ಬೀಜಿಂಗ್: ಕೋವಿಡ್-19 ವೈರಸ್ ಹುಟ್ಟಿಗೆ ಕಾರಣವಾಗಿ, ಅಮೆರಿಕ ಸೇರಿದಂತೆ ಜಗತ್ತಿನ ಬಹುತೇಕ ರಾಷ್ಟ್ರಗಳ ಕೆಂಗಣ್ಣಿಗೆ ಗುರಿಯಾಗಿರುವ ಚೀನಾ ಕೊನೆಗೂ ವುಹಾನ್ ಲ್ಯಾಬ್ನ ಕೆಲವೇ ಚಿತ್ರಗಳನ್ನು ಬಿಡುಗಡೆ ಮಾಡಿದೆ. ಕೊರೊನಾ ವೈರಸ್ ಸೃಷ್ಟಿಸಲಾಗಿದೆ ಎಂದು ಹೇಳಲಾದ ವುಹಾನ್ ಲ್ಯಾಬ್ ಚಿತ್ರಗಳನ್ನು ಚೀನಾ ಸರ್ಕಾರದ ವಾಹಿನಿ ಸಿಸಿಟಿವಿ ಬಿಡುಗಡೆ ಮಾಡಿದೆ.
ವುಹಾನ್ನ ಪಿ-4 ಲ್ಯಾಬ್ನ ಸಂಕ್ಷಿಪ್ತ ಮಾಹಿತಿಯನ್ನು ಮಾತ್ರ ಸಿಸಿಟಿವಿ ವಾಹಿನಿ ನೀಡಿದ್ದು, ದಪ್ಪ ಗಾಜಿನ ಆವರಣದ ಹೊರಗಿನಿಂದ ಸೆರೆ ಹಿಡಿಯಲಾದ ಕೆಲ ಚಿತ್ರಗಳು ಇವಾಗಿವೆ. ಆದರೂ ಲ್ಯಾಬ್ನಲ್ಲಿ ಯಾವೆಲ್ಲಾ ಚಟುವಟಿಕೆಗಳು ನಡೆಯುತ್ತಿವೆ ಎಂಬುದರ ಬಗ್ಗೆ ಮಾತ್ರ ಚೀನಾ ಸರ್ಕಾರ ಮೌನವಾಗಿದೆ. 2017ರಲ್ಲಿ ಈ ಲ್ಯಾಬ್ ಆರಂಭಗೊಂಡಿದ್ದು, ಅಂದಿನಿಂದಲೇ ಇಲ್ಲಿ ಅತಿ ಭಯಾನಕವಾದ ಕ್ಲಾಸ್-4 ವೈರಾಣುಗಳನ್ನು ತಯಾರಿಸಲಾಗುತ್ತಿದೆ ಎಂದು ಹೇಳಲಾಗಿದೆ.
ಕೋವಿಡ್-19 ವೈರಸ್ ಹುಟ್ಟಿಗೆ ಕಾರಣಗಳನ್ನು ಅಧ್ಯಯನ ಮಾಡಲು ವಿಶ್ವ ಆರೋಗ್ಯ ಸಂಸ್ಥೆಯ ಎರಡು ತಂಡಗಳು ಈಗಾಗಲೇ ರಾಜಧಾನಿ ಬೀಜಿಂಗ್ಗೆ ತೆರಳಿದ್ದು, ಮುಂದಿನ ಎರಡು ದಿನಗಳ ಕಾಲ ವೈರಸ್ ಹರಡುವಿಕೆಯ ಬಗ್ಗೆ ಸಂಶೋಧನೆ ನಡೆಸಲಿವೆ.
ಪ್ರಾಣಿಯಿಂದ ಮಾನವರಿಗೆ ವೈರಸ್ ಹೇಗೆ ಹರಡಿತು ಎಂಬುದರ ಕುರಿತಾಗಿ ವೈದ್ಯಕೀಯ ತಜ್ಞರು ಹಾಗೂ ಸಾಂಕ್ರಾಮಿಕ ರೋಗ ತಜ್ಞರು ಅಧ್ಯಯನ ನಡೆಸಲಿದ್ದಾರೆ. ಮೊದಲಿಗೆ ಬಾವಲಿಗಳಲ್ಲಿ ಕೊರೊನಾ ವೈರಸ್ ಸೃಷ್ಟಿಯಾಗಿ ನಂತರ ಬೆಕ್ಕು ಅಥವಾ ಪ್ಯಾಂಗೊಲಿನ್ಗಳ ದೇಹ ಸೇರಿದ್ದು, ಈ ಪ್ರಾಣಿಗಳ ಮಾಂಸ ಸೇವಿಸಿದ ಮಾನವರ ಶರೀರಕ್ಕೆ ವೈರಸ್ ವರ್ಗಾವಣೆಯಾಗಿದೆ ಎಂದು ವಿಜ್ಞಾನಿಗಳು ಸದ್ಯಕ್ಕೆ ನಂಬಿದ್ದಾರೆ.
ಮೇ ತಿಂಗಳಲ್ಲಿ ನಡೆದ ವಿಶ್ವ ಆರೋಗ್ಯ ಸಂಸ್ಥೆಯ ಸಭೆಯಲ್ಲಿ ವಿಶ್ವದ 120 ರಾಷ್ಟ್ರಗಳು, ವೈರಸ್ ಹುಟ್ಟಿನ ಮೂಲವನ್ನು ಶೋಧಿಸಬೇಕೆಂದು ಆಗ್ರಹಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.
