ಫ್ರಾನ್ಸ್: ಮಹಾಮಾರಿ ಕೊರೊನಾ ವೈರಸ್ನಿಂದ 60 ದೇಶಗಳು ನಲುಗಿ ಹೋಗಿದ್ದು, ಚೀನಾದಲ್ಲೇ ಬರೋಬ್ಬರಿ 2,900ಕ್ಕೂ ಅಧಿಕ ಜನರು ತಮ್ಮ ಪ್ರಾಣ ಕಳೆದುಕೊಂಡಿದ್ದಾರೆ. ತಮ್ಮ ಜೀವ ರಕ್ಷಣೆ ಮಾಡಿಕೊಳ್ಳಲು ಜನರು ಮಾಸ್ಕ್ ಹಾಕಿಕೊಂಡು ಜೀವನ ನಡೆಸಬೇಕಾದ ಅನಿವಾರ್ಯತೆ ನಿರ್ಮಾಣಗೊಂಡಿದೆ.
ಫ್ರಾನ್ಸ್ನಲ್ಲೂ ಕೆಲವೊಂದು ಕೊರೊನಾ ಪ್ರಕರಣ ಕಂಡು ಬಂದಿದ್ದು, ಆಸ್ಪತ್ರೆಯಲ್ಲಿ ಇರಿಸಲಾಗಿದ್ದ 2 ಸಾವಿರ ಸರ್ಜಿಕಲ್ ಮಾಸ್ಕ್ ಕಳ್ಳತನ ಮಾಡಲಾಗಿದೆ. ಮಾರ್ಸೆಲ್ಲೆಯ ಆಸ್ಪತ್ರೆಯಲ್ಲಿ ಈ ಘಟನೆ ನಡೆದಿದ್ದು, ರಾತ್ರೋರಾತ್ರಿ ಅಲ್ಲಿನ ಮಾಸ್ಕ್ ಕಳ್ಳತನ ಮಾಡಲಾಗಿದೆ ಎಂದು ದೂರು ದಾಖಲು ಮಾಡಲಾಗಿದೆ.
ಆಸ್ಪತ್ರೆಯಲ್ಲಿನ ಸಿಬ್ಬಂದಿ, ವೈದ್ಯರು ಹಾಗೂ ಚಿಕಿತ್ಸೆ ಪಡೆದುಕೊಳ್ಳುತ್ತಿರುವವರಿಗೆ ನೀಡಲು ಈ ಮಾಸ್ಕ್ ಆಸ್ಪತ್ರೆಯಲ್ಲಿ ಕೊಠಡಿಯಲ್ಲಿಡಲಾಗಿತ್ತು. ಆದರೆ, ಅವುಗಳಿಗೆ ಬೇಡಿಕೆ ಹೆಚ್ಚಾಗುತ್ತಿದ್ದಂತೆ ಕಳ್ಳತನ ಮಾಡಲಾಗಿದೆ ಎಂದು ತಿಳಿದು ಬಂದಿದೆ. ಕೊರೊನಾ ಮಹಾಮಾರಿ ಈಗಾಗಲೇ 3 ಸಾವಿರಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದು, ಇದರಲ್ಲಿ ಅತಿ ಹೆಚ್ಚು ಅಂದರೆ 2,900 ಜನರು ಚೀನಾ, ಇರಾನ್ನಲ್ಲಿ 77, ಇಟಲಿ 52 ದಕ್ಷಿಣ ಕೊರಿಯಾದಲ್ಲಿ 13 ಹಾಗೂ ಅಮೆರಿಕದಲ್ಲಿ 6 ಮಂದಿ ಮೃತಪಟ್ಟಿದ್ದು, 80ಸಾವಿರಕ್ಕೂ ಅಧಿಕ ಮಂದಿ ಈ ಸೋಂಕಿನಿಂದ ಬಳಲುತ್ತಿದ್ದಾರೆ.
