ವಾಷಿಂಗ್ಟನ್: ಕೋವಿಡ್-19 ಮೂಲದ ಮಾಹಿತಿಯನ್ನು ಸಂಗ್ರಹಿಸುವ ಪ್ರಯತ್ನಗಳನ್ನು ದ್ವಿಗುಣಗೊಳಿಸುವಂತೆ ಅಮೆರಿಕ ಗುಪ್ತಚರ ಸಂಸ್ಥೆಗೆ ಅಧ್ಯಕ್ಷ ಜೋ ಬೈಡನ್ ಆದೇಶ ನೀಡಿದ್ದಾರೆ.
"ಕೊರೊನಾ ಸಾಂಕ್ರಾಮಿಕದ ಮೂಲದ ಬಗ್ಗೆ ನಾವು ಒಂದು ನಿರ್ದಿಷ್ಟ ತೀರ್ಮಾನಕ್ಕೆ ಬರುವಂತಹ ಮಾಹಿತಿಯನ್ನು ಸಂಗ್ರಹಿಸಲು ಮತ್ತು ವಿಶ್ಲೇಷಿಸಲು ನಿಮ್ಮ ಪ್ರಯತ್ನಗಳನ್ನ ದ್ವಿಗುಣಗೊಳಿಸಿ. 90 ದಿನಗಳಲ್ಲಿ ಈ ಸಂಬಂಧ ನನಗೆ ವರದಿ ನೀಡಿ" ಎಂದು ಬೈಡನ್ ಗುಪ್ತಚರ ಸಂಸ್ಥೆಗೆ ಸೂಚಿಸಿದ್ದಾರೆ.
ಅಲ್ಲದೇ ಈ ಪ್ರಯತ್ನದಲ್ಲಿ ರಾಷ್ಟ್ರೀಯ ಪ್ರಯೋಗಾಲಯಗಳು ಹಾಗೂ ಸರ್ಕಾರದ ಇತರ ಏಜೆನ್ಸಿಗಳು ಸಹ ತಮ್ಮ ಕಾರ್ಯವನ್ನು ಚುರುಕುಗೊಳಿಸಬೇಕು. ತನ್ನ ಕಾರ್ಯ ವೈಖರಿಯ ಬಗೆಗಿನ ಸಂಪೂರ್ಣ ಮಾಹಿತಿಯನ್ನು ಯುಎಸ್ ಕಾಂಗ್ರೆಸ್ (ಸಂಸತ್ತು)ಗೆ ತಿಳಿಸುತ್ತಿರಬೇಕೆಂದು ಬೈಡನ್ ಹೇಳಿದ್ದಾರೆ.
ವೈರಸ್ ಬಗ್ಗೆ ತಿಳಿದುಕೊಳ್ಳಲು ಚೀನಾಗೆ ಪ್ರವೇಶ ಪಡೆದ ಬಳಿಕವೇ ನಾವು ಹೆಚ್ಚು ಪರಿಣಾಮಕಾರಿಯಾಗಿ ಹೋರಾಡಬಹುದು ಎಂಬ ಮಾಹಿತಿ ಸಿಗುತ್ತಿದ್ದಂತೆಯೇ ನಾನು ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರ (ಸಿಡಿಸಿ)ಕ್ಕೆ ಕರೆ ಮಾಡಿ ತಿಳಿಸಿದ್ದೆ. ಆರಂಭಿಕ ತಿಂಗಳುಗಳಲ್ಲಿ ನಮ್ಮ ತನಿಖಾಧಿಕಾರಿಗಳನ್ನೇ ಕೋವಿಡ್ ಮೂಲದ ದೇಶಕ್ಕೆ (ಚೀನಾ) ಕಳುಹಿಸಲು ವಿಫಲವಾದರೆ ಈ ಬಗೆಗಿನ ಯಾವುದೇ ತನಿಖೆಗೆ ಕೂಡ ಅಡ್ಡಿಯಾಗುತ್ತದೆ ಎಂದು ಬೈಡನ್ ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ: ವುಹಾನ್ನ ಮೊದಲ ಕೊರೊನಾ ಸೋಂಕಿತ ದಾಖಲಾಗಿದ್ದ ಆಸ್ಪತ್ರೆಗೆ ಡಬ್ಲ್ಯುಹೆಚ್‌ಒ ತಂಡ ಭೇಟಿ
