ಕಾಶ್ಮೀರ ವಿಚಾರದಲ್ಲಿ ಮೌನ: ಆದ್ರೆ, ವ್ಯಾಪಾರ- ರಕ್ಷಣೆಯಲ್ಲಿ ಬಾಂಧವ್ಯ ಮತ್ತಷ್ಟು ಗಟ್ಟಿ

ಭಾರತದ ಧೋರಣೆ ಹಾಗೂ ಅದರ ನೀತಿಗಳ ವಾಸ್ತವ ಅರ್ಥ ಮಾಡಿಕೊಂಡಿರುವ ಸೌದಿ ಅರೇಬಿಯಾ ಮಾತುಕತೆ ವೇಳೆ ಕಾಶ್ಮೀರಕ್ಕೆ ನೀಡಿದ್ದ ವಿಶೇಷ ಸ್ಥಾನಮಾನ ರದ್ದು ಹಾಗೂ ಅಲ್ಲಿನ ಉದ್ವಿಗ್ನ ಪರಿಸ್ಥಿತಿ ಬಗ್ಗೆ ಯಾವುದೇ ಚರ್ಚೆಗೆ ಮುಂದಾಗಿಲ್ಲ. ಯುದ್ಧ ಕಾರ್ಯತಂತ್ರ ಸಮಿತಿ ಪ್ರತಿ ಎರಡು ವರ್ಷಕ್ಕೊಮೆ ಸಭೆ ಸೇರುವ ಬಗ್ಗೆ ಇಂಗಿತ ವ್ಯಕ್ತಪಡಿಸಿದೆ. ವ್ಯಾಪಾರ ವಹಿವಾಟಯ ಹಾಗೂ ಹೂಡಿಕೆಗೆ ಸಂಬಂಧಿಸಿದಂತೆ ವಿಚಾರಗಳ ಹೆಚ್ಚಿನ ಒಲವು ವ್ಯಕ್ತಪಡಿಸಿದೆ.

ರಿಯಾದ್​: ಪ್ರಧಾನಿ ಮೋದಿ ಅವರು ಸೌದಿ ದೊರೆ ಹಾಗೂ ಯುವ ರಾಜನೊಂದಿಗೆ ಉಭಯ ರಾಷ್ಟ್ರಗಳ ಸ್ನೇಹ- ಸಂಬಂಧ ವೃದ್ಧಿಯ ಹಲವು ವಿಷಯಗಳನ್ನು ಚರ್ಚಿಸಿ ಮಂಗಳವಾರ ಭಾರತಕ್ಕೆ ವಾಪಸ್​ ಆಗಿದ್ದಾರೆ. ಆದರೆ, ಈ ಮಹತ್ವದ ಮಾತುಕತೆಯಲ್ಲಿ ಅಪ್ಪಿ- ತಪ್ಪಿಯೂ ಕಾಶ್ಮೀರ ವಿಷಯದ ಕುರಿತು ಚರ್ಚೆಗೆ ಬಂದಿಲ್ಲ.

'ಇದೊಂದು ಭಾರತದ ಆಂತರಿಕ ವಿಷಯವಾಗಿದ್ದು, ಅದರ ಸಾರ್ವಭೌಮತೆಯಲ್ಲಿ ಹಸ್ತಕ್ಷೇಪ ಮಾಡುವುದಿಲ್ಲ ಎಂಬುದು ಸೌದಿಯ ಮೌನದಿಂದಲೇ ಗೊತ್ತಾಗುತ್ತಿದೆ' ಎಂದು ಭಾರತೀಯ ಅಧಿಕಾರಿಗಳ ವಿಶ್ಲೇಷಿಸಿದ್ದಾರೆ.

ಭಾರತದ ವಿದೇಶಾಂಗ ಧೋರಣೆ ಹಾಗೂ ಅದರ ದೇಶಿಯ ನೀತಿಗಳ ವಾಸ್ತವತೆಯನ್ನು ಅರ್ಥ ಮಾಡಿಕೊಂಡಿರುವ ಸೌದಿ, ಮಾತುಕತೆಯ ವೇಳೆ ಕಾಶ್ಮೀರಕ್ಕೆ ನೀಡಿದ್ದ ವಿಶೇಷ ಸ್ಥಾನಮಾನ ರದ್ದು ಹಾಗೂ ಅಲ್ಲಿನ ಉದ್ವಿಗ್ನ ಪರಿಸ್ಥಿತಿಯ ಬಗ್ಗೆ ಮೌನವಾಗಿದೆ. ಇದು ಎರಡೂ ದೇಶಗಳ ನಡುವಣ ಬಾಂಧವ್ಯ ಹಾಗೂ ಭಾರತದ ಸಾರ್ವಭೌಮ್ಯತೆಯನ್ನು ಅದು ಅರ್ಥೈಸಿಕೊಂಡಿದೆ ಎಂದು ಭಾರತೀಯ ಅಧಿಕಾರಿಗಳು ಪ್ರತಿಪಾದಿಸಿದ್ದಾರೆ.

