ವಾಷಿಂಗ್ಟನ್: ಚೀನಾದಲ್ಲಿ ಪತ್ತೆಯಾಗಿರುವ ಮಾರಣಾಂತಿಕ ಕೊರೊನಾ ವೈರಸ್ ವಿರುದ್ಧ ಅಮೆರಿಕ ಲಸಿಕೆ ಅಭಿವೃದ್ಧಿಪಡಿಸುವುದಾಗಿ ತಿಳಿಸಿದ್ದು, ಇದಕ್ಕಾಗಿ ಬೀಜಿಂಗ್ನ ಅಂತಾರಾಷ್ಟ್ರೀಯ ಆರೋಗ್ಯ ಅಧಿಕಾರಿಗಳ ಸಹಕಾರ ಕೋರಿದೆ.
ಕೊರೊನಾ ವೈರಸ್ ಬಗ್ಗೆ ಕುತೂಹಲಕಾರಿ ಅಂಶಗಳನ್ನು ಪತ್ತೆಹಚ್ಚಲು ಅಮೆರಿಕ ಸರ್ಕಾರ ತಮ್ಮದೇ ಆದ ತಂಡವೊಂದನ್ನು ಬೀಜಿಂಗ್‌ಗೆ ಕಳುಹಿಸಲು ಮುಂದಾಗಿದೆ. ಈ ತಂಡ ವೈರಸ್ ಕುರಿತಾದ ಮಾಹಿತಿ ಮತ್ತು ರೋಗಕಾರಕದ ಬಗ್ಗೆ ಅಧ್ಯಯನ ನಡೆಸಲಿದೆ.
ಈ ಮಾರಕ ವೈರಸ್ ಕುರಿತಾದ ಅಂಕಿಅಂಶಗಳನ್ನು ಪರಿಶೀಲಿಸಲು ಮತ್ತು ರೋಗಕಾರಕದ ಬಗ್ಗೆ ಇನ್ನಷ್ಟು ತಿಳಿದುಕೊಳ್ಳಲು ಯುಎಸ್ ಸರ್ಕಾರ ತನ್ನದೇ ತಂಡಗಳನ್ನು ಚೀನಾಕ್ಕೆ ಕಳುಹಿಸಲು ಉತ್ಸುಕವಾಗಿದೆ. ನಾವು ಈಗಾಗಲೇ ಅನೇಕ ಸಹದ್ಯೋಗಿಗಳೊಂದಿಗೆ ಲಸಿಕೆ ಅಭಿವೃದ್ಧಿಪಡಿಸಲು ಮುಂದಾಗಿದ್ದೇವೆ. ಈ ಪ್ರಕ್ರಿಯೆಯಲ್ಲಿ ಮೊದಲ ಪ್ರಯೋಗವನ್ನು ಪ್ರಾರಂಭಿಸಲು ಮೂರು ತಿಂಗಳು, ಡೇಟಾವನ್ನು ಸಂಗ್ರಹಿಸಲು ಇನ್ನೂ ಮೂರು ತಿಂಗಳು ಬೇಕಾಗಬಹುದು ಎಂದು ನ್ಯಾಷನಲ್ ಇನ್ಸ್ಟಿಟ್ಯೂಟ್ ಫಾರ್ ಹೆಲ್ತ್ (ಎನ್ಐಹೆಚ್) ಅಧಿಕಾರಿ ಆಂಥೋನಿ ಫೌಸಿ ಸುದ್ದಿಗಾರರಿಗೆ ತಿಳಿಸಿದ್ದಾರೆ.
ಈ ಕುರಿತಂತೆ ಅಮೆರಿಕದ ಆರೋಗ್ಯ ಮತ್ತು ಮಾನವ ಸೇವೆಗಳ ಕಾರ್ಯದರ್ಶಿ ಅಲೆಕ್ಸ್ ಅಜರ್ ಪ್ರತಿಕ್ರಿಯಿಸಿ, ನಾವು ಜನವರಿ 6 ಕ್ಕೆ ಸಿಡಿಸಿ ತಂಡವನ್ನು ಚೀನಾಕ್ಕೆ ಕಳುಹಿಸಲು ಮುಂದಾಗಿದ್ದೇವೆ. ಈ ತಂಡ ಅಲ್ಲಿನ ಜನರ ಪರಿಸ್ಥಿತಿಯ ಕುರಿತು ಅಧ್ಯಯನ ನಡೆಸುತ್ತದೆ. ವಿಶ್ವ ಆರೋಗ್ಯ ಸಂಸ್ಥೆಯ ಆಶ್ರಯದಲ್ಲಿ ಸಿಡಿಸಿ ತಂಡ ಚೀನಾಕ್ಕೆ ಹೋಗಲು ಸಮರ್ಥರಾಗಿದ್ದಾರೆ ಎಂದರು.
ಕೊರೊನಾ ವೈರಸ್ಗೆ ಈಗಾಗಲೇ 131 ಜನರು ಪ್ರಾಣ ಕಳೆದುಕೊಂಡಿದ್ದಾರೆ.
