ಮಾಸ್ಕೋ (ರಷ್ಯಾ): ಇಂದಿನಿಂದ ರಷ್ಯಾದಲ್ಲಿ ಸಂಸತ್ ಚುನಾವಣೆ ನಡೆಯಲಿದ್ದು, ಮತದಾನ ಆರಂಭಗೊಂಡಿದೆ. ರಾಜಧಾನಿ ಮಾಸ್ಕೋಗಿಂತಲೂ ಒಂಬತ್ತು ಗಂಟೆಗಳ ಮುಂಚಿತವಾಗಿ ದೂರದ ಪೂರ್ವ ಪ್ರದೇಶಗಳಾದ ಕಮ್ಚಟ್ಕಾ ಮತ್ತು ಚುಕೊಟ್ಕಾದಲ್ಲಿ ಮತದಾನ ಪ್ರಕ್ರಿಯೆ ಆರಂಭವಾಗಿದೆ. .
ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ಪಕ್ಷ ರಷ್ಯಾ ಸಂಸತ್ನ ಕೆಳಮನೆ ಡೂಮಾಕ್ಕೆ ಚುನಾವಣೆ ನಡೆಯುತ್ತಿದೆ. ಪ್ರತಿಸ್ಪರ್ಧಿಯಾಗಿ ಪ್ರತಿಪಕ್ಷ ನಾಯಕ ಅಲೆಕ್ಸಿ ನವಾಲ್ನಿ ಪಕ್ಷ ಪ್ರಬಲ ಪೈಪೋಟಿ ನೀಡುತ್ತಿದೆ. ಈಗಾಗಲೇ ನಾಲ್ಕು ಬಾರಿ ಅಧ್ಯಕ್ಷರಾಗಿ ರಷ್ಯಾವನ್ನು ಆಳಿರುವ ಪುಟಿನ್, ತಮ್ಮ ಪಕ್ಷ ಮತ್ತೆ ಗೆಲ್ಲುತ್ತದೆ ಎಂಬ ನಿರೀಕ್ಷೆಯಲ್ಲಿದ್ದಾರೆ. ಪುಟಿನ್ ಅವರು 2000-2004, 2004-2008, 2012- 2018 ಮತ್ತು 2018ರ ಮೇ ತಿಂಗಳಿನಿಂದ ಇಲ್ಲಿಯವರೆಗೆ ರಷ್ಯಾ ಅಧ್ಯಕ್ಷರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.
ಈಗ ಐದನೇ ಬಾರಿ ಅಧ್ಯಕ್ಷರಾಗಿ ಆಯ್ಕೆ ಆಗಲು ಈಗಿನ ಕಾನೂನಿನಂತೆ ಪುಟಿನ್ಗೆ ಅವಕಾಶ ಇಲ್ಲ. ಹಾಗಾಗಿ ವ್ಲಾಡಿಮಿರ್ ಪುಟಿನ್ ಅಧ್ಯಕ್ಷರಾಗಿ ಮುಂದುವರೆಯಲು ಸಂವಿಧಾನ ತಿದ್ದುಪಡಿಗೆ ಮುಂದಾಗಿದ್ದಾರೆ. ಪ್ರಸ್ತುತ ರಷ್ಯಾ ಸಂಸತ್ನ ಕೆಳಮನೆ ಡುಮಾದಲ್ಲಿ ಪುಟಿನ್ರ ಯುನೈಟೆಡ್ ರಷ್ಯಾ ಪಕ್ಷ 3ನೇ 2ರಷ್ಟು ಬಹುಮತ ಹೊಂದಿದೆ.
2020ರಲ್ಲೇ ನಡೆಯಬೇಕಿದ್ದ ಚುನಾವಣೆ
ರಷ್ಯಾ ಸಂಸತ್ತಿನ ಕೆಳಮನೆಯಾದ 'ಡುಮಾ'ದ 450 ಸ್ಥಾನಗಳಿಗೆ ನಡೆಯುತ್ತಿರುವ ಚುನಾವಣೆ ಇದಾಗಿದೆ. 2020ರ ಸೆಪ್ಟೆಂಬರ್ನಲ್ಲೇ ನಡೆಯ ಬೇಕಿದ್ದ ಚುನಾವಣೆ ಕೋವಿಡ್ನಿಂದಾಗಿ ಮುಂದೂಡಲ್ಪಟ್ಟಿತ್ತು. ರಷ್ಯಾ ಸಂವಿಧಾನದ ಪ್ರಕಾರ ಒಬ್ಬನೇ ವ್ಯಕ್ತಿ ಐದು ಬಾರಿ ಅಧ್ಯಕ್ಷ ಗಾದಿಗೆ ಏರುವಂತಿಲ್ಲ. ಒಂದು ವೇಳೆ 2/3 ಬಹುಮತ ಬಂದರೂ ಸಂವಿಧಾನ ತಿದ್ದುಪಡಿ ಮಸೂದೆಗೆ ಡುಮಾದ ಸಮ್ಮತಿ ದೊರೆಯಬೇಕು.
ಸಂಸತ್ನಲ್ಲಿ ಬೇಕಿದೆ ಭಾರಿ ಬಹುಮತ
ಸಂವಿಧಾನಕ್ಕೆ ತಿದ್ದುಪಡಿ ಮಾಡಬೇಕಾದರೆ ಈ ಬಾರಿಯೂ 3ನೇ 2 ರಷ್ಟು ಬಹುಮತವನ್ನ ಪಡೆಯಬೇಕಾದ ಅವಶ್ಯಕತೆ ಪುಟಿನ್ ಅವರ ಪಕ್ಷಕ್ಕೆ ಇದೆ. ಹೀಗಾಗಿ ಈ ಚುನಾವಣೆ ಭಾರಿ ಮಹತ್ವ ಪಡೆದುಕೊಂಡಿದೆ. ಆದರೆ ಚುನಾವಣಾ ಪೂರ್ವ ಸಮೀಕ್ಷೆಯಲ್ಲಿ ಪುಟಿನ್ ಪಕ್ಷಕ್ಕೆ ಭಾರಿ ಹಿನ್ನಡೆ ಆಗಿದೆ ಎಂದು ವರದಿಯಾಗಿದೆ.
ಇದನ್ನೂ ಓದಿ: ರಷ್ಯಾದಲ್ಲಿ ಭಾರತದ ಮಿಲಿಟರಿ ಸಾಮರ್ಥ್ಯ ಅನಾವರಣ... ಜಪಾಡ್‌ 2021 ಸಮರಾಭ್ಯಾಸ: ಪುಟಿನ್ ಭಾಗಿ
ಇಂದಿನಿಂದ ಸೆಪ್ಟೆಂಬರ್ 19ರ ವರೆಗೆ ಮೂರು ದಿನಗಳ ಕಾಲ ಚುನಾವಣೆ ನಡೆಯಲಿದ್ದು, ಅಲೆಕ್ಸಿ ನವಾಲ್ನಿ ಅವರು ಸ್ಮಾರ್ಟ್ ವೋಟಿಂಗ್ ತಂತ್ರಾಂಶವನ್ನು ಬಿಡುಗಡೆಗೊಳಿಸಿದ್ದಾರೆ. ಆದರೆ, ಈ ತಂತ್ರಾಂಶವನ್ನು ಡಿಲೀಟ್ ಮಾಡುವಂತೆ ಗೂಗಲ್ ಮತ್ತು ಆಪಲ್ ಕಂಪನಿಗಳಿಗೆ ರಷ್ಯಾ ವಿದೇಶಾಂಗ ಸಚಿವಾಲಯ ಸೂಚಿಸಿದೆ.