ಮಾತುಕತೆ ಬಳಿಕ ಜಂಟಿ ಹೇಳಿಕೆ ನೀಡಿರುವ ಉಭಯ ರಾಷ್ಟ್ರಗಳ ನಾಯಕರು, ಪ್ರಾದೇಶಿಕ ಹಾಗೂ ಅಂತಾರಾಷ್ಟ್ರೀಯ ವಿಷಯಗಳಲ್ಲಿ ಎರಡೂ ರಾಷ್ಟ್ರಗಳು ಪರಸ್ಪರ ಸಹಕಾರದಿಂದ ಕಾರ್ಯನಿರ್ವಹಿಸುವುದಾಗಿ ಘೋಷಣೆ ಮಾಡಿದ್ದಾರೆ. ಸಾರ್ವಭೌಮ ರಾಷ್ಟ್ರಗಳ ಆಂತರಿಕ ವಿಷಯದಲ್ಲಿ ಯಾವುದೇ ವಿಧದ ಹಸ್ತಕ್ಷೇಪಕ್ಕೆ ಎರಡೂ ರಾಷ್ಟ್ರಗಳು ವಿರೋಧ ಇದೆ ಎಂದು ಹೇಳಿದ್ದಾರೆ. ಇನ್ನು ದಾವೋಸ್ ಇನ್​ ದಿ ಡೆಸರ್ಟ್​ನಲ್ಲಿ ನಡೆದ ಪ್ಯೂಚರ್​​ ಇನ್ವೆಸ್ಟ್​ಮೆಂಟ್​​​ ಇನಿಷಿಯೇಟಿವ್​​​​ ಫೋರಂನಲ್ಲಿ ಮೋದಿ ಅವರೇ ಪ್ರಮುಖ ಭಾಷಣಕಾರರಾಗಿದ್ದರು.

ತೈಲ ಸಮೃದ್ಧಿಯ ಸೌದಿ ಇಂಧನ ಆಧಾರಿತ ಮಾರುಕಟ್ಟೆಯ ಆರ್ಥಿಕತೆಯನ್ನು ನಂಬಿಕೊಂಡಿದೆ. ಕಳೆದ ದಶಕದಿಂದ ಪ್ರವಾಸಿ ಸ್ನೇಹಿ ರಾಷ್ಟ್ರವಾಗಿ ಬದಲಾಗುತ್ತಿದೆ. ಎರಡೂ ರಾಷ್ಟ್ರಗಳು ಕೊಟ್ಟು- ಖರೀದಿಸುವ ವ್ಯಾಪಾರದ ಬಾಂಧವ್ಯ ವೃದ್ಧಿಗೆ ಮುನ್ನಡಿ ಇಟ್ಟಿವೆ. ಉಭಯ ದೇಶಗಳು ಈಗ ವಾಣಿಜ್ಯಾತ್ಮಕ ವ್ಯವಹಾರ ಅಷ್ಟೇ ಅಲ್ಲ ರಕ್ಷಣೆ ಹಾಗೂ ರಕ್ಷಣಾ ಸಂಬಂಧಿತ ಉದ್ಯಮಗಳಲ್ಲೂ ಪರಸ್ಪರ ಸಹಕಾರ ನೀಡಲು ಮುಂದೆ ಬಂದಿವೆ. ಇದಕ್ಕಾಗಿ ಯುದ್ಧ ಕಾರ್ಯತಂತ್ರ ಸಮಿತಿ ರಚನೆ ಮಾಡಿಕೊಂಡಿವೆ. ಈ ವರ್ಷದ ಫೆಬ್ರವರಿಯಲ್ಲಿ ಸೌದಿ ದೊರೆ ನವದೆಹಲಿಗೆ ಭೇಟಿ ನೀಡಿದ್ದಾಗ ಈ ಪ್ರಸ್ತಾವ ಮುಂದಿಟ್ಟಿದ್ದರು. ಅದೀಗ ಕಾರ್ಯರೂಪಕ್ಕೆ ಬಂದಿದೆ.

ಈಗಾಗಲೇ ಸೌದಿ ಅರೇಬಿಯಾ ಇಂಗ್ಲೆಂಡ್​, ಫ್ರಾನ್ಸ್​ ಹಾಗೂ ಚೀನಾದೊಂದಿಗೆ ಯುದ್ಧ ಕಾರ್ಯತಂತ್ರದ ಸಹಕಾರ ಒಪ್ಪಂದ ಮಾಡಿಕೊಂಡಿದೆ. ಈಗ ಭಾರತ ಇಂತಹ ಒಪ್ಪಂದ ಮಾಡಿಕೊಂಡಿರುವ ನಾಲ್ಕನೇ ರಾಷ್ಟ್ರವಾಗಿದೆ. ಎಂಟು ರಾಷ್ಟ್ರಗಳೊಂದಿಗೆ ಇಂತಹ ಸಂಬಂಧ ಹೊಂದಲು ಸೌದಿ ಯುವ ರಾಜ ಮಹಮ್ಮದ್​ ಬಿನ್​ ಸಲ್ಮಾನ್​ ನಿರ್ಧರಿಸಿದ್ದಾರೆ.

