ಬೆಂಗಳೂರು: ಬಾಲನಟನಿಂದ ಈವರೆಗೂ 45 ಸಿನಿಮಾಗಳಲ್ಲಿ ನಟಿಸಿರುವ ಸ್ಯಾಂಡಲ್‌ವುಡ್ ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಬದುಕಿದ್ದಿದ್ದರೆ ಲೂಸಿಯಾ ಚಿತ್ರದ ನಿರ್ದೇಶಕ ಪವನ್ ಕುಮಾರ್ ಕಾಂಬಿನೇಷನ್‌ನಲ್ಲಿ 'ದ್ವಿತ್ವ' ಚಿತ್ರವನ್ನು ನಿರ್ಮಾಣವಾಗಬೇಕಾಗಿತ್ತು. ಆದರೆ, ದುರಾದೃಷ್ಟವಶಾತ್ ಪುನೀತ್ ನಮ್ಮನ್ನಗಲಿದರು. ಪರಿಣಾಮ ಈ ವೇಳೆಗೆ ತೆರೆಗೆ ಬರಬೇಕಾಗಿದ್ದ ಚಿತ್ರದ ಚಿತ್ರೀಕರಣ ಪ್ರಾರಂಭಕ್ಕೂ ಮುನ್ನವೇ ಸ್ಥಗಿತಗೊಳ್ಳಬೇಕಾಯಿತು. ಇದು ಅವರ ಸಿನಿ ಪಯಣದಲ್ಲಿ ಸ್ಥಗಿತಗೊಂಡಿದ್ದ ಏಕೈಕ ಚಿತ್ರ ಎನ್ನಲಾಗುತ್ತಿದೆ.
ಬಿಡುಗಡೆಗೊಂಡಿದ್ದ ಫಸ್ಟ್ ಲುಕ್: ಯಾವುದೇ ಚಿತ್ರವಾದರೂ ನಟ-ನಟಿಯ ಫಸ್ಟ್ ಲುಕ್ ಬಹಳ ಮುಖ್ಯ. ಆದರೆ, ಇದೇ ಮೊದಲ ಬಾರಿಗೆ 'ದ್ವಿತ್ವ' ಸಿನಿಮಾಗೆ ವಿಭಿನ್ನವಾದ ರೀತಿಯಲ್ಲಿ ಫಸ್ಟ್ ಲುಕ್ ಬಿಡುಗಡೆಗೊಂಡಿತ್ತು. ನಿರ್ದೇಶಕ ಪವನ್ ಕುಮಾರ್ ಅವರು ಪುನೀತ್ ರಾಜ್ಕುಮಾರ್ ಅವರಿಗೆ ಹಲವಾರು ಗೆಟಪ್ ಹಾಕಿಸಿ ಫೋಟೋ ತೆಗೆಸಿದ್ದರು. ಯಾವುದು ಪುನೀತ್ ರಾಜ್ಕುಮಾರ್ಗೆ ಸೂಟ್ ಆಗುತ್ತೆ ಅಂತ ಟೆಸ್ಟ್ ಮಾಡಲಾಗಿತ್ತು. ಆ ಒಂದು ಫೋಟೋ ಕೆಲ ದಿನಗಳ ಹಿಂದೆ ವೈರಲ್ ಆಗಿತ್ತು. ಅಪ್ಪು ಮೀಸೆ ಬಿಟ್ಟ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿತ್ತು.
'ದ್ವಿತ್ವ' ಸಿನಿಮಾ ಕುರಿತಂತೆ ವಿವರಿಸಿದ್ದ ಪವನ್ ಕುಮಾರ್, ಇದು ಅಪ್ಪು ಅವರ ಸಿನಿ ಕೆರಿಯರ್ನಲ್ಲೇ ಡಿಫ್ರೆಂಟ್ ಸಿನಿಮಾ ಆಗಲಿದೆ ಎಂದು ತಿಳಿಸಿದ್ದರು. ಅಷ್ಟೇ ಅಲ್ಲದೆ, ದಕ್ಷಿಣ ಭಾರತದ ಖ್ಯಾತ ನಟಿ ತ್ರಿಶಾ ಕೃಷ್ಣನ್ ಅವರು ಈ ಸಿನಿಮಾಗೆ ನಾಯಕಿಯಾಗುವ ಮೂಲಕ ಇನ್ನಷ್ಟು ಕುತೂಹಲ ಕೆರಳಿಸಿತ್ತು. ಚಿತ್ರದಲ್ಲಿ ತ್ರಿಶಾ ಅವರು ಕಾರ್ಪೊರೇಟ್ ಕಂಪನಿಯೊಂದರ ಉದ್ಯೋಗಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಿದ್ದರು.
ಇದನ್ನೂ ಓದಿ: ನಾಳೆ ಪುನೀತ್ ಪುಣ್ಯ ಸ್ಮರಣೆಗೆ ಸಿದ್ಧತೆ: ಕಂಠೀರವ ಸ್ಟುಡಿಯೋದಲ್ಲಿ 24 ಗಂಟೆ ಗೀತ ನಮನ
