ಗಾಜಾ: ಹಮಾಸ್ ಉಗ್ರರ ಅಟ್ಟಹಾಸ ಮತ್ತು ಇಸ್ರೇಲ್ ದಾಳಿಗೆ ನಲುಗಿರುವ ಗಾಜಾ ಪಟ್ಟಿಯ ನಿವಾಸಿಗಳ ಬದುಕು ಶೋಚನೀಯವಾಗಿದೆ. ನೆಲೆ ಹಾಗು ತಮ್ಮವರನ್ನು ಕಳೆದುಕೊಂಡ ಅನೇಕರು ಜೀವ ಉಳಿಸಿಕೊಳ್ಳಲು ಆಶ್ರಯಪೀಡಿತ ಪ್ರದೇಶದಲ್ಲಿ ವಾಸಿಸುತ್ತಿದ್ದಾರೆ. ಯುದ್ಧದಿಂದಾಗಿ ಎಲ್ಲವನ್ನೂ ಕಳೆದುಕೊಂಡಿರುವ ಗಾಜಾದಲ್ಲಿ ಸಾಂಕ್ರಾಮಿಕ ರೋಗಭೀತಿಯೂ ಶುರುವಾಗಿದೆ. ಪ್ಯಾಲೆಸ್ಟೈನ್ ಆರೋಗ್ಯ ಸಚಿವರು ಈ ಬಗ್ಗೆ ಎಚ್ಚರಿಕೆ ನೀಡಿದ್ದಾರೆ. ಇಸ್ರೇಲ್ ನಡೆಸುತ್ತಿರುವ ವೈಮಾನಿಕ ದಾಳಿ ಮತ್ತು ಹಮಾಸ್ ಉಗ್ರರ ನಿಯಂತ್ರಣದ ಈ ಪ್ರದೇಶದಲ್ಲಿ ಸಾಂಕ್ರಾಮಿಕತೆ ಎದುರಾಗಲಿದೆ ಎಂದಿದ್ದಾರೆ.
ಇಸ್ರೇಲ್-ಹಮಾಸ್ ಸಂಘರ್ಷದಿಂದ ಒಂದೇ ದಿನದಲ್ಲಿ 3,150 ಮಂದಿ ರೋಗಿಬಾಧೆಗೆ ಸಿಲುಕಿದ್ದಾರೆ ಎಂದು ವರದಿಯಾಗಿರುವುದಾಗಿ ಸಚಿವರ ವಕ್ತಾರ ಅಶ್ರಫ್ ಅಲ್ ಕ್ವೆಡ್ರಾ ಹೇಳಿದ್ದಾರೆ. ಇದರಲ್ಲಿ ಹೆಚ್ಚು ಹಾನಿಗೆ ಒಳಗಾದವರು ಮಕ್ಕಳು ಎಂದು ಕ್ಸಿನುವಾ ಸುದ್ದಿಸಂಸ್ಥೆ ವರದಿ ಮಾಡಿದೆ. ಯುದ್ಧದಿಂದ ಆಶ್ರಯತಾಣದಲ್ಲಿ ಭಾರಿ ಜನ ಸೇರಿದ್ದಾರೆ. ಅಲ್ಲಿ ಶುದ್ದ ಕುಡಿಯುವ ನೀರಿನ ಲಭ್ಯತೆ ಇಲ್ಲ. ಕಳಪೆ ನೈರ್ಮಲ್ಯದಿಂದಾಗಿ ರೋಗಗಳು ಉಲ್ಬಣವಾಗುತ್ತಿವೆ. ಇದನ್ನು ತಡೆಯುವುದು ಸವಾಲಾಗಿದೆ. ಈ ರೋಗಗಳು ಹರಡುವುದನ್ನು ತಡೆಯಲು ಅಂತರರಾಷ್ಟ್ರೀಯ ಸಮುದಾಯಗಳು ತಕ್ಷಣಕ್ಕೆ ಸಹಾಯ ನೀಡಬೇಕಿದೆ. ಗಾಜಾದಲ್ಲಿ ನೀರು, ವಿದ್ಯುಚ್ಛಕ್ತಿ, ನೈರ್ಮಲ್ಯದಂತಹ ಕನಿಷ್ಠ ಸೌಲಭ್ಯಗಳನ್ನು ಪುನರ್‌ನಿರ್ಮಾಣ ಮಾಡಬೇಕಿದೆ ಎಂದು ಒತ್ತಾಯಿಸಿದ್ದಾರೆ.
