ಗುಂಡಿಕ್ಕಿ ಅಫ್ಘಾನಿಸ್ತಾನ ಮಾನವ ಹಕ್ಕುಗಳ ಕಾರ್ಯಕರ್ತೆ ಫ್ರೆಶ್ತಾ ಕೊಹಿಸ್ತಾನಿ ಕೊಲೆ

ಭಯೋತ್ಪಾದಕ ಸಂಘಟನೆಗಳಾದ ತಾಲಿಬಾನ್ ಮತ್ತು ಅಫ್ಘಾನ್​ ಸರ್ಕಾರದ ನಡುವೆ ಶಾಂತಿ ಒಪ್ಪಂದವನ್ನು ಮಾಡಿಕೊಳ್ಳಲು ಮಾತುಕತೆ ನಡೆಯುತ್ತಿರುವ ಸಮಯದಲ್ಲಿ ಅಫ್ಘಾನಿಸ್ತಾನದಲ್ಲಿ ಮಾನವ ಹಕ್ಕುಗಳ ಕಾರ್ಯಕರ್ತೆಯೋರ್ವರನ್ನು ಗುಂಡಿಕ್ಕಿ ಕೊಲ್ಲಲಾಗಿದೆ..

ಕತಾರ್​​​: ಅಫ್ಘಾನಿಸ್ತಾನದ ಈಶಾನ್ಯ ಕಪಿಸಾ ಪ್ರಾಂತ್ಯದಲ್ಲಿ ಅಫ್ಘಾನಿಸ್ತಾನ್​​ನ ಮಾನವ ಹಕ್ಕುಗಳ ಕಾರ್ಯಕರ್ತೆ ಫ್ರೆಶ್ತಾ ಕೊಹಿಸ್ತಾನಿಯನ್ನು ಗುಂಡಿಕ್ಕಿ ಕೊಲ್ಲಲಾಗಿದೆ.

ಕಪಿಸಾದ ಕೊಹಿಸ್ತಾನ್ ಜಿಲ್ಲೆಯ ಹೆಸ್-ಎ-ಅವಲ್ ಪ್ರದೇಶದಲ್ಲಿ ಬೈಕ್​​ನಲ್ಲಿ ಬಂದ ಬಂದೂಕುಧಾರಿಯೊಬ್ಬ ಫ್ರೆಶ್ತಾ ಕೊಹಿಸ್ತಾನಿ ಮೇಲೆ ಗುಂಡು ಹಾರಿಸಿ ಹತ್ಯೆಗೈದಿದ್ದಾನೆ.

ಘಟನೆಯಲ್ಲಿ ಫ್ರೆಶ್ತಾ ಸಹೋದರ ತೀವ್ರವಾಗಿ ಗಾಯಗೊಂಡಿದ್ದಾರೆ. ಪ್ರಕರಣ ಸಂಬಂಧ ಗುಪ್ತಚರ ದಳ ತನಿಖೆ ಆರಂಭಿಸಿದೆ. ಗುರುವಾರ ನಡೆದ ಈ ದಾಳಿಯ ಹೊಣೆಯನ್ನು ಯಾರೂ ಕೂಡಲೇ ವಹಿಸಿಕೊಂಡಿಲ್ಲ. ಆದರೆ ಇತ್ತೀಚೆಗೆ ಕಾಬೂಲ್‌ನಲ್ಲಿ ನಡೆದ ಹಲವಾರು ದಾಳಿಯ ಜವಾಬ್ದಾರಿಯನ್ನು ಇಸ್ಲಾಮಿಕ್ ಸ್ಟೇಟ್ ವಹಿಸಿಕೊಂಡಿದೆ. ಈ ದಾಳಿಯಲ್ಲಿ ಶಿಕ್ಷಣ ಸಂಸ್ಥೆಗಳ ಮೇಲಿನ ದಾಳಿಗಳೂ ಸೇರಿವೆ, ಇದರಲ್ಲಿ 50 ಜನರು ಸಾವನ್ನಪ್ಪಿದ್ದಾರೆ.

ಕಳೆದ ಮಂಗಳವಾರ, ಘಜ್ನಿ ಪ್ರಾಂತ್ಯದ ಪತ್ರಕರ್ತ ಸಂಘದ ಮುಖ್ಯಸ್ಥ ಪತ್ರಕರ್ತ ರಹಮತುಲ್ಲಾ ನಿಕ್ಜಾದ್​ರನ್ನು ಹತ್ಯೆ ಮಾಡಲಾಗಿತ್ತು. ಇದು ಅಫ್ಘಾನಿಸ್ತಾನ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆಕ್ರೋಶಕ್ಕೆ ಕಾರಣವಾಯಿತು. ಬುಧವಾರ, ಅಫ್ಘಾನಿಸ್ತಾನ ವಾಚ್​ಡಾಗ್​ನ ಫ್ರೀ ಆ್ಯಂಡ್​ ಫೇರ್​ ಚುನಾವಣಾ ವೇದಿಕೆಯ ಮುಖ್ಯಸ್ಥ ಯೂಸುಫ್ ರಶೀದ್ ಹಾಗೂ ಅವರ ಚಾಲಕ ಕೂಡ ಕೊಲೆಯಾಗಿದ್ದರು.

ಓದಿ: 2 ಬಾರಿ ಸಾವಿನ ದವಡೆಗೆ ಸಿಲುಕಿದ್ದ ಉರಗ ರಕ್ಷಕ ‘ಬಿನೀಶ್’.. ಇವರೆದುರು ವಿಷ ಸರ್ಪಗಳೇ ತಲೆಬಾಗ್ತವೆ..