ಕಾಬೂಲ್(ಅಫ್ಘಾನಿಸ್ತಾನ): ಮಹಿಳೆಯರ ಮೇಲಿನ ನಿಷೇಧಗಳನ್ನು ತಾಲಿಬಾನ್ ಸರ್ಕಾರ ಮುಂದುವರಿಸಿದೆ. ಹಿಜಾಬ್ ಸರಿಯಾಗಿ ಧರಿಸುತ್ತಿಲ್ಲ ಎಂಬ ಕಾರಣಕ್ಕಾಗಿ ಸ್ಥಳೀಯ ಮತ್ತು ಅಂತಾರಾಷ್ಟ್ರೀಯ ಸರ್ಕಾರೇತರ ಸಂಸ್ಥೆಗಳಲ್ಲಿ(ಎನ್ಜಿಒ) ಮಹಿಳೆಯರು ಕೆಲಸ ಮಾಡುವುದು, ಮಸೀದಿಗಳಲ್ಲಿ ಧಾರ್ಮಿಕ ಬೋಧನೆಗಳಲ್ಲಿ ಭಾಗಿಯಾಗುವುದನ್ನು ನಿಷೇಧಿಸಿದೆ. ಶನಿವಾರ ತಾಲಿಬಾನ್ ಸರ್ಕಾರ ಈ ಆದೇಶ ಹೊರಡಿಸಿದ್ದು, ಆಕ್ರೋಶಕ್ಕೆ ಕಾರಣವಾಗಿದೆ.
ಮಹಿಳೆಯರಿಗೆ ಮೊನ್ನೆಯಷ್ಟೇ ಉನ್ನತ ಶಿಕ್ಷಣ ಪಡೆಯುವುದನ್ನು ನಿಷೇಧಿಸಿದ ಕೆಲವೇ ದಿನಗಳಲ್ಲಿ ಮತ್ತೊಂದು ನಿರ್ಬಂಧದ ಆದೇಶ ಹೊರಡಿಸಲಾಗಿದೆ. ಎನ್ಜಿಒಗಳಲ್ಲಿ ಕೆಲಸದ ವೇಳೆ ಮಹಿಳೆಯರು ಹಿಜಾಬ್ ಧರಿಸುವ ನಿಯಮವನ್ನು ಸರಿಯಾಗಿ ಪಾಲಿಸುತ್ತಿಲ್ಲ ಎಂಬ ಏಕೈಕ ಕಾರಣಕ್ಕಾಗಿ ಮಹಿಳೆಯರು ಕೆಲಸ ಮಾಡುವುದನ್ನೇ ತಡೆಯಲಾಗಿದೆ. ಇದು ಅಫ್ಘನ್ ಮಹಿಳೆಯರಿಗೆ ಮಾತ್ರವೋ ಅಥವಾ ಎಲ್ಲ ಮಹಿಳೆಯರಿಗೂ ಅನ್ವಯಿಸುತ್ತದೆಯೋ ಎಂಬುದು ಸ್ಪಷ್ಟವಾಗಿಲ್ಲ.
ಪರವಾನಗಿ ನಿಷೇಧ ಎಚ್ಚರಿಕೆ: ಹಣಕಾಸು ಸಚಿವ ಮೊಹಮ್ಮದ್ ಹನೀಫ್ ಎಲ್ಲ ಎನ್ಜಿಒಗಳಿಗೆ ಈ ಬಗ್ಗೆ ಪತ್ರ ಬರೆದಿದ್ದು, ಆಯಾ ಸಂಸ್ಥೆಗಳಲ್ಲಿ ಮಹಿಳೆಯರನ್ನು ಕೆಲಸಕ್ಕೆ ನಿಯೋಜಿಸಿಕೊಳ್ಳಬಾರದು. ಇದು ಧಾರ್ಮಿಕ ಕಟ್ಟಳೆಯಾಗಿದೆ. ನಿಯಮ ಮೀರಿ ಯಾವುದೇ ಸಂಸ್ಥೆ ಮಹಿಳಾ ಸಿಬ್ಬಂದಿಯನ್ನು ಹೊಂದಿದಲ್ಲಿ ಅಂತಹ ಸಂಸ್ಥೆಯ ಪರವಾನಗಿಯನ್ನು ರದ್ದುಗೊಳಿಸಲಾಗುವುದು ಎಂದು ಎಚ್ಚರಿಕೆ ನೀಡಿದ್ದಾರೆ.
