ಮಿಲ್ಕಿ ಬ್ಯೂಟಿ ತಮನ್ನಾ ಸೌಂದರ್ಯಕ್ಕೆ ಅನೇಕರು ಮಾರು ಹೋಗಿದ್ದಾರೆ. ಸದಾ ಹೊಳೆಯುವಂತೆ ಕಾಣುವ ಚರ್ಮ ಮತ್ತು ಸುಂದರವಾದ ಕೂದಲಿಗೆ ಹುಡುಗಿಯರಂತೂ ಫಿದಾ ಆಗಿದ್ದಾರೆ. ಈ ಬಗ್ಗೆ ತಮನ್ನಾ ತನ್ನ ಸೌಂದರ್ಯಕ್ಕೆ ನೈಸರ್ಗಿಕ ಪದಾರ್ಥಗಳೇ ಕಾರಣ ಎಂದು ಅನೇಕ ಸಂದರ್ಭಗಳಲ್ಲಿ ಹೇಳಿಕೊಂಡಿದ್ದಾರೆ. ಈ ಚೆಲುವೆ ಮತ್ತೊಮ್ಮೆ ಲಾಕ್ಮೆ ಫ್ಯಾಶನ್ ವೀಕ್ನಲ್ಲಿ ತಮ್ಮ ಬ್ಯೂಟಿ ಬಗ್ಗೆ ಮಾತನಾಡಿದ್ದಾರೆ. ಖ್ಯಾತ ಡಿಸೈನರ್ ಪ್ರೀತಿ ಜೈನ್ ವಿನ್ಯಾಸಗೊಳಿಸಿದ ದೇಹವನ್ನು ಅಪ್ಪಿಕೊಳ್ಳುವ ಕಪ್ಪು ಬಣ್ಣದ ಉಡುಗೆಯಲ್ಲಿ ಹಾಲ್ಗೆನ್ನೆ ಸುಂದರಿ ಈ ವೇದಿಕೆಯಲ್ಲಿ ಕಾಣಿಸಿಕೊಂಡರು. ಹಾಗಾದರೆ ಏನವರ ಸೌಂದರ್ಯದ ಗುಟ್ಟು.
ರೇಷ್ಮೆಯಂತ ಕೂದಲಿಗಾಗಿ ಹೀಗೆ ಮಾಡಿ: ನನ್ನ ರೇಷ್ಮೆಯಂತಹ ಕೂದಲನ್ನು ನಾನು ಪ್ರೀತಿಸುತ್ತೇನೆ. ಆದರೆ ಇಷ್ಟು ಚೆಂದದ ಕೂದಲಿನ ಹಿಂದೆ ಒಂದು ರಹಸ್ಯವಿದೆ. ನಾನು ಕೂದಲಿಗೆ ತೆಂಗಿನ ಎಣ್ಣೆ ಮತ್ತು ಈರುಳ್ಳಿ ರಸ ಮಿಶ್ರಣ ಮಾಡಿದ ಹೇರ್ ಆಯಿಲ್ ಅನ್ನು ಬಳಸುತ್ತೇನೆ. ವಾರಕ್ಕೊಮ್ಮೆ ಈ ಎಣ್ಣೆಯಿಂದ ನಿಮ್ಮ ಕೂದಲು ಮತ್ತು ನೆತ್ತಿಯನ್ನು ಮಸಾಜ್ ಮಾಡಿ. ಅದರ ನಂತರ ಪಪ್ಪಾಯಿ ಮತ್ತು ಆಮ್ಲಾ ಮುಂತಾದ ಪದಾರ್ಥಗಳಿಂದ ಮಾಡಿದ ಹೇರ್ವಾಶ್‌ನಿಂದ ನಿಮ್ಮ ಕೂದಲನ್ನು ತೊಳೆಯಿರಿ. ಈ ದಿನಚರಿಯು ನನ್ನ ಕೂದಲನ್ನು ರೇಷ್ಮೆಯಂತಾಗಿಸುತ್ತದೆ ಮತ್ತು ಹೊಳೆಯುವಂತೆ ಮಾಡುತ್ತದೆ. ಜೊತೆಗೆ ಕೂದಲು ದಟ್ಟವಾಗಿ ಬೆಳೆಯುತ್ತದೆ.
ಐಸ್ವಾಟರ್ನಿಂದ ಈ ಸಮಸ್ಯೆ ದೂರ: ರಾತ್ರಿ ತಡವಾಗಿ ಮಲಗಿದರೆ