ಯದ ಮಾರಾಟ ಸಮಯದಲ್ಲಿಯೇ ಆ್ಯಪಲ್ ತನ್ನ ಅತ್ಯಂತ ಜನಪ್ರಿಯ ಸಾಧನಗಳನ್ನು ಮಾರಾಟ ಮಾಡಲಾಗದಂಥ ಸನ್ನಿವೇಶ ಎದುರಿಸಲಿದೆ. ಆದರೆ, ಇದಕ್ಕೂ ಮುನ್ನ ಆಮದು ಮಾಡಿಕೊಳ್ಳಲಾದ ಈ ವಾಚ್ಗಳು ಚಿಲ್ಲರೆ ಮಾರಾಟಗಾರರ ಬಳಿ ಇದ್ದರೆ ಅವನ್ನು ಮಾತ್ರ ಮಾರಾಟ ಮಾಡಬಹುದು.
ಕಂಪನಿಯು ನಿರ್ದಿಷ್ಟ ವಾಚ್ಗಳ ಮಾರಾಟವನ್ನು ಸ್ಥಗಿತಗೊಳಿಸುವ ಯೋಜನೆಯನ್ನು ಸೋಮವಾರ ಘೋಷಿಸಿದಾಗಿನಿಂದ ಆ್ಯಪಲ್ ಷೇರು ಶೇ 1ರಷ್ಟು ಮೌಲ್ಯ ಕಳೆದುಕೊಂಡಿವೆ. ವಾಚ್ ಮಾರಾಟ ನಿಷೇಧ ಆದೇಶವನ್ನು ಅಧ್ಯಕ್ಷ ಜೋ ಬೈಡನ್ ತಡೆಹಿಡಿಯಬಹುದು. ಆದರೆ, ಅಂಥ ಯಾವ ಸಂಕೇತವನ್ನು ಅವರು ಈವರೆಗೆ ನೀಡಿಲ್ಲ.
’ಗಡುವು ಪರಿಶೀಲಿಸುತ್ತಿದ್ದೇವೆ’- ಶ್ವೇತಭವನ: "ನಾವು ಈ ಪ್ರಕರಣ ಮತ್ತು ಡಿಸೆಂಬರ್ 25 ರ ಅದರ ಗಡುವನ್ನು ಪರಿಶೀಲನೆ ಮಾಡುತ್ತಿದ್ದೇವೆ" ಎಂದು ಶ್ವೇತಭವನದ ಪತ್ರಿಕಾ ಕಾರ್ಯದರ್ಶಿ ಕರಿನ್ ಜೀನ್ ಪಿಯರೆ ಮಂಗಳವಾರ ಸುದ್ದಿಗಾರರಿಗೆ ತಿಳಿಸಿದರು. ಆ್ಯಪಲ್ ಕಂಪನಿಯು ತನ್ನ ಕಾಪಿರೈಟ್ ನಿಯಮ ಉಲ್ಲಂಘಿಸಿದ್ದು ಮಾತ್ರವಲ್ಲದೆ, ಸ್ವಾಧೀನಪಡಿಸಿಕೊಳ್ಳುವಿಕೆ ಮತ್ತು ಪಾಲುದಾರಿಕೆ ಏರ್ಪಡಿಸುವ ಬಗ್ಗೆ ಕಂಪನಿಯ ಸಿಬ್ಬಂದಿಯೊಂದಿಗೆ ಮಾತುಕತೆ ನಡೆಸಿ ಸಿಬ್ಬಂದಿಯ ದಾರಿ ತಪ್ಪಿಸಿದೆ ಎಂದು ಮಾಸಿಮೊ ಸಿಇಒ ಜೋ ಕಿಯಾನಿ ಆರೋಪಿಸಿದ್ದಾರೆ.
ಇದನ್ನೂ ಓದಿ : ಚಂದ್ರಯಾನ-3 ಯಶಸ್ವಿ, ಸೂರ್ಯನತ್ತ ಪಯಣ; 2023ರಲ್ಲಿ ಇಸ್ರೋ ಅಪ್ರತಿಮ ಸಾಧನೆ