ಮಹಿಳೆಯರ ಮೇಲೆ ನಿಯಮಗಳ ಸಂಕೋಲೆ: ತಾಲಿಬಾನಿಗಳು ಅಧಿಕಾರದ ಚುಕ್ಕಾಣಿ ಹಿಡಿದ ನಂತರ ಮಹಿಳೆಯರ ಮೇಲೆ ನಿರಂತರವಾಗಿ ಹಲವಾರು ನಿರ್ಬಂಧಗಳನ್ನು ವಿಧಿಸುತ್ತಾ ಬರುತ್ತಿದ್ದಾರೆ. ಮೊದಮೊದಲು ಎಲ್ಲ ಸ್ವಾತಂತ್ರ್ಯ ನೀಡಲಾಗುವುದು ಎಂಬ ಆಶ್ವಾಸನೆಯ ಮೇಲೆ ಅಧಿಕಾರಕ್ಕೆ ಬಂದ ತಾಲಿಬಾನ್ ಕ್ರಮೇಣ ಮಹಿಳೆಯರನ್ನು ನಿರ್ಬಂಧದ ಕಟ್ಟಳೆಗೆ ದೂಡುತ್ತಾ ಬರುತ್ತಿದೆ.
ಮಹಿಳೆಯರ ಮೇಲೆ ವಿಧಿಸಿದ ನಿರ್ಬಂಧಗಳಿವು..:
- ಸಾರ್ವಜನಿಕ ಪಾರ್ಕ್ಗಳ ಪ್ರವೇಶ ನಿಷೇಧ
- ವಾಹನ ಚಲಾವಣೆ, ಡಿಎಲ್ ನೀಡುವುದು ಬಂದ್
- ಉನ್ನತ ಶಿಕ್ಷಣ ಪಡೆಯುವುದರ ಮೇಲೆ ನಿರ್ಬಂಧ
- ಮಸೀದಿಗಳಲ್ಲಿ ಬೋಧನಾ ತರಗತಿಗಳಿಗೆ ತಡೆ
- ಸಾರ್ವಜನಿಕವಾಗಿ ಬುರ್ಕಾ, ಹಿಜಾಬ್ ಅನ್ನು ಅಡಿಯಿಂದ ಮುಡಿವರೆಗೂ ಧಾರಣೆ
- ಈ ನಿಯಮ ಮೀರಿದರೆ ಆಕೆಯ ಪತಿಗೆ ಶಿಕ್ಷೆಯ ಎಚ್ಚರಿಕೆ
ನಿರ್ಬಂಧಕ್ಕೆ ಮಹಿಳೆಯರು ಏನಂತಾರೆ?: ತಾಲಿಬಾನ್ ಹೇರಿದ ಈ ನಿರ್ಬಂಧಕ್ಕೆ ಮಹಿಳೆಯರು ತೀವ್ರ ಆಕ್ರೊಶ ವ್ಯಕ್ತಪಡಿಸಿದ್ದಾರೆ. 'ಇದೊಂದು ಹೃದಯವಿದ್ರಾವಕ ಘೋಷಣೆಯಾಗಿದೆ. ನಾವು ಕೂಡ ಮನುಷ್ಯರಲ್ಲವೇ, ನಮ್ಮ ಮೇಲೇಕೆ ಈ ಕ್ರೌರ್ಯ ಎಂದು ಲಿಂಗ ಆಧಾರಿತ ದೌರ್ಜನ್ಯದ ಬಗ್ಗೆ ಯುವಜನರಿಗೆ ತಿಳಿಹೇಳುವ ಎನ್‌ಜಿಒದ ಮಲಿಹಾ ನಿಯಾಜೈ ಪ್ರಶ್ನಿಸಿದ್ದಾರೆ.
ಕುಟುಂಬದಲ್ಲಿ ಯುವತಿಯೇ ಜೀವನಾಧಾರವಾಗಿದ್ದರೆ ಅವಳ ಕೆಲಸ ಕಸಿದರೆ ಆ ಕುಟುಂಬದ ಗತಿಯೇನು. ಈ ನಿಯಮದ ನಂತರ ಯುವತಿ ಎನ್ಜಿಒದಲ್ಲಿ ಕೆಲಸ ಮಾಡದಿದ್ದರೆ ಕುಟುಂಬ ಉಳಿಯುವುದಾದರೂ ಹೇಗೆ? ಅಧಿಕಾರಿಗಳು ಈ ಬಗ್ಗೆ ಗಮನ ಹರಿಸಬೇಕು ಎಂದು ಹೇಳಿದ್ದಾರೆ. ನಾರ್ವೇಜಿಯನ್ ನಿರಾಶ್ರಿತರ ಸಂಸ್ಥೆಯ ಮಹಿಳಾ ಸಿಬ್ಬಂದಿಯೊಬ್ಬರು ಈ ನಿರ್ಬಂಧವನ್ನು ಖಂಡಿಸಿದ್ದು, ಇದು ನನ್ನ ಜೀವನದ ಅತಿ ಕೆಟ್ಟ ಕ್ಷಣ. ಉದ್ಯೋಗವು ಬದುಕುವುದರ ಜೊತೆಗೆ ಭದ್ರತೆ ನೀಡುತ್ತದೆ. ಇದೇ ಇಲ್ಲವಾದರೆ ಬದುಕೇ ದುಸ್ತರವಾಗುತ್ತದೆ ಎಂದು ಕಿಡಿಕಾರಿದ್ದಾರೆ.