2019ರ ಡಿಸೆಂಬರ್ನಲ್ಲಿ ಮೊದಲ ಕೋವಿಡ್ ಪ್ರಕರಣ ಚೀನಾದ ವುಹಾನ್ನಲ್ಲಿ ವರದಿಯಾಗಿತ್ತು. ಉದ್ದೇಶಪೂರ್ವಕವಾಗಿ ಸೋಂಕು ಪಸರಿಸಲು ಚೀನಾ ತನ್ನ ವುಹಾನ್ನ ಪ್ರಯೋಗಾಲಯದಲ್ಲೇ ವೈರಸ್ ಸೃಷ್ಟಿಸಿದೆ ಎಂದು ಅಮೆರಿಕ ಗುಪ್ತಚರ ಸಂಸ್ಥೆ ಆರೋಪಿಸಿತ್ತು. ಬಳಿಕ ವೈರಸ್ ಮೂಲದ ಬಗ್ಗೆ ತನಿಖೆ ನಡೆಸುವ ಸಲುವಾಗಿ ವಿಶ್ವ ಆರೋಗ್ಯ ಸಂಸ್ಥೆಯ (ಡಬ್ಲ್ಯುಹೆಚ್‌ಒ) ತಜ್ಞರು ವುಹಾನ್ ಸೇರಿದಂತೆ ಚೀನಾದ ವಿವಿಧ ಪ್ರದೇಶಗಳಿಗೆ ಭೇಟಿ ನೀಡಿ, ಚೀನಾ ಅಧ್ಯಯನ ತಂಡದೊಂದಿಗೆ ಸೇರಿ ತನಿಖೆ ನಡೆಸಿತ್ತು. ತನಿಖೆ ಬಳಿಕ ಡಬ್ಲ್ಯುಹೆಚ್‌ಒ, ಇದರ ಹಿಂದೆ ಚೀನಾ ಕೈವಾಡವಿಲ್ಲವೆಂದು ತಿಳಿಸಿತ್ತು.
ವುಹಾನ್ ಇನ್ಸ್ಟಿಟ್ಯೂಟ್ ಆಫ್ ವೈರಾಲಜಿ ಹಾಗೂ ಚೈನೀಸ್ ಅಕಾಡೆಮಿ ಆಫ್ ಸೈನ್ಸಸ್ನ ಹೇಳಿಕೆಯನ್ನು ಪ್ರತಿಪಾದಿಸಿದ ಚೀನಾ ವಿದೇಶಾಂಗ ಸಚಿವಾಲಯವು, 2019ರ ಡಿಸೆಂಬರ್ 30ರ ಮೊದಲು ವುಹಾನ್ ಇನ್ಸ್ಟಿಟ್ಯೂಟ್ ಆಫ್ ವೈರಾಲಜಿಯಲ್ಲಿ ಕೊರೊನಾ ವೈರಸ್ ಪತ್ತೆಯಾಗಿಲ್ಲ. ಇಲ್ಲಿಯವರೆಗೂ ಈ ಸಂಸ್ಥೆಯ ಯಾವುದೇ ಸಿಬ್ಬಂದಿ ಮತ್ತು ಸ್ನಾತಕೋತ್ತರ ವಿದ್ಯಾರ್ಥಿಗಳು ಸೋಂಕಿಗೆ ಒಳಗಾಗಿಲ್ಲ ಎಂದು ತಿಳಿಸಿದೆ.
ಇದನ್ನೂ ಓದಿ: WHO-ಚೀನಿ ತಜ್ಞರ ಕೊರೊನಾ ವೈರಸ್ ಮೂಲ ಪತ್ತೆ ವರದಿ ಬಹಿರಂಗ: ಚೀನಾ-ಅಮೆರಿಕ ವಾಕ್ಸಮರ ಶುರು
ಆದರೆ ಚೀನಾದ ಅಧಿಕಾರಿಗಳು ಡಬ್ಲ್ಯುಹೆಚ್‌ಒಗೆ ವರದಿ ಮಾಡುವ ಮೊದಲೇ 2019ರಲ್ಲಿ ಚೀನಾದ ವೈರಾಲಜಿ ಪ್ರಯೋಗಾಲಯದ ಸಂಶೋಧಕರು ಅನಾರೋಗ್ಯಕ್ಕೆ ಒಳಗಾಗಿದ್ದಾರೆ ಎಂದು ಯುಎಸ್ ಗುಪ್ತಚರ ಸಂಸ್ಥೆಗಳು ವರದಿ ಮಾಡಿವೆ. ಈ ಆರೋಪಗಳನ್ನು ತಳ್ಳಿಹಾಕಿರುವ ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ಝಾವೋ ಲಿಜಿಯಾನ್, ಯುಎಸ್ ಪಿತೂರಿ ಸಿದ್ಧಾಂತಗಳನ್ನು ಮತ್ತು ಲ್ಯಾಬ್ ಸೋರಿಕೆಯಂತಹ ತಪ್ಪು ಮಾಹಿತಿಯನ್ನು ಹರಡುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
