ವುಹಾನ್(ಚೀನಾ): ಚೀನಾದಲ್ಲಿ ಹುಟ್ಟಿಕೊಂಡು ಅಬ್ಬರಿಸುತ್ತಿರುವ ಕೊರೊನಾ ವೈರಸ್ ಇದೀಗ ವಾರದ ಬಳಿಕ ಮತ್ತೊಮ್ಮೆ ವುಹಾನ್ದಲ್ಲಿ ಕಾಣಿಸಿಕೊಂಡಿದ್ದು, ಹೀಗಾಗಿ ಅಲ್ಲಿರುವ ಎಲ್ಲರಿಗೂ ಕೋವಿಡ್ ಪರೀಕ್ಷೆ ನಡೆಸಲು ವುಹಾನ್ ಸಿಟಿ ಆಡಳಿತ ನಿರ್ಧಾರ ಕೈಗೊಂಡಿದೆ.
ಬರೋಬ್ಬರಿ 76 ದಿನಗಳ ಕಾಲ ಲಾಕ್ಡೌನ್ನಲ್ಲಿದ್ದ ವುಹಾನ್ ಸಿಟಿ ಏಪ್ರಿಲ್ 8ರಂದು ಓಪನ್ ಆಗಿತ್ತು. ಇದಾದ ಬಳಿಕ ಕಳೆದ ಕೆಲ ದಿನಗಳಿಂದ ಅಲ್ಲಿ ಯಾವುದೇ ಕೇಸ್ ಕಾಣಿಸಿಕೊಂಡಿರಲಿಲ್ಲ. ಇದೀಗ ಕೋವಿಡ್ ಹೊಸ ಪ್ರಕರಣ ಕಾಣಿಸಿಕೊಂಡಿದ್ದರಿಂದ ಅಲ್ಲಿನ ಸರ್ಕಾರದ ತಲೆ ಕೆಡಿಸಿದ್ದು, ಹೀಗಾಗಿ ಬರೋಬ್ಬರಿ 11 ಮಿಲಿಯನ್ ಜನರ ಪರೀಕ್ಷೆ ಮಾಡಲು ನಿರ್ಧರಿಸಿದೆ.
ವುಹಾನ್ ಸಿಟಿಯಲ್ಲಿ ಕಂಡು ಬಂದಿದ್ದ ಎಲ್ಲ ಕೋವಿಡ್ ಸೋಂಕಿತರು ಈಗಾಗಲೇ ಗುಣಮುಖರಾಗಿ ಮನೆಗೆ ತೆರಳಿದ್ದರು. ಇದೀಗ ಮತ್ತೊಂದು ಪ್ರಕರಣ ಕಾಣಿಸಿಕೊಂಡಿದ್ದು, ಮತ್ತಷ್ಟು ಆತಂಕ ವೃದ್ಧಿಯಾಗುವಂತೆ ಮಾಡಿದೆ. ಸಿಟಿಯಲ್ಲೇ 3 ಸಾವಿರಕ್ಕೂ ಅಧಿಕ ಜನರು ಮೃತಪಟ್ಟಿದ್ದು, ಚೀನಾದಲ್ಲಿ ಒಟ್ಟು 84,011 ಜನರಿಗೆ ಸೋಂಕು ಹಬ್ಬಿದೆ. ಇದೀಗ ಕೇವಲ 176 ಆ್ಯಕ್ಟೀವ್ ಕೇಸ್ಗಳಿವೆ. 4,637 ಜನರು ಈ ಸೋಂಕಿನಿಂದ ಆ ದೇಶದಲ್ಲಿ ಸಾವನ್ನಪ್ಪಿದ್ದಾರೆ.