ವಿಶ್ವಸಂಸ್ಥೆ ಖಂಡನೆ: ಇನ್ನು ತಾಲಿಬಾನ್ನ ಎನ್ಜಿಒ ಕಠಿಣ ನಿಯಮಕ್ಕೆ ವಿಶ್ವಸಂಸ್ಥೆ ಅಸಮಾಧಾನ ವ್ಯಕ್ತಪಡಿಸಿದೆ. ಆದೇಶವನ್ನು ಖಂಡಿಸಿದ್ದು, ತಾಲಿಬಾನ್ ಸರ್ಕಾರದ ಜೊತೆಗೆ ಮಾತನಾಡುವುದಾಗಿ ಹೇಳಿದೆ. ಮಹಿಳೆಯರು ತಮ್ಮ ಭವಿಷ್ಯವನ್ನು ಆಯ್ಕೆ ಮಾಡಿಕೊಳ್ಳುವ ಸ್ವಾತಂತ್ರ್ಯವನ್ನು ಹೊಂದಿದ್ದಾರೆ. ಈ ನಿರ್ಬಂಧ ಅವರ ಹಕ್ಕನ್ನು ಕಸಿದುಕೊಂಡಂತಾಗುತ್ತದೆ. ಸಾಮಾಜಿಕ ಮತ್ತು ರಾಜಕೀಯವಾಗಿ ಅವರನ್ನು ನಿರ್ಲಕ್ಷಿಸುವುದು ದೇಶದ ಅಭಿವೃದ್ಧಿಗೆ ಮಾರಕವಾಗಲಿದೆ ಎಂದು ಹೇಳಿದೆ.
ಉನ್ನತ ಶಿಕ್ಷಣ ನಿಷೇಧ ವಿರುದ್ಧ ಪ್ರತಿಭಟನೆ: ಈಚೆಗಷ್ಟೇ ಉನ್ನತ ಶಿಕ್ಷಣ ಪಡೆಯುವುದನ್ನು ನಿಷೇಧಿಸಿದ ಆದೇಶದ ವಿರುದ್ಧ ಮಹಿಳೆಯರು ರಸ್ತೆಗೆ ಇಳಿದು ಪ್ರತಿಭಟನೆ ನಡೆಸಿದ್ದಾರೆ. ಇದನ್ನು ತಡೆಯಲು ಸರ್ಕಾರ ಮಹಿಳೆಯರ ಮೇಲೆ ಜಲಫಿರಂಗಿ ಬಳಸಿದ್ದಾರೆ. ಕಾಬೂಲ್ನಲ್ಲಿ ಪ್ರಾಂತೀಯ ಗವರ್ನರ್ ನಿವಾಸದ ಮುಂದೆ ಮಹಿಳೆಯರು ಪ್ರತಿಭಟನೆ ನಡೆಸಿದರು. ಶಿಕ್ಷಣ ನಮ್ಮ ಹಕ್ಕಾಗಿದೆ ಎಂದು ಘೋಷಣೆ ಕೂಗಿದರು. ಈ ವೇಳೆ ಪ್ರತಿಭಟನಾನಿರತ ಮಹಿಳೆಯರನ್ನು ಚದುರಿಸಲು ಪೊಲೀಸರು ಜಲಫಿರಂಗಿ ಬಳಸಿದ್ದಾರೆ.
ಮಹಿಳೆಯರು ಇದರಿಂದ ತಪ್ಪಿಸಿಕೊಳ್ಳಲು ದಿಕ್ಕಾಪಾಲಾಗಿ ಓಡುತ್ತಿರುವ ವಿಡಿಯೋ ಕೂಡ ಇದೆ. ಪ್ರತಿಭಟನಾನಿರತ ಮಹಿಳೆಯರ ಮೇಲಿನ ಈ ದೌರ್ಜನ್ಯ 'ಅವಮಾನಕರ'ವಾಗಿದೆ ಎಂದು ವಿಶ್ವಾದ್ಯಂತ ಟೀಕೆ ವ್ಯಕ್ತವಾಗಿದೆ.
ಇದನ್ನೂ ಓದಿ: ಉಗ್ರ ಜವಾಹಿರಿ ಹತ್ಯೆಯ 35 ನಿಮಿಷದ ವಿಡಿಯೋ ಹಂಚಿಕೊಂಡ ಅಲ್ಖೈದಾ ಸಂಘಟನೆ