ಕುಸಿದ ಆರೋಗ್ಯ ವ್ಯವಸ್ಥೆ: ಯುದ್ಧದಿಂದಾಗಿ ಗಾಜಾ ಪಟ್ಟಿಯಲ್ಲಿ ಆಸ್ಪತ್ರೆ ನಿರ್ವಹಣೆಗೆ ಬೇಕಾದ ವಿದ್ಯುತ್ ಸೌಲಭ್ಯಗಳು ಮತ್ತು ಅಗತ್ಯ ಇಂಧನಗಳು ಕಡಿತಗೊಂಡಿದೆ ಎಂದು ಪ್ಯಾಲೆಸ್ಟೈನ್ ವಕ್ತಾರರು ತಿಳಿಸಿದ್ದಾರೆ. ಇಸ್ರೇಲ್ ದಾಳಿಯಿಂದಾಗಿ ಇಲ್ಲಿಯವರೆಗೆ 65 ವೈದ್ಯಕೀಯ ಸಿಬ್ಬಂದಿ ಸಾವನ್ನಪ್ಪಿದ್ದು, 25 ಅಂಬ್ಯುಲೆನ್ಸ್ ನಾಶವಾಗಿದೆ. ಪ್ಯಾಲೆಸ್ಟೈನ್ ಎನ್‌ಕ್ಲೇವ್‌ನಲ್ಲಿ 12 ಆಸ್ಪತ್ರೆಗಳು ಮತ್ತು 32 ಆರೋಗ್ಯ ಕೇಂದ್ರಗಳನ್ನು ನಿಷ್ಕ್ರಿಯಗೊಳಿಸಲಾಗಿದೆ. ಇಂಧನಗಳು ಈಗಾಗಲೇ ಮುಗಿಯುತ್ತಿವೆ. ಮುಂದಿನ ದಿನದಲ್ಲಿ ಈ ಸೇವೆಗಳು ಮತ್ತಷ್ಟು ದುರ್ಬಲವಾಗಲಿದೆ. 32 ಆರೋಗ್ಯ ಕೇಂದ್ರಗಳಲ್ಲಿ ಇಂಧನ ಸೇರಿದಂತೆ ಅಗತ್ಯ ವಸ್ತುಗಳ ಪೂರೈಕೆಯ ಅಭಾವವಿದೆ ಎಂದು ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ಒದಗಿಸಿದ್ದಾರೆ.
ಅಕ್ಟೋಬರ್ 7ರಂದು ಆರಂಭವಾದ ಯುದ್ದದಿಂದ ಇಲ್ಲಿಯವರೆಗೆ ಗಾಜಾ ಪಟ್ಟಿಯಲ್ಲಿರುವ 5,800 ಪ್ಯಾಲೇಸ್ಟೈನಿಯನ್ನರು ಸಾವನ್ನಪ್ಪಿದ್ದಾರೆ. ಇಸ್ರೇಲ್ನಲ್ಲಿ 1,400 ಮಂದಿ ಅಸುನೀಗಿದ್ದಾರೆ. ಇಸ್ರೇಲ್ ರಾಜಧಾನಿ ಟೆಲ್ ಅವಿವ್‌ ಗಾಜಾಗೆ ನೀರು, ಆಹಾರ ಮತ್ತು ವಿದ್ಯುಚ್ಚಕ್ತಿ ನಿಲ್ಲಿಸಿದ್ದು, ಗಾಜಾ ಪಟ್ಟಿಯಲ್ಲಿ ಬಿಕ್ಕಟ್ಟು ಎದುರಾಗಿದೆ. ಉತ್ತರ ಗಾಜಾದಲ್ಲಿ 1.1 ಮಿಲಿಯನ್ ಮಂದಿ ಸ್ಥಳಾಂತರಗೊಂಡಿದ್ದು ದಕ್ಷಿಣ ಗಾಜಾದಲ್ಲಿರುವ ಅರ್ಧದಷ್ಟು ಪ್ಯಾಲೆಸ್ಟೈನಿಯನ್ನರು ನಿರಾಶ್ರಿತರಾಗಿದ್ದಾರೆ ಎಂದು ವಿಶ್ವಸಂಸ್ಥೆ ತಿಳಿಸಿದೆ. (ಐಎಎನ್ಎಸ್)
ಇದನ್ನೂ ಓದಿ: ಗಾಜಾ ಪಟ್ಟಿಯಲ್ಲಿ ಬಾಂಬ್ ದಾಳಿ ಹೆಚ್ಚಿಸಿದ ಇಸ್ರೇಲ್: ಹಲವರ ಸಾವು, ಕಳವಳ ವ್ಯಕ್ತಪಡಿಸಿದ ಅಮೆರಿಕ
