ವಾಶಿಂಗ್ಟನ್: ಕೊರೊನಾ ವೈರಸ್ನಿಂದ ಅತಿ ಹೆಚ್ಚು ಬಾಧಿತವಾಗಿರುವ ಅಮೆರಿಕದಲ್ಲಿ ಕೊರೊನಾ ವೈರಸ್ ಕುರಿತಾದ ತಾಜಾ ಮಾಹಿತಿಗೆ ಸುದ್ದಿಯ ಯಾವ ಮೂಲಗಳನ್ನು ಹೆಚ್ಚು ನಂಬಬಹುದು ಎಂಬ ಬಗ್ಗೆ ವಿಮರ್ಶೆ ಆರಂಭವಾಗಿದೆ.
ಮೂರರಲ್ಲಿ ಒಬ್ಬರು ಮಾತ್ರ ತಮ್ಮ ಪರಿಚಯದವರು ಅಥವಾ ಬಂಧು ಬಳಗದವನ್ನು ಈ ವಿಷಯದಲ್ಲಿ ನಂಬುತ್ತಾರೆ ಎಂದು ಸಮೀಕ್ಷೆಯೊಂದರಲ್ಲಿ ತಿಳಿದು ಬಂದಿದೆ. ಅಸೋಸಿಯೇಟ್ ಪ್ರೆಸ್-ಎನ್ಒರಸಿ ಸೆಂಟರ್ ಫಾರ್ ಪಬ್ಲಿಕ್ ಅಫೇರ್ಸ್ ರಿಸರ್ಚ್ ಸಂಸ್ಥೆ ಏಪ್ರಿಲ್ ಮಧ್ಯಭಾಗದಲ್ಲಿ ಕೈಗೊಂಡ ಸಮೀಕ್ಷೆಯಲ್ಲಿ ಕೆಲ ಕುತೂಹಲಕರ ವಿಷಯ ಬಹಿರಂಗವಾಗಿವೆ.
ಅಮೆರಿಕ ನಾಗರಿಕ ಸಶಸ್ತ್ರ ಪಡೆಯ ಯೋಧ ಜಾನ್ ಮ್ಯಾನ್ಲೆ ಎಂಬುವರು ಕೊರೊನಾ ವೈರಸ್ ಪಾಸಿಟಿವ್ ಆದಾಗ, ಆತನ ಸಹೋದರಿಯು ಮಲೇರಿಯಾ ಔಷಧಿ ಸೇವಿಸುವಂತೆ ಸಲಹೆ ನೀಡಿದ್ದಳಂತೆ. ಕೊರೊನಾ ಹೋರಾಟದಲ್ಲಿ ಮಲೇರಿಯಾ ಔಷಧಿ ಬಹಳ ಪರಿಣಾಮಕಾರಿಯಾಗಿದೆ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದನ್ನು ಫಾಕ್ಸ್ ನ್ಯೂಸ್ ಚಾನೆಲ್ನಲ್ಲಿ ಆಕೆ ನೋಡಿದ್ದರಿಂದ ಈ ಸಲಹೆ ನೀಡಿದ್ದಳು.
ಆದರೆ, ದೇಶದ ಫುಡ್ ಅಂಡ್ ಡ್ರಗ್ ಆ್ಯಡ್ಮಿನಿಸ್ಟ್ರೇಷನ್ ಈ ಔಷಧಿಯನ್ನು ಪ್ರಮಾಣೀಕರಿಸಿಲ್ಲ ಎಂಬುದು 58 ವರ್ಷದ ಮ್ಯಾನ್ಲೆಗೆ ತಿಳಿದಿದ್ದರಿಂದ ಆತ ಮಲೇರಿಯಾ ಔಷಧಿ ತೆಗೆದುಕೊಳ್ಳಲಿಲ್ಲ ಎಂಬುದು ಬೇರೆ ಮಾತು.
ಸದ್ಯದ ಪರಿಸ್ಥಿತಿಯಲ್ಲಿ ಕೊರೊನಾ ಕುರಿತಾಗಿ ವೈಟ್ಹೌಸ್ ನೀಡುವ ಮಾಹಿತಿಗಳನ್ನು ಕೇವಲ ಶೇ.23ರಷ್ಟು ಅಮೆರಿಕನ್ನರು ಮಾತ್ರ ನಂಬುತ್ತಾರೆ ಎಂದು ಸಮೀಕ್ಷೆಯಲ್ಲಿ ಗೊತ್ತಾಗಿದೆ. ಇನ್ನು ಶೇ.66 ರಷ್ಟು ಜನ ಕೊರೊನಾ ಬಗ್ಗೆ ವೈದ್ಯಕೀಯ ಪರಿಣಿತರು ನೀಡುವ ಸಲಹೆಗಳನ್ನು ಮಾತ್ರ ಸ್ವೀಕರಿಸುತ್ತಾರಂತೆ.
