ಬಹುಭಾಷಾ ತಾರೆ ತಮನ್ನಾ ಭಾಟಿಯಾ ಮತ್ತು ನಟ ವಿಜಯ್ ವರ್ಮಾ ನಡುವಿನ ಸಂಬಂಧ ಈಗಾಗಲೇ ಅಧಿಕೃತಗೊಂಡಿದೆ. ಇಬ್ಬರು ಪ್ರೀತಿಸುತ್ತಿರುವುದಾಗಿ ಬಹಿರಂಗವಾಗಿ ಒಪ್ಪಿಕೊಂಡಿದ್ದಾರೆ. ಈ ಜೋಡಿ ತಮ್ಮ ಸಂಬಂಧವನ್ನು ಸಾರ್ವಜನಿಕವಾಗಿ ಘೋಷಿಸುವ ಮೊದಲು ಅವರ ರಿಲೇಷನ್ಶಿಪ್ ಬಗ್ಗೆ ಕೆಲ ವದಂತಿಗಳಿದ್ದವು. ಸದ್ಯ ಈ ಬ್ಯೂಟಿಫುಲ್ ಕಪಲ್ ಕೆಲವು ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಜೊತೆಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ವಿಭಿನ್ನ ಸಂದರ್ಭಗಳಲ್ಲಿ ಪರಸ್ಪರ ತಮ್ಮ ಭಾವನೆಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ.
ಇದೀಗ, ವಿಜಯ್ ವರ್ಮಾ ಅವರ ಮುಂಬರುವ ವೆಬ್ಸಿರೀಸ್ 'ಕಾಲ್ಕೂಟ್' ಸ್ಕ್ರೀನಿಂಗ್ ಈವೆಂಟ್ಗೆ ತಮನ್ನಾ ಕೂಡ ಹಾಜರಾಗಿದ್ದರು. ವಿಜಯ್ ಮತ್ತು ತಮನ್ನಾ ಅವರು ಪಾಪರಾಜಿಗಳಿಗೆ ಪೋಸ್ ಕೊಡುತ್ತಿರುವ ವೇಳೆ ಸಂತೋಷದಿಂದ ಹೊಳೆಯುತ್ತಿದ್ದರು. ಪಾಪರಾಜಿಗಳು ಅವರಿಬ್ಬರನ್ನು ಕಾಲೆಳೆದರು. ಈ ವೇಳೆ ಸುಂದರ ಜೋಡಿ ನಾಚಿಕೆಯೊಂದಿಗೆ ಚಂದನೆಯ ನಗು ಬೀರಿದರು. ಸದ್ಯ ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಅನೇಕರ ಹೃದಯ ಗೆದ್ದಿದೆ.
ಗೆಳೆಯನ 'ಕಾಲ್ಕೂಟ್' ಸ್ಕ್ರೀನಿಂಗ್ ಈವೆಂಟ್ಗೆ ತಮನ್ನಾ ಗುಲಾಬಿ ಬಣ್ಣದ ಜಾಕೆಟ್ನೊಂದಿಗೆ ಬಿಳಿ ಬಣ್ಣದ ಟ್ಯಾಂಕ್ ಟಾಪ್ ಧರಿಸಿದ್ದರು. ಅದಕ್ಕೆ ಹೊಂದುವಂತಹ ಪ್ಯಾಂಟ್ ಅನ್ನು ಆಯ್ದುಕೊಂಡಿದ್ದರು. ಸಿಂಪಲ್ಲಾಗಿ ಬ್ಯೂಟಿಫುಲ್ ಆಗಿ ಕಾಣಿಸುತ್ತಿದ್ದರು. ಇನ್ನೂ, ವಿಜಯ್ ವರ್ಮಾ ಅವರು ನೀಲಿ ಬಣ್ಣದ ಜಾಕೆಟ್ಗೆ ಬಿಳಿ ಬಣ್ಣದ ಶರ್ಟ್ ಮತ್ತು ಮ್ಯಾಚಿಂಗ್ ಪ್ಯಾಂಟ್ ಜೊತೆ ಆಕರ್ಷಕವಾಗಿ ಕಂಡರು. ಇವರಿಬ್ಬರ ಅದ್ಭುತ ನೋಟ ಎಲ್ಲರನ್ನು ಸೆಳೆಯುವಲ್ಲಿ ಯಶಸ್ವಿಯಾಯಿತು.
