ಟೆಲ್ ಅವೀವ್(ಇಸ್ರೇಲ್): ಇಸ್ರೇಲ್ ಮತ್ತು ಹಮಾಸ್ ಉಗ್ರ ಸಂಘಟನೆ ಸದ್ಯ ಗಾಜಾದಲ್ಲಿ ಕದನ ವಿರಾಮದ ಅವಧಿಯನ್ನು ಇನ್ನೆರಡು ದಿನಗಳವರೆಗೆ ವಿಸ್ತರಿಸಲು ಒಪ್ಪಿಕೊಂಡಿದೆ. ಉಭಯ ಬಣಗಳ ನಡುವಿನ ಕಳೆದ ನಾಲ್ಕು ದಿನಗಳ ಕದನ ವಿರಾಮ ಸೋಮವಾರ ರಾತ್ರಿ ಮುಗಿದಿತ್ತು. ಕತಾರ್ ದೇಶದ ಮಧ್ಯಸ್ಥಿಕೆಯ ನಂತರ ಇದನ್ನೀಗ ವಿಸ್ತರಿಸಲಾಗಿದೆ.
ಕತಾರ್ ವಿದೇಶಾಂಗ ಸಚಿವಾಲಯದ ವಕ್ತಾರ ಮಜಿದ್ ಅಲ್ ಅನ್ಸಾರಿ ಸೋಮವಾರ ಸಂಜೆ ಗಾಜಾ ಪಟ್ಟಿಯಲ್ಲಿ ಮಾನವೀಯ ಕದನ ವಿರಾಮವನ್ನು ಹೆಚ್ಚುವರಿ ಎರಡು ದಿನಗಳವರೆಗೆ ವಿಸ್ತರಿಸಲು ಒಪ್ಪಂದ ಮಾಡಿಕೊಳ್ಳಲಾಗಿದೆ ಎಂದು ತಿಳಿಸಿದರು. ಎರಡೂ ಕಡೆಯವರ ನಡುವಿನ ನಾಲ್ಕು ದಿನಗಳ ಕದನ ವಿರಾಮದ ಕೊನೆಯ ದಿನದಂದು ಈ ಘೋಷಣೆ ಹೊರಬಿದ್ದಿದೆ. ಇಸ್ರೇಲ್ನೊಂದಿಗೆ ಮಾನವೀಯ ಕದನ ವಿರಾಮವನ್ನು ವಿಸ್ತರಿಸಲು ಕತಾರ್ ಮತ್ತು ಈಜಿಪ್ಟ್ನೊಂದಿಗೆ ಒಪ್ಪಿಕೊಂಡಿರುವುದಾಗಿ ಹಮಾಸ್ ಹೇಳಿದೆ. ಒಪ್ಪಂದದ ನಿಯಮಗಳಲ್ಲಿ ಯಾವುದೇ ಬದಲಾವಣೆ ಇಲ್ಲ. ಈ ಬಾರಿಯೂ ಹಿಂದಿನ ಕದನ ವಿರಾಮದಂತೆಯೇ ಷರತ್ತುಗಳು ಇರಲಿವೆ ಎಂದು ತಿಳಿದುಬಂದಿದೆ.
