ಕೊಲೊಂಬೋ: ಶ್ರೀಲಂಕಾದ ಮಾಜಿ ಅಧ್ಯಕ್ಷ ಮಹಿಂದ ರಾಜಪಕ್ಸೆ ದೇಶದ ನೂತನ ಪ್ರಧಾನಿಯಾಗಿ ಇಂದು ಅಧಿಕಾರ ಸ್ವೀಕರಿಸಿದರು. ಐತಿಹಾಸಿಕ ಬೌದ್ಧ ದೇವಾಲಯವೊಂದರಲ್ಲಿ ಮಹಿಂದ ಅವರ ಸಹೋದರ ಹಾಗೂ ಶ್ರೀಲಂಕಾ ಅಧ್ಯಕ್ಷ ಗೋಟಬಯಾ ರಾಜಪಕ್ಸೆ ಪ್ರಮಾಣವಚನ ಬೋಧಿಸಿದರು.
ಶ್ರೀಲಂಕಾದ ನೂತನ ಪ್ರಧಾನಿಯಾಗಿ ಮಹಿಂದ ರಾಜಪಕ್ಸೆ ಅಧಿಕಾರ ಸ್ವೀಕಾರ
ಆಗಸ್ಟ್ 5 ರಂದು ನಡೆದ ಸಂಸತ್ ಚುನಾವಣೆಯಲ್ಲಿ ಮಹಿಂದ ರಾಜಪಕ್ಸೆ ನೇತೃತ್ವದ ಶ್ರೀಲಂಕಾ ಪೀಪಲ್ಸ್ ಪಾರ್ಟಿ (ಎಸ್‌ಎಲ್‌ಪಿಪಿ) ಮೂರನೇ ಎರಡರಷ್ಟು ಬಹುಮತ ಗಳಿಸಿ ಭರ್ಜರಿ ಗೆಲುವು ಸಾಧಿಸಿದೆ. ಮಹಿಂದ ರಾಜಪಕ್ಸೆ ಬರೋಬ್ಬರಿ 5 ಲಕ್ಷ ಮತಗಳ ಅಂತರದಲ್ಲಿ ಗೆಲುವಿನ ನಗೆ ಬೀರಿದ್ದಾರೆ. ಇದು ಚುನಾವಣಾ ಇತಿಹಾಸದಲ್ಲಿ ಅಭ್ಯರ್ಥಿಯೊಬ್ಬರು ಪಡೆದ ಗರಿಷ್ಠ ಮತಗಳಾಗಿದೆ.
2019ರಲ್ಲಿ ಗೋಟಬಯಾ ರಾಜಪಕ್ಸೆ ಅಧ್ಯಕ್ಷ ಸ್ಥಾನದ ಗದ್ದುಗೆಗೇರಿದ್ದರು. ಇದೀಗ ದೇಶದ ಅಧ್ಯಕ್ಷ - ಪ್ರಧಾನಿಯಾಗಿ ರಾಜಪಕ್ಸೆ ಸಹೋದರರೇ ಆಡಳಿತ ನಡೆಸಲಿದ್ದಾರೆ.
