ಕೀವ್ (ಉಕ್ರೇನ್) : ಮಾಸ್ಕೋ ನಿಯಂತ್ರಣದಲ್ಲಿರುವ ದಕ್ಷಿಣ ಉಕ್ರೇನ್‌ನ ಒಂದು ಭಾಗದಲ್ಲಿರುವ ಪ್ರಮುಖ ಅಣೆಕಟ್ಟು ಮತ್ತು ಜಲವಿದ್ಯುತ್ ಕೇಂದ್ರವನ್ನು ರಷ್ಯಾದ ಪಡೆಗಳು ಸ್ಫೋಟಿಸಿರುವುದಾಗಿ ಉಕ್ರೇನ್ ಮಂಗಳವಾರ ಆರೋಪಿಸಿದೆ. ಡ್ಯಾಮ್ ಒಡೆದಿದ್ದರಿಂದ ಅಪಾರ ಪ್ರಮಾಣದ ನೀರು ಹೊರಗೆ ಬರುತ್ತಿದ್ದು, ಇದರಿಂದ ಉಂಟಾಗಬಹುದಾದ ಬೃಹತ್ ಪ್ರವಾಹದಿಂದ ಪರಿಸರ ವಿಕೋಪ ಸಂಭವಿಸಬಹುದು ಎಂದು ಉಕ್ರೇನ್ ಆತಂಕ ವ್ಯಕ್ತಪಡಿಸಿದೆ.
ಯುದ್ಧ ನಿರತ ಎರಡೂ ದೇಶಗಳ ಅಧಿಕಾರಿಗಳು ನದಿಯ ಕೆಳಭಾಗದಲ್ಲಿರುವ ಲಕ್ಷಾಂತರ ನಿವಾಸಿಗಳು ಬೇರೆ ಕಡೆಗೆ ಸ್ಥಲಾಂತರವಾಗುವಂತೆ ಆದೇಶಿಸಿದ್ದಾರೆ. ಡ್ನಿಪ್ರೊ ನದಿಗೆ ಅಡ್ಡಲಾಗಿ ಕಟ್ಟಲಾಗಿರುವ ಕಾಖೋವ್ಕಾ ಅಣೆಕಟ್ಟು ಉಕ್ರೇನಿಯನ್ ಮಿಲಿಟರಿ ದಾಳಿಯಿಂದ ಹಾನಿಗೊಳಗಾಗಿದೆ ಎಂದು ರಷ್ಯಾ ಪ್ರತ್ಯಾರೋಪ ಮಾಡಿದೆ. ಏನೇ ಆದರೂ ಅಣೆಕಟ್ಟೆ ಒಡೆದಿದ್ದರಿಂದ ದೊಡ್ಡ ಪ್ರಮಾಣದ ಪ್ರತಿಕೂಲ ಪರಿಣಾಮಗಳಾಗುವ ಸಾಧ್ಯತೆಗಳಿವೆ.
ನದಿಪಾತ್ರದ ಕೆಳಭಾಗದಲ್ಲಿರುವ ಮನೆಗಳು ಮತ್ತು ವಾಣಿಜ್ಯ ಕಟ್ಟಡಗಳು ಪ್ರವಾಹದಲ್ಲಿ ಕೊಚ್ಚಿ ಹೋಗಬಹುದು, ನದಿ ಪಾತ್ರದ ಮೇಲ್ಭಾಗದಲ್ಲಿನ ಅಂತರ್ಜಲ ಮಟ್ಟ ಕುಸಿಯಬಹುದು ಹಾಗೂ ಇದರಿಂದ ಯುರೋಪಿನ ಅತಿದೊಡ್ಡ ಪರಮಾಣು ಸ್ಥಾವರವನ್ನು ತಂಪಾಗಿಡಲು ಅಗತ್ಯವಾದ ನೀರಿಗೆ ಕೊರತೆಯಾಗಬಹುದು. ಜೊತೆಗೆ ಸದ್ಯ ರಷ್ಯಾ ಅಧಿಕೃತವಾಗಿ ವಶಪಡಿಸಿಕೊಂಡಿರುವ ಪಶ್ಚಿಮ ಕ್ರಿಮಿಯಾದ ಜನರಿಗೆ ಕುಡಿಯುವ ನೀರಿನ ಸಮಸ್ಯೆ ಎದುರಾಗಬಹುದು.
ಸದ್ಯ 16ನೇ ತಿಂಗಳಿಗೆ ಕಾಲಿಟ್ಟಿರುವ ರಷ್ಯಾ ಉಕ್ರೇನ್ ಯುದ್ಧದ ಅವಧಿಯಲ್ಲಿ ಅಣೆಕಟ್ಟೆ ಒಡೆದಿರುವುದು ರಷ್ಯಾಗೆ ಹೊಸ ಸಮಸ್ಯೆಗಳನ್ನು ಸೃಷ್ಟಿಸಬಹುದಾಗಿದೆ. ಈ ಮಧ್ಯೆ ಉಕ್ರೇನಿಯನ್ ಪಡೆಗಳು ಉಕ್ರೇನ್‌ನ ಪೂರ್ವ ಮತ್ತು ದಕ್ಷಿಣದಲ್ಲಿ 1,000 ಕಿಲೋಮೀಟರ್‌ಗಿಂತಲೂ ಹೆಚ್ಚು ಮುಂಚೂಣಿಯಲ್ಲಿರುವ ಪ್ರದೇಶಗಳಲ್ಲಿ ದೀರ್ಘ ನಿರೀಕ್ಷಿತ ಪ್ರತಿದಾಳಿಯೊಂದಿಗೆ ಮುಂದುವರಿಯುತ್ತಿರುವುದು ವ್ಯಾಪಕವಾಗಿ ಕಂಡು ಬರುತ್ತಿದೆ.
