ಪ್ಯಾರಿಸ್( ಫ್ರಾನ್ಸ್) : ಅಂತಾರಾಷ್ಟ್ರೀಯ ಆಹಾರ ವ್ಯಾಪಾರ ಮೇಳದಲ್ಲಿ ಭಾಗಿಯಾಗಿದ್ದ ವೇಳೆಯಲ್ಲಿ ಫ್ರಾನ್ಸ್ ಅಧ್ಯಕ್ಷ ಇಮ್ಯಾನುಯೆಲ್ ಮ್ಯಾಕ್ರೋನ್ ಮೇಲೆ ವ್ಯಕ್ತಿಯೋರ್ವ ಮೊಟ್ಟೆ ಎಸೆದ ಘಟನೆ ನಡೆದಿದೆ.
ಫ್ರಾನ್ಸ್ನ ನಗರವಾದ ಲಿಯಾನ್ನಲ್ಲಿ ಅಂತಾರಾಷ್ಟ್ರೀಯ ಆಹಾರ ವ್ಯಾಪಾರ ಮೇಳ ನಡೆಯುತ್ತಿದ್ದು, ಈ ವೇಳೆ ವ್ಯಕ್ತಿಯೊಬ್ಬ ಎಸೆದಿರುವ ಮೊಟ್ಟೆಯೊಂದು ಇಮ್ಯಾನುಯೆಲ್ ಮ್ಯಾಕ್ರೋನ್ ಭುಜಕ್ಕೆ ತಗುಲಿದೆ. ಈ ವೇಳೆ, ಇಬ್ಬರು ಅಂಗರಕ್ಷಕರು ಫ್ರಾನ್ಸ್ ಅಧ್ಯಕ್ಷನ ರಕ್ಷಣೆಗೆ ಧಾವಿಸಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ವೈರಲ್ ಆಗಿದ್ದು, ಆ ವ್ಯಕ್ತಿಯನ್ನು ಪೊಲೀಸರು ವಶಕ್ಕೆ ಪಡೆಯುತ್ತಿರುವ ದೃಶ್ಯವೂ ಕೂಡಾ ಸೆರೆಯಾಗಿದೆ. ಸದ್ಯಕ್ಕೆ ಮೊಟ್ಟೆ ಎಸೆದ ವ್ಯಕ್ತಿ ವಿವರಗಳನ್ನು ಪೊಲೀಸರು ಬಹಿರಂಗಪಡಿಸಿಲ್ಲ. ಈ ಘಟನೆಯ ನಂತರ ಇಮ್ಯಾನುಯೆಲ್ ಮ್ಯಾಕ್ರೋನ್ ಪ್ರತಿಕ್ರಿಯೆ ನೀಡಿದ್ದು, ಆ ವ್ಯಕ್ತಿ ನನ್ನ ಬಳಿ ಏನಾದರೂ ಹೇಳಲು ಬಯಸಿದರೆ, ನನ್ನ ಬಳಿ ಬರಬಹುದು ಎಂದಿದ್ದಾರೆ.
ಜೂನ್ನಲ್ಲಿ ಕೆನ್ನೆಗೆ ಬಾರಿಸಿದ್ದ..
ಕಳೆದ ಜೂನ್ ತಿಂಗಳಲ್ಲಿ ಇಂಥದ್ದೇ ಒಂದು ಘಟನೆ ನಡೆದಿತ್ತು. ಫ್ರಾನ್ಸ್ನ ಆಗ್ನೇಯ ನಗರದಲ್ಲಿ ಸಮಾರಂಭದಲ್ಲಿ ಭಾಗಿಯಾಗಿದ್ದ ಇಮ್ಯಾನುಯೆಲ್ ಮ್ಯಾಕ್ರೋನ್ ಕೆನ್ನೆಗೆ ಓರ್ವ ವ್ಯಕ್ತಿ ಬಹಿರಂಗವಾಗಿ ಬಾರಿಸಿದ್ದನು. ಈ ವೇಳೆ, ಇಮ್ಯಾನುಯೆಲ್ ಮ್ಯಾಕ್ರೋನ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದರು.
ಕ್ರೌಡ್ ಬಾತ್ ಎಂದರೇನು..?
ರಾಜಕೀಯ ವ್ಯಕ್ತಿಗಳಲ್ಲಿ ಹಲವರು ಸಾಮಾನ್ಯವಾಗಿ ಜನರೊಂದಿಗೆ ಬೆರೆಯಲು ಇಷ್ಟಪಡುತ್ತಾರೆ. ಯಾವಾಗಲೂ ಅವರು ಸಭೆ ಸಮಾರಂಭಗಳಲ್ಲಿ ಭಾಗವಹಿಸಲು ಹಾತೊರೆಯುತ್ತಿರುತ್ತಾರೆ. ಇಮ್ಯಾನುಯೆಲ್ ಮ್ಯಾಕ್ರೋನ್ ಸಾಮಾನ್ಯವಾಗಿ ಜನರೊಂದಿಗೆ ಬೆರೆಯಲು ಇಷ್ಟಪಡುತ್ತಾರೆ.
ಈ ರೀತಿಯಾಗಿ ಜನರೊಂದಿಗೆ ಕಾಣಿಸಿಕೊಳ್ಳುವ ಪರಿಯನ್ನು ಫ್ರಾನ್ಸ್ ಭಾಷೆಯಲ್ಲಿ ಕ್ರೌಡ್ ಬಾತ್ಸ್ (crowd baths) ಎಂದು ಕರೆಯುತ್ತಾರೆ. ಕ್ರೌಡ್ ಬಾತ್ಗಳಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುವ ಕಾರಣದಿಂದಲೇ ಇಮ್ಯಾನುಯೆಲ್ ಮ್ಯಾಕ್ರೋನ್ಗೆ ಇಂತಹ ಪರಿಸ್ಥಿತಿಗಳು ಎದುರಾಗುತ್ತವೆ ಎನ್ನಲಾಗಿದೆ.
ಇದನ್ನೂ ಓದಿ: ದಿನಕ್ಕೊಂದು ರೂಲ್ಸ್.. ಇನ್ಮೇಲೆ ಅಫ್ಘಾನಿಸ್ತಾನದಲ್ಲಿ ಗಡ್ಡದ ಶೇವ್, ಟ್ರಿಮ್ ಮಾಡುವುದು ನಿಷಿದ್ಧ..