ಯದ್ಧ ಕಾರ್ಯತಂತ್ರ ಸಮಿತಿ ಪ್ರತಿ ಎರಡು ವರ್ಷಕ್ಕೊಮೆ ಸಭೆ ಸೇರಿ ರಕ್ಷಣೆಯ ಕುರಿತು ಚರ್ಚಿಸಲಿವೆ. ಇನ್ನು ಪ್ರತಿ ವರ್ಷ ಸಚಿವರ ಮಟ್ಟದ ಸಭೆ ಕೂಡಾ ನಡೆಯಲಿದೆ. ಇನ್ನು ಮತ್ತೊಂದು ಕಡೆ ಆರ್ಥಿಕ ಸಂಬಂಧ ಹಾಗೂ ಹೂಡಿಕೆ ಮೇಲೆ ಎರಡೂ ರಾಷ್ಟ್ರಗಳು ಪ್ರಮುಖ ಆದ್ಯತೆ ನೀಡುತ್ತಿವೆ.

ಹೂಡಿಕೆ, ಆರ್ಥಿಕ ಸಹಕಾರದ ನಂತರ ಉಭಯ ನಾಯಕರು ಹೆಚ್ಚು ಗಮನ ಕೊಟ್ಟಿದ್ದು ಭಯೋತ್ಪಾದನೆ ನಿಗ್ರಹದತ್ತ. ಸೌದಿ ದೊರೆ ಹಾಗೂ ಪ್ರಧಾನಿ ಮೋದಿ ಪ್ರಮುಖವಾಗಿ ಭಯೋತ್ಪಾದನೆ ನಿಗ್ರಹದ ಬಗ್ಗೆ ಕಠಿಣ ನಿರ್ಧಾರ ತೆಗೆದುಕೊಳ್ಳುವ ಅಗತ್ಯವಿದೆ ಎಂದಿದ್ದಾರೆ. ಉಗ್ರ ನೀತಿಗಳು ರಾಷ್ಟ್ರಗಳ ಆಂತರಿಕ ಭದ್ರತೆಗೆ ಮಾರಕವಾಗಿದೆ. ಭಯೋತ್ಪಾದನೆ ನಿಗ್ರಹಕ್ಕೆ ಪರಸ್ಪರ ಸಹಕಾರ ಇರಬೇಕು ಎಂದು ಆಶಿಸಿದ್ದಾರೆ.

ಸೌದಿ ಅರೇಬಿಯಾದ ತೈಲಾಗಾರಗಳನ್ನು ಗುರಿಯಾಗಿಸಿಕೊಂಡು ನಡೆದ ಡ್ರೋನ್​ ದಾಳಿಗೆ ಭಾರತ ಉಗ್ರವಾದ ಖಂಡನೆ ವ್ಯಕ್ತಪಡಿಸಿತು. ಭಾರತಕ್ಕೆ ರಫ್ತಾಗುತ್ತಿರುವ ಇಂಧನದಲ್ಲಿ ಯಾವುದೇ ವ್ಯತ್ಯಾಸ ಆಗುವುದಿಲ್ಲ ಎಂದು ಅದು ಭರವಸೆ ಕೊಟ್ಟಿತ್ತು. ಭಾರತ ಶೇ 18ರಷ್ಟು ಕಚ್ಚಾ ತೈಲವನ್ನ ಅರಬ್​ ಸಂಯುಕ್ತ ರಾಷ್ಟ್ರಗಳಿಂದಲೇ ಆಮದು ಮಾಡಿಕೊಳ್ಳುತ್ತದೆ. ಶೇ 30ರಷ್ಟು ಎಲ್​​​ಪಿಜಿ ಸಹ ಸೌದಿಯಿಂದಲೇ ಆಮದಾಗುತ್ತದೆ. ಇನ್ನು ಇತರ ವಿಷಯಗಳ ಮೇಲೂ ಎರಡೂ ರಾಷ್ಟ್ರಗಳು ಆಸಕ್ತಿ ವ್ಯಕ್ತಪಡಿಸಿವೆ. ಇದೇ ವೇಳೆ ಸೌದಿ ದೊರೆಗೆ ಪ್ರಧಾನಿ ಮೋದಿ ಧನ್ಯವಾದವನ್ನೂ ಸಮರ್ಪಿಸಿದರು.