ಒಪ್ಪಂದವೇನು?: ಇಸ್ರೇಲ್ ಮತ್ತು ಹಮಾಸ್ ನಡುವಿನ ಒಪ್ಪಂದದಂತೆ, ಹಮಾಸ್ 50 ಒತ್ತೆಯಾಳುಗಳನ್ನು ಬಿಡುಗಡೆ ಮಾಡುತ್ತದೆ. ಇದಕ್ಕೆ ಪ್ರತಿಯಾಗಿ ಇಸ್ರೇಲ್ ನಾಲ್ಕು ದಿನಗಳ ಕದನ ವಿರಾಮದೊಂದಿಗೆ 150 ಪ್ಯಾಲೆಸ್ತೀನ್ ಕೈದಿಗಳನ್ನು ಬಿಡುಗಡೆ ಮಾಡಬೇಕಿದೆ. ಈ ಅವಧಿಯ ನಂತರ ಎರಡೂ ಕಡೆಯವರು ಒಪ್ಪಿದರೆ ಹಮಾಸ್ ಪ್ರತಿದಿನ 10 ಒತ್ತೆಯಾಳುಗಳನ್ನು ಬಿಡುಗಡೆಗೊಳಿಸಬೇಕಿದೆ. ಇದಕ್ಕೆ ಪ್ರತಿಯಾಗಿ ಇಸ್ರೇಲ್ ಕದನ ವಿರಾಮವನ್ನು ಒಂದು ದಿನ ವಿಸ್ತರಿಸುವದರೊಂದಿಗೆ 10 ಜನರ ಬದಲಿಗೆ ಮೂರು ಪ್ಯಾಲೆಸ್ತೀನ್ ಕೈದಿಗಳನ್ನು ರಿಲೀಸ್ ಮಾಡಬೇಕು. ಇದೀಗ ಎರಡು ದಿನಗಳ ಕಾಲ ಕದನ ವಿರಾಮ ವಿಸ್ತರಿಸಲಾಗಿದೆ.
ಎಷ್ಟು ಒತ್ತೆಯಾಳುಗಳು ಬಿಡುಗಡೆ?: ಗಾಜಾದಲ್ಲಿ ನಾಲ್ಕು ದಿನಗಳ ಕದನ ವಿರಾಮದ ನಂತರ ಹಮಾಸ್ ಇದುವರೆಗೆ 39 ಇಸ್ರೇಲಿ ಒತ್ತೆಯಾಳುಗಳನ್ನು ಮುಕ್ತಗೊಳಿಸಿದೆ. ಇದರಲ್ಲಿ ಒಬ್ಬ ಅಮೆರಿಕನ್ ಮತ್ತು 17 ಥಾಯ್ಲೆಂಡ್ ಪ್ರಜೆಗಳಿದ್ದಾರೆ. ಇದೇ ಸಮಯದಲ್ಲಿ, ಇಸ್ರೇಲ್ 117 ಪ್ಯಾಲೆಸ್ತೀನ್ ಕೈದಿಗಳನ್ನು ಬಿಡುಗಡೆ ಮಾಡಿದೆ. ಕದನ ವಿರಾಮದ ಮೂರನೇ ದಿನ ಇಸ್ರೇಲ್ 39 ಪ್ಯಾಲೆಸ್ತೀನ್ ಕೈದಿಗಳನ್ನು ಬಿಡುಗಡೆಗೊಳಿಸಿತ್ತು. ಹಮಾಸ್ 13 ಇಸ್ರೇಲಿಗಳನ್ನು ಬಿಡುಗಡೆ ಮಾಡಿದೆ. ಇದರಲ್ಲಿ 4 ವರ್ಷದ ಅನಾಥ ಹೆಣ್ಣು ಮಗು ಕೂಡಾ ಸೇರಿದೆ. ಅಕ್ಟೋಬರ್ 7ರಂದು ಹಮಾಸ್ ದಾಳಿಯಲ್ಲಿ ಮಗುವಿನ ಪೋಷಕರು ಮೃತಪಟ್ಟಿದ್ದರು. ಈ ಮಗುವನ್ನು ಹಮಾಸ್ ಹೋರಾಟಗಾರರು ಆಕೆಯ ನೆರೆ ಮನೆಯಿಂದ ಅಪಹರಿಸಿದ್ದರು. 18 ಮಕ್ಕಳು ಮತ್ತು 43 ಮಹಿಳೆಯರು ಸೇರಿದಂತೆ ಒಟ್ಟು 183 ಜನರು ಇನ್ನೂ ಹಮಾಸ್ ವಶದಲ್ಲಿದ್ದಾರೆ.