ಮಾಸ್ಕೋ : ರಷ್ಯಾದಲ್ಲಿ ಕಳೆದ ಏಳು ದಿನಗಳಲ್ಲಿ ಕೋವಿಡ್ ಆರ್ಭಟ ಮಾಡುತ್ತಿದೆ. ನಿತ್ಯ 30 ಸಾವಿರ ಹೊಸ ಪ್ರಕರಣ ಹಾಗೂ 1,000ಕ್ಕೂ ಹೆಚ್ಚು ಮಂದಿ ಬಲಿಯಾಗಿದ್ದಾರೆ. ಇದು ಒಂದೇ ವಾರದಲ್ಲಿ ಹೊಸ ಗರಿಷ್ಠ ಮಟ್ಟವಾಗಿದೆ.
ಕಡಿಮೆ ಸಾವಿನ ಸಂಖ್ಯೆ ಹೊಂದಿರುವ ಅನೇಕ ರಾಷ್ಟ್ರಗಳಿಗಿಂತ ಈ ಅಂಕಿ-ಅಂಶಗಳು ಭಿನ್ನವಾಗಿವೆ. ಕೇವಲ 3ನೇ ಒಂದು ಭಾಗದಷ್ಟು ರಷ್ಯನ್ನರಿಗೆ ಮಾತ್ರ ಸಂಪೂರ್ಣ ಪ್ರಮಾಣದಲ್ಲಿ ಕೊರೊನಾ ಲಸಿಕೆ ನೀಡಲಾಗಿದೆ.
ದೇಶವು ತನ್ನ ಸ್ವದೇಶಿ ಲಸಿಕೆಗಳ ಬಗ್ಗೆ ಹೆಚ್ಚಿನ ಪ್ರಚಾರದ ಹೊರತಾಗಿಯೂ ನಾಗರಿಕರು ವ್ಯಾಕ್ಸಿನ್‌ ತೆಗೆದುಕೊಳ್ಳಲು ನಿರಾಕರಿಸಿದ್ದಾರೆ. 144 ಮಿಲಿಯನ್ ಜನಸಂಖ್ಯೆ ಹೊಂದಿರುವ ರಷ್ಯಾದಲ್ಲಿ ಕೇವಲ 47.5 ಮಿಲಿಯನ್ ರಷ್ಯನ್ನರಿಗೆ ಮಾತ್ರ ಸಂಪೂರ್ಣ ಲಸಿಕೆ ಮಾಡಲಾಗಿದೆ. ಇದು ಅಲ್ಲಿನ ಜನಸಂಖ್ಯೆಯ 3ನೇ ಒಂದು ಭಾಗವಾಗಿದೆ. ಕೋವಿಡ್ ವಿಚಾರವಾಗಿ ರಷ್ಯಾ ರಾಜಕೀಯದಲ್ಲಿ ಭಿನ್ನಾಭಿಪ್ರಾಯಗಳಿವೆ.
ಕಳೆದ ಐದು ದಿನಗಳಲ್ಲಿ ನಿರಂತರವಾಗಿ ದಿನಕ್ಕೆ 30,000ಕ್ಕೂ ಹೆಚ್ಚು ಹೊಸ ಕೊರೊನಾ ಪ್ರಕರಣ ವರದಿಯಾಗುತ್ತಿವೆ. ನಿನ್ನೆ 33,740 ಹೊಸ ಪ್ರಕರಣ ದಾಖಲಾಗಿವೆ ಎಂದು ರಷ್ಯಾ ಸರ್ಕಾರದ ಕೋವಿಡ್-19 ಡ್ಯಾಶ್‌ಬೋರ್ಡ್ ಹೇಳಿದೆ.
ಸಾವಿನ ಸಂಖ್ಯೆ ಶನಿವಾರ ದಾಖಲೆಯ ಗರಿಷ್ಠ ಮಟ್ಟ ತಲುಪಿದೆ. 1,002 ಸೋಂಕಿತರು ಮೃತಪಟ್ಟಿದ್ದಾರೆ ಎಂದು ಹೇಳಿದೆ. ಮಂಗಳವಾರ ಮತ್ತೆ ಹಿಂದಿನ ದಾಖಲೆಯನ್ನು ಮುರಿದಿದ್ದು, 1,015 ಮಂದಿ ಮೃತಪಟ್ಟಿದ್ದಾರೆ.
ತೀವ್ರ ಸ್ಥಿತಿಯಲ್ಲಿರುವ ಬಹುತೇಕ ಎಲ್ಲಾ ಕೋವಿಡ್ ರೋಗಿಗಳಿಗೆ ಲಸಿಕೆ ಹಾಕಲಾಗಿಲ್ಲ ಎಂದು ಆರೋಗ್ಯ ಸಚಿವ ಮಿಖಾಯಿಲ್ ಮುರಾಶ್ಕೊ ಕಳೆದ ಮಂಗಳವಾರ ತಿಳಿಸಿದ್ದಾರೆ. ರಷ್ಯನ್ನರು ನಾಲ್ಕು ಸ್ವದೇಶಿ ಕೋವಿಡ್-19 ಲಸಿಕೆಗಳಾದ ಸ್ಪುಟ್ನಿಕ್ ವಿ, ಸ್ಪುಟ್ನಿಕ್ ವಿ ಲೈಟ್ (ರಷ್ಯಾದ ಒಂದು ಡೋಸ್ ಲಸಿಕೆ), ಎಪಿವಾಕ್ಕೊರೊನಾ ಮತ್ತು ಕೋವಿವಾಕ್‌ ಪಡೆದಿದ್ದಾರೆ.
ಕೋವಿಡ್ ಲಸಿಕೆಗಳು ತೀವ್ರ ರೋಗ ಮತ್ತು ಸಾವಿನಿಂದ ರಕ್ಷಿಸುತ್ತವೆ. ಪ್ರಮುಖವಾದ ಸ್ಪುಟ್ನಿಕ್ ವಿ ಪಾಶ್ಚಿಮಾತ್ಯ ಲಸಿಕೆ ಫೈಜರ್ ಮತ್ತು ಮಾಡರ್ನಾಗಳಿಗಿಂತ ಪರಿಣಾಮಕಾರಿಯಾಗಿದೆ ಎಂದು ಅಧ್ಯಯನಗಳು ಹೇಳಿವೆ.
ರಷ್ಯಾದ ಅಧಿಕಾರಿಗಳ ವಿರುದ್ಧ ವ್ಯಾಪಕ ಅಪನಂಬಿಕೆ ಮತ್ತು ಲಸಿಕೆಗಳ ಬಗ್ಗೆ ತಪ್ಪು ಮಾಹಿತಿಯು ಹೊಡೆತಗಳನ್ನು ತೆಗೆದುಕೊಳ್ಳಲು ಅಡ್ಡಿಯಾಗುತ್ತಿದೆ ಎಂದು ನ್ಯೂಯಾರ್ಕ್ ಟೈಮ್ಸ್ ಸೋಮವಾರ ವರದಿ ಮಾಡಿದೆ.
