ತಾರ್ಕಿಕವಾಗಿ ಯೋಚಿಸದ ಚಾಟ್​ಜಿಪಿಟಿ ಅನ್ಯಗ್ರಹದ ಬುದ್ಧಿಮತ್ತೆಯಂತಿದೆ: ಅಮೇರಿಕನ್ ಉದ್ಯಮಿ ರೋಸ್‌ಡೇಲ್

ಚಾಟ್​ಜಿಪಿಟಿ ಎಂಬುದು ಒಂದು ರೀತಿಯ ಅನ್ಯಗ್ರಹದ ಬುದ್ಧಿವಂತಿಕೆಯಂತಿದೆ. ಆದರೆ ಇದು ಮಾನವರಂತೆ ತಾರ್ಕಿಕವಾಗಿ ಯೋಚಿಸಲಾರದು ಎಂದು ಅಮೇರಿಕನ್ ಉದ್ಯಮಿ ಫಿಲಿಪ್ ರೋಸ್‌ಡೇಲ್ ಹೇಳಿದ್ದಾರೆ.

ಸ್ಯಾನ್ ಫ್ರಾನ್ಸಿಸ್ಕೊ : ಚಾಟ್‌ಜಿಪಿಟಿಯಂತಹ ಜನರೇಟಿವ್ ಕೃತಕ ಬುದ್ಧಿಮತ್ತೆ (ಎಐ) ಸಾಧನಗಳು ಅತಿಮಾನುಷ ಕಾರ್ಯಗಳನ್ನು (superhuman tasks) ನಿರ್ವಹಿಸಬಲ್ಲ ಅನ್ಯಲೋಕದ ಬುದ್ಧಿವಂತಿಕೆಯಂತಿದೆ, ಆದರೆ ಇದರಲ್ಲಿ ಮಾನವನಂತೆ ತಾರ್ಕಿಕವಾಗಿ ಯೋಚಿಸುವ ಕೊರತೆಯಿದೆ ಎಂದು ತಂತ್ರಜ್ಞಾನ ಕಂಪನಿ ಲಿಂಡೆನ್ ಲ್ಯಾಬ್ ಅನ್ನು ಸ್ಥಾಪಿಸಿದ ಅಮೇರಿಕನ್ ಉದ್ಯಮಿ ಫಿಲಿಪ್ ರೋಸ್‌ಡೇಲ್ ಹೇಳಿದ್ದಾರೆ. ಇವರು ಸೆಕೆಂಡ್ ಲೈಫ್‌ನ ಡೆವಲಪರ್ ಎಂದು ಪ್ರಸಿದ್ಧರಾಗಿದ್ದಾರೆ. ಪ್ರಸ್ತುತ ಇರುವ ಜನರೇಟಿವ್ ಎಐ ಸ್ಥಿತಿಯನ್ನು ಇಂಟರ್ನೆಟ್‌ನ ಆರಂಭಿಕ ದಿನಗಳಿಗೆ ರೋಸ್‌ಡೇಲ್ ಹೋಲಿಸಿದ್ದಾರೆ. ಆಗ ಇಂಟರ್ನೆಟ್ ಬಗ್ಗೆ ಸಾಕಷ್ಟು ಉತ್ಸಾಹ ಹಾಗೂ ಮುಂದೇನಾಗಲಿದೆ ಎಂಬ ಪ್ರಶ್ನೆಗಳು ಎದುರಾಗಿದ್ದವು. ಸದ್ಯ ಚಾಟ್​ಜಿಪಿಟಿ ಸ್ಥಿತಿ ಹಾಗೆಯೇ ಇದೆ ಎಂದು ಅವರು ತಿಳಿಸಿದ್ದಾರೆ.

ಅದ್ಭುತ ಸಾಮರ್ಥ್ಯಗಳ ಹೊರತಾಗಿಯೂ, ಪ್ರಸ್ತುತ AI ಮಾದರಿಗಳು ಮೆಮೊರಿಯನ್ನು ಓದುವ ಮತ್ತು ಬರೆಯುವ ಕೆಲಸಕ್ಕೆ ಸೀಮಿತವಾಗಿವೆ. ಹೀಗಾಗಿ ಇವು ಒಂದು ರೀತಿಯಲ್ಲಿ ಜೊಂಬಿ AI (ಜೊಂಬಿ - ಅನ್ಯಗ್ರಹದ ಜೀವಿಗಳು) ಗಳಾಗಿವೆ. ಇವು ಮಾನವರಂತೆ ಅರ್ಥ ಮಾಡಿಕೊಳ್ಳಲು ಮತ್ತು ತರ್ಕಿಸಲು ಸಾಧ್ಯವಿಲ್ಲವಾಗಿವೆ. ಇದಲ್ಲದೆ, ಸಾಫ್ಟ್‌ವೇರ್ ಕೋಡ್ ಬರೆಯುವ AI ಸಾಮರ್ಥ್ಯವು ನಿಜವಾಗಿಯೂ ಉತ್ತಮವಾಗಿದೆ. ಇದು ಪ್ರೋಗ್ರಾಮರ್‌ಗಳ ಸಮಯವನ್ನು ಉಳಿಸುತ್ತದೆ ಎಂದು ಎಂದು ಅವರು ಹೇಳಿದರು.

