ಯುಎಸ್ಎ: ಕೋವಿಡ್ ಸಂದರ್ಭದಲ್ಲಿ ಸಣ್ಣ ಉದ್ಯಮಗಳನ್ನು ಬೆಂಬಲಿಸಲು ಅಮೆರಿಕ ಸರ್ಕಾರವು ನೀಡಿದ್ದ ಸಾಲಗಳಲ್ಲಿ ಭಾರಿ ಅಕ್ರಮ ನಡೆದಿರುವುದಾಗಿ ವರದಿಯಾಗಿದೆ. ಸಣ್ಣ ಉದ್ಯಮಗಳಿಗಾಗಿ ಸುಮಾರು 1.2 ಟ್ರಿಲಿಯನ್ ಡಾಲರ್ ಸಾಲ ಬಿಡುಗಡೆ ಮಾಡಲಾಗಿತ್ತು. ಇದರಲ್ಲಿ ಸುಮಾರು 200 ಬಿಲಿಯನ್ (16 ಲಕ್ಷ ಕೋಟಿ ರೂಪಾಯಿ) ಡಾಲರ್ನಷ್ಟು ಭಾರಿ ಭ್ರಷ್ಟಾಚಾರ ನಡೆದಿದೆ. ವಂಚಕರು ಸುಳ್ಳು ಮಾಹಿತಿಗಳ ಮೂಲಕ ಹಣ ಲೂಟಿ ಮಾಡಿರುವುದಾಗಿ ಸಣ್ಣ ವ್ಯಾಪಾರ ಆಡಳಿತ ಇಲಾಖೆಯ (ಎಸ್ಬಿಎ) ಇನ್ಸ್ಪೆಕ್ಟರ್ ಜನರಲ್ ವರದಿ ನೀಡಿದ್ದಾರೆ.
ಕೋವಿಡ್ ಸಂದರ್ಭದಲ್ಲಿ ಸಣ್ಣ ಉದ್ಯಮಗಳನ್ನು ರಕ್ಷಿಸುವ ಸಲುವಾಗಿ ಸರ್ಕಾರವು 'ಪೇ ಚೆಕ್ ಪ್ರೊಟೆಕ್ಷನ್ ಪ್ರೋಗ್ರಾಂ' (ಪಿಪಿಪಿ) ಮತ್ತು ಎಕಾನೊಮಿಕ್ ಇಂಜುರಿ ಡಿಸಾಸ್ಟರ್ ಲೋನ್ಸ್ (ಇಐಡಿಎಲ್) ಕಾರ್ಯಕ್ರಮಗಳನ್ನು ಪ್ರಾರಂಭಿಸಿತ್ತು. ಈ ಯೋಜನೆಗಳ ಮೂಲಕ 1.2 ಟ್ರಿಲಿಯನ್ ಡಾಲರ್ ಸಾಲವನ್ನು ಸರ್ಕಾರ ಬಿಡುಗಡೆ ಮಾಡಿತ್ತು. ಇವುಗಳಲ್ಲಿ ಕನಿಷ್ಠ ಶೇ 17ರಷ್ಟು ಸಾಲದಲ್ಲಿ ವಂಚನೆ ನಡೆದಿದೆ.