ಇನ್ನು ತಮನ್ನಾ ಮತ್ತು ವಿಜಯ್ ನಡುವಿನ ಪ್ರೀತಿ ಸುಜಯ್ ಘೋಷ್ ನಿರ್ದೇಶನದ 'ಲಸ್ಟ್ ಸ್ಟೋರಿಸ್ 2' ಸೆಟ್ನಲ್ಲಿ ಹುಟ್ಟಿಕೊಂಡಿತು. ಗೋವಾದಲ್ಲಿ ನಡೆದ ನ್ಯೂ ಇಯರ್ ಪಾರ್ಟಿಯಲ್ಲಿ ಪರಸ್ಪರ ಚುಂಬನದ ದೃಶ್ಯಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುವವರೆಗೆ ಈ ಜೋಡಿ ತಮ್ಮ ವಿಚಾರವನ್ನು ಮರೆಮಾಚಿದ್ದರು. ಈ ಚಿತ್ರ ಬಹಿರಂಗಗೊಂಡ ಬಳಿಕ ಇವರಿಬ್ಬರ ನಡುವಿನ ಸಂಬಂಧದ ಕುರಿತು ಹಲವು ಊಹಾಪೋಹಗಳು ಎದ್ದವು. ಇವರಿಬ್ಬರ ಆತ್ಮೀಯ ದೃಶ್ಯಗಳು ತೆರೆ ಮೇಲೆ ಮೋಡಿ ಮಾಡಿದವು.
ನಂತರದಲ್ಲಿ ಈ ಜೋಡಿ ಸಿನಿಮಾ ಮತ್ತು ಡಿನ್ನರ್ ಡೇಟ್ಗಳಲ್ಲಿ ಜೊತೆಯಾಗಿ ಕಾಣಿಸಿಕೊಂಡಿದ್ದರು. ಮತ್ತೊಂದು ಮುಖ್ಯ ವಿಚಾರವೆಂದರೆ, ನಟಿ ತಮನ್ನಾ ತಮ್ಮ 17 ವರ್ಷದ ಸಿನಿ ಜೀವನದಲ್ಲಿ ನೋ ಕಿಸ್ಸಿಂಗ್ ಪಾಲಿಸಿಯನ್ನು ಅಂದರೆ, ತೆರೆ ಮೇಲೆ ನಟರಿಗೆ ಮುತ್ತಿಕ್ಕುವ ದೃಶ್ಯಗಳಲ್ಲಿ ನಟಿಸುವುದಿಲ್ಲ ಎಂಬ ನಿರ್ಣಯವನ್ನು ತೆಗೆದುಕೊಂಡಿದ್ದರು. ಆದರೆ, ಲಸ್ಟ್ ಸ್ಟೋರಿಸ್ನಲ್ಲಿ ಅವರು ತಮ್ಮ ಈ ನಿಯಮವನ್ನು ಮುರಿದು, ತೆರೆ ಮೇಲೆ ಮೊದಲ ಬಾರಿಗೆ ನಟ ವಿಜಯ್ ಅವರಿಗೆ ಮುತ್ತಿಕ್ಕಿದ್ದರು.
'ಕಾಲ್ಕೂಟ್' ವೆಬ್ಸಿರೀಸ್ನಲ್ಲಿ ವಿಜಯ್ ವರ್ಮಾ, ಶ್ವೇತಾ ತ್ರಿಪಾಠಿ, ಸೀಮಾ ಬಿಸ್ವಾಸ್, ಯಶಪಾಲ್ ಶರ್ಮಾ ಮತ್ತು ಗೋಪಾಲ್ ದತ್ ನಟಿಸಿದ್ದಾರೆ. ಇದು ಸುಮಿತ್ ಸಕ್ಸೇನಾ ನಿರ್ದೇಶಿಸಿದ ಕ್ರೈಮ್ ವೆಬ್ ಸಿರೀಸ್ ಆಗಿದೆ. ವಿಜಯ್ ವರ್ಮಾ ಅವರು ಪೊಲೀಸ್ ಅಧಿಕಾರಿಯಾಗಿ ನಟಿಸಿದ್ದಾರೆ. ಕಥೆ ಕೂಡ ಅವರ ಸುತ್ತ ಸುತ್ತುತ್ತದೆ. ಜುಲೈ 27 ರಿಂದ JioCinema (ಜಿಯೋ ಸಿನಿಮಾ) ನಲ್ಲಿ ಈ ಸರಣಿಯು ಸ್ಟ್ರೀಮಿಂಗ್ ಆಗಲಿದೆ.
ಇದನ್ನೂ ಓದಿ: RARKPK: ನಾಲ್ಕೇ ದಿನದಲ್ಲಿ ₹50 ಕೋಟಿ ಬಾಚಿದ 'ರಾಕಿ ಔರ್ ರಾಣಿ ಕಿ ಪ್ರೇಮ್ ಕಹಾನಿ'