ಘಟನೆಯ ಬಗ್ಗೆ ಟೆಲಿಗ್ರಾಮ್ ಆ್ಯಪ್ನಲ್ಲಿ ಹೇಳಿಕೆ ನೀಡಿರುವ ಉಕ್ರೇನ್‌ನ ಪರಮಾಣು ನಿರ್ವಹಣಾ ಸಂಸ್ಥೆ ಎನರ್ಗೊ ಆಟಮ್, ಅಣೆಕಟ್ಟನ್ನು ಸ್ಫೋಟಿಸಿರುವುದು ಯುರೋಪಿನ ಅತಿದೊಡ್ಡ ಜಪೋರಿಜಿಯಾ ಪರಮಾಣು ವಿದ್ಯುತ್ ಸ್ಥಾವರದ ಮೇಲೆ ಪ್ರತಿಕೂಲ ಪರಿಣಾಮಗಳನ್ನು ಉಂಟುಮಾಡಬಹುದು. ಆದರೆ ಸದ್ಯಕ್ಕೆ ಪರಿಸ್ಥಿತಿ ನಿಯಂತ್ರಣದಲ್ಲಿದೆ ಎಂದು ಹೇಳಿದೆ. ಇನ್ನು ಈ ಬಗ್ಗೆ ವಿಶ್ವಸಂಸ್ಥೆಯ ಇಂಟರ್ ನ್ಯಾಷನಲ್ ಅಟಾಮಿಕ್ ಎನರ್ಜಿ ಏಜೆನ್ಸಿ ಟ್ವಿಟರ್ನಲ್ಲಿ ಮಾಹಿತಿ ನೀಡಿದ್ದು, ತನ್ನ ತಜ್ಞರು ಸ್ಥಾವರದಲ್ಲಿನ ಪರಿಸ್ಥಿತಿಯನ್ನು ನಿಕಟವಾಗಿ ಗಮನಿಸುತ್ತಿದ್ದಾರೆ ಮತ್ತು ಆ ಪ್ರದೇಶದಲ್ಲಿ ತಕ್ಷಣದಲ್ಲಿ ಯಾವುದೇ ಪರಮಾಣು ವಿಕಿರಣದ ಅಪಾಯವಿಲ್ಲ ಎಂದು ತಿಳಿಸಿದೆ.
ಅಣೆಕಟ್ಟು ಒಡೆದಿದ್ದರಿಂದ 18 ಮಿಲಿಯನ್ ಕ್ಯೂಬಿಕ್ ಮೀಟರ್ (4.8 ಬಿಲಿಯನ್ ಗ್ಯಾಲನ್) ನೀರು ಹೊರಬಂದಿದ್ದು, ಲಕ್ಷಾಂತರ ಜನ ವಾಸಿಸುವ ಖರ್ಸನ್ ಮತ್ತು ಇನ್ನೂ ಹತ್ತಾರು ಪ್ರದೇಶಗಳಿಗೆ ಪ್ರವಾಹವನ್ನು ಉಂಟುಮಾಡಬಹುದು ಎಂದು ಉಕ್ರೇನಿಯನ್ ಅಧಿಕಾರಿಗಳು ಎಚ್ಚರಿಸಿದ್ದಾರೆ. ಸುಮಾರು 100 ಕ್ಕೂ ಹೆಚ್ಚು ಹಳ್ಳಿಗಳು ಮತ್ತು ಪಟ್ಟಣಗಳು ಪ್ರವಾಹಕ್ಕೆ ಒಳಗಾಗುತ್ತವೆ ಎಂದು ಉಕ್ರೇನಿಯನ್ ಸರ್ಕಾರೇತರ ಸಂಸ್ಥೆ ಅಂದಾಜಿಸಿದೆ.
ಒಡೆದಿರುವ ಅಣೆಕಟ್ಟೆಯಲ್ಲಿ 5 ರಿಂದ 7 ದಿನಗಳ ನಂತರವೇ ನೀರಿನ ಮಟ್ಟವು ಕುಸಿಯಲು ಪ್ರಾರಂಭಿಸುತ್ತದೆ ಎಂದು ಅದು ಲೆಕ್ಕಾಚಾರ ಮಾಡಿದೆ. ಅಣೆಕಟ್ಟು ಸಂಪೂರ್ಣವಾಗಿ ಕುಸಿತವಾದಲ್ಲಿ ನದಿಯ ಎಡದಂಡೆಯ ಹೆಚ್ಚಿನ ಭಾಗ ಕೊಚ್ಚಿಕೊಂಡು ಹೋಗಲಿದೆ. ಜಲಾಶಯದಲ್ಲಿನ ನೀರಿನ ಮಟ್ಟ ಕುಸಿತದಿಂದ ಪರಮಾಣು ಸ್ಥಾವರವನ್ನು ತಂಪಾಗಿಸಲು ಅಗತ್ಯವಾಗಿ ಬೇಕಾದ ನೀರಿನ ಮೂಲ ಬತ್ತಿ ಹೋಗಲಿದೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ : ಡಿಸೆಂಬರ್ಗೆ ಬಿಎಸ್‌ಇ ಸೆನ್ಸೆಕ್ಸ್ 68,500 ಅಂಶಕ್ಕೇರುವ ಸಾಧ್ಯತೆ: ಮಾರ್ಗನ್ ಸ್ಟಾನ್ಲಿ ಅಂದಾಜು