ಪ್ರಮುಖವಾಗಿ, ಎಕಾನೊಮಿಕ್ ಇಂಜುರಿ ಡಿಸಾಸ್ಟರ್ ಲೋನ್ಸ್ ಯೋಜನೆಯಲ್ಲಿ ಶೇ. 33ರಷ್ಟು ಅಕ್ರಮ ನಡೆದಿದ್ದು,136 ಬಿಲಿಯನ್ ಡಾಲರ್ ಅಕ್ರಮ ನಡೆದಿದೆ. ಪೇ ಚೆಕ್ ಪ್ರೊಟೆಕ್ಷನ್ ಪ್ರೋಗ್ರಾಂ ಯೋಜನೆಯಲ್ಲಿ 64 ಬಿಲಿಯನ್ ಡಾಲರ್ಗಳಷ್ಟು ಸಾಲ ಲೆಕ್ಕಕ್ಕೆ ಸಿಕ್ಕಿಲ್ಲ. ಈ ಮೂಲಕ ಒಟ್ಟು 200 ಬಿಲಿಯನ್ ಡಾಲರ್ ಮೋಸ ನಡೆದಿರುವುದಾಗಿ ಹೇಳಿದೆ. ಈ ಯೋಜನೆಗಳ ಅಡಿಯಲ್ಲಿ ಒಟ್ಟು 2.21 ಕೋಟಿ ಜನರಿಗೆ ಸಾಲ ನೀಡಲಾಗಿದ್ದು, ಈ ಪೈಕಿ ಒಟ್ಟು 45 ಲಕ್ಷ ವಂಚಕರು ಸುಳ್ಳು ಮಾಹಿತಿ ನೀಡಿ ಸಾಲ ಪಡೆದಿದ್ದಾರೆ ಎಂದು ಹೇಳಿದೆ.
“ಕೋವಿಡ್ ಸಂದರ್ಭದಲ್ಲಿ, ಸಾಧ್ಯವಾದಷ್ಟು ಬೇಗ ಫಲಾನುಭವಿಗಳಿಗೆ ಹಣ ವರ್ಗಾಯಿಸಲು ಎಸ್ಬಿಎ (ಸಣ್ಣ ವ್ಯಾಪಾರ ಆಡಳಿತ ಇಲಾಖೆ) ನಿಯಮಗಳನ್ನು ಸರಳಗೊಳಿಸಿತ್ತು. ಈ ಮೂಲಕ ನಿಜವಾದ ಫಲಾನುಭವಿಗಳಿಗೆ ಮಾತ್ರ ಹಣ ವರ್ಗಾವಣೆಯಾಗಲಿದೆ ಎಂದು ಭರವಸೆ ವ್ಯಕ್ತಪಡಿಸಿತ್ತು. ಆದರೆ ಆರ್ಥಿಕ ಬಿಕ್ಕಟ್ಟಿನ ಸಮಯದಲ್ಲಿ ಹಣ ಸುಲಭವಾಗಿ ಲಭ್ಯವಾಗುವುದರಿಂದ, ಇದರ ಪ್ರಯೋಜನವನ್ನು ಪಡೆದ ವಂಚಕರು ಈ ಯೋಜನೆಯಡಿ ಹೆಚ್ಚಿನ ಸಂಖ್ಯೆಯಲ್ಲಿ ಹಣವನ್ನು ಪಡೆದಿದ್ದಾರೆ” ಎಂದು ಎಸ್ಬಿಎ ಐಜಿ ಅವರು ತಮ್ಮ ವರದಿಯಲ್ಲಿ ವಿವರಿಸಿದ್ದಾರೆ.
ಈ ಸಂಬಂಧ ತನಿಖೆ ನಡೆಯುತ್ತಿದೆ. ಸುಮಾರು 30 ಬಿಲಿಯನ್ ಡಾಲರ್ಗಳಷ್ಟು ಹಣವನ್ನು ವಶಕ್ಕೆ ಪಡೆಯಲಾಗಿದೆ. ಮೇ ತಿಂಗಳೊಂದರಲ್ಲೇ ಸುಮಾರು 803 ಮಂದಿಯನ್ನು ಬಂಧಿಸಲಾಗಿದ್ದು, 529 ಮಂದಿಗೆ ಶಿಕ್ಷೆ ವಿಧಿಸಲಾಗಿದೆ. ಸಾವಿರಾರು ಪ್ರಕರಣಗಳ ತನಿಖೆ ಮುಂದುವರೆದಿದೆ ಎಂದು ಐಜಿ ಇದೇ ವೇಳೆ ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ : ವಿಶ್ವದಲ್ಲಿಯೇ ಭಾರತ & ಅಮೆರಿಕ ನಡುವಣ ಸ್ನೇಹ ಅತ್ಯಂತ ಪರಿಣಾಮಕಾರಿಯಾಗಿದೆ: ಬೈಡನ್ ಟ್ವೀಟ್