ಆದಾಗ್ಯೂ ಕಾಪಿರೈಟಿಂಗ್ ಬರೆಯುವುದು, ಚಿತ್ರ ಬಿಡಿಸುವುದು ಮತ್ತು ಹೊಸ ಒಳನೋಟಗಳನ್ನು ಒದಗಿಸುವಂತಹ ಸೃಜನಾತ್ಮಕ ಕಾರ್ಯಗಳನ್ನು ನಿರ್ವಹಿಸಲು AI ಸಮರ್ಥವಾಗಿದೆ. ನಾವು ಅಂತಿಮವಾಗಿ ಸಾಕಷ್ಟು ಲೆಕ್ಕಾಚಾರಗಳನ್ನು ಮಾಡುವ ಅವಕಾಶಗಳನ್ನು ಹೊಂದಿದ್ದೇವೆ. ಇದರಿಂದ ಹಲವಾರು ಹೊಸ ಅವಕಾಶಗಳು ಸೃಷ್ಟಿಯಾಗುತ್ತಿವೆ. ಆದರೆ ಚಾಟ್ ಜಿಪಿಟಿಯ​ ಅನೇಕ ಪ್ರಯೋಜನಗಳ ಹೊರತಾಗಿಯೂ, ಸಂಭವನೀಯ ಅಪಾಯವೂ ಇದೆ ಎಂದು ಎಂದು ರೋಸ್​ಡೇಲ್​ ತಿಳಿಸಿದರು.

AI ಇದು ವಿಶ್ವದಲ್ಲಿ ಸಂಪತ್ತಿನ ಅಸಮಾನತೆಯನ್ನು ಹೆಚ್ಚಿಸಬಹುದು. ಹೀಗಾಗಿ ಆರಂಭದಲ್ಲಿ ಇಂಟರ್ನೆಟ್ ಬಂದಾಗ ಅದು ಎಲ್ಲರಿಗೂ ಲಭ್ಯವಾದ ರೀತಿಯಲ್ಲೇ ಇದೂ ಸಹ ಎಲ್ಲರಿಗೂ ಲಭ್ಯವಾಗುವಂತೆ ಮಾಡಬೇಕಿದೆ ಎಂಬುದು ರೋಸ್​ಡೇಲ್ ಅವರ ಅಭಿಪ್ರಾಯವಾಗಿದೆ. ಅಸಮಾನತೆ ಹಾಗೂ ಉಳ್ಳವರು ಮತ್ತು ಇಲ್ಲದವರ ನಡುವಿನ ವಿಭಜನೆಯನ್ನು ಹೆಚ್ಚಿಸುವ ಅಪಾಯಗಳನ್ನು ಪರಿಹರಿಸುವ ಅಗತ್ಯವನ್ನು ಅವರು ಒತ್ತಿ ಹೇಳಿದರು. ಭವಿಷ್ಯದಲ್ಲಿ, AI ಯಾವ ರೀತಿ ಬೆಳವಣಿಗೆಯಾಗಲಿದೆ ಎಂಬುದನ್ನು ಈಗಲೇ ಊಹಿಸಲಾಗದು. ಆದರೆ ತಂತ್ರಜ್ಞಾನವು ಹೊಸ ಮಾದರಿಗಳನ್ನು ಕಂಡುಕೊಳ್ಳಲು ಮತ್ತು ಸೂಪರ್ ಹ್ಯೂಮನ್ ಕಾರ್ಯಕ್ಷಮತೆಯನ್ನು ಸಾಧಿಸುವತ್ತ ಮುಂದುವರಿಯುತ್ತದೆ ಎಂದು ಅವರು ಭವಿಷ್ಯ ನುಡಿದರು. ಚಾಟ್​ ಜಿಪಿಟಿ ಒಂದು ರೀತಿಯ ವಿಶ್ವಕೋಶ ಅಥವಾ ಸೂಪರ್ ಸರ್ಚ್ ಎಂಜಿನ್ ಆಗಿದೆ. ಇದು ವಾಕ್ಯಗಳನ್ನು ಪೂರ್ತಿಗೊಳಿಸುತ್ತದೆ. ಆದರೆ ಮಾನವರನ್ನು ಹೇಗೆ ಮೀರಿಸುವುದು ಎಂಬುದು ಅದಕ್ಕೆ ಗೊತ್ತಿಲ್ಲ ಎಂದು ರೋಸ್​ಡೇಲ್ ನುಡಿದರು.

ಚಾಟ್​​ಜಿಪಿಟಿ ಎಂಬುದು ಸ್ಯಾನ್ ಫ್ರಾನ್ಸಿಸ್ಕೋ ಮೂಲದ AI ಸಂಶೋಧನಾ ಕಂಪನಿ OpenAI ನಿಂದ ಅಭಿವೃದ್ಧಿಪಡಿಸಲಾದ ಕೃತಕ-ಬುದ್ಧಿವಂತಿಕೆಯ ಚಾಟ್‌ಬಾಟ್ ಆಗಿದೆ. ಇದು ನವೆಂಬರ್ 2022 ರಲ್ಲಿ ಬಿಡುಗಡೆಯಾಯಿತು. ಚಾಟ್‌ಬಾಟ್ ನೀಡುವ ಮಾಹಿತಿ ಯಾವಾಗಲೂ ನಿಖರವಾಗಿರುವುದಿಲ್ಲ. ಅದರ ಮಾಹಿತಿ ಮೂಲಗಳನ್ನು ವಾಸ್ತವವಾಗಿ ಪರಿಶೀಲಿಸಲಾಗುವುದಿಲ್ಲ.

ಇದನ್ನೂ ಓದಿ : ಮಾನವನನ್ನೇ ಮೀರಿಸಲಿದೆ ಕೃತಕ ಬುದ್ಧಿಮತ್ತೆ: ವಿಜ್ಞಾನಿಗಳ ಎಚ್ಚರಿಕೆ