ವೈಮಾನಿಕ ದಾಳಿ ನಡೆಸಿ 50 ಉಗ್ರರ ಹೊಡೆದುರುಳಿಸಿದ ಫ್ರಾನ್ಸ್

ಮಾಲಿ ದೇಶದ ಮೇಲೆ ಫ್ರಾನ್ಸ್ ನಡೆಸಿದ ವೈಮಾನಿಕ ದಾಳಿಯಲ್ಲಿ ಅಲ್ ಖೈದಾ ಸಂಘಟನೆ ಜೊತೆ ಸಂಪರ್ಕ ಹೊಂದಿದ್ದ ಸುಮಾರು 50 ಉಗ್ರರು ಹತರಾಗಿದ್ದಾರೆ.

ಬಮಾಕೊ (ಮಾಲಿ): ಮಾಲಿ ದೇಶದ ಮೇಲೆ ಏರ್​​ ಸ್ಟ್ರೈಕ್ ನಡೆಸಿದ್ದು, ಅಲ್ ಖೈದಾ ಸಂಘಟನೆ ಜೊತೆ ಸಂಪರ್ಕ ಹೊಂದಿದ್ದ ಸುಮಾರು 50 ಉಗ್ರರು ಬಲಿಯಾಗಿದ್ದಾರೆ ಎಂದು ಫ್ರಾನ್ಸ್ ಸರ್ಕಾರ ತಿಳಿಸಿದೆ.

ಬುರ್ಕಿನಾ ಫಾಸೊ ಮತ್ತು ನೈಜರ್‌ ಗಡಿ ಪ್ರದೇಶದ ಮೋಟಾರ್​ಸೈಕಲ್ ಕಾರವಾನ್ ಸಂಚರಿಸುತ್ತಿದ್ದದ್ದನ್ನು ಡ್ರೋನ್ ಮೂಲಕ ಪತ್ತೆ ಹಚ್ಚಲಾಗಿದ್ದು, ಬಳಿಕ ದಾಳಿ ನಡೆಸಲಾಗಿದೆ. 30 ಕಾರವಾನ್​ಗಳು ನಾಶವಾಗಿದ್ದು, 50 ಉಗ್ರರು ಸಾವನ್ನಪ್ಪಿದ್ದಾರೆ. ಈ ಮೂಲಕ ಉಗ್ರರ ದೊಡ್ಡ ಸಂಚು ವಿಫಲವಾಗಿದೆ ಎಂದು ಫ್ರೆಂಚ್ ರಕ್ಷಣಾ ಸಚಿವೆ ಫ್ಲಾರೆನ್ಸ್ ಪಾರ್ಲಿ ಮಾಹಿತಿ ನೀಡಿದ್ದಾರೆ.

ಅಲ್ಲದೇ ನಾಲ್ವರು ಉಗ್ರರನ್ನು ಸೆರೆಹಿಡಿಯಲಾಗಿದೆ ಎಂದು ಫ್ರಾನ್ಸ್ ಮಿಲಿಟರಿ ವಕ್ತಾರ ಕರ್ನಲ್ ಫ್ರೆಡೆರಿಕ್ ಬಾರ್ಬ್ರಿ ಹೇಳಿದ್ದಾರೆ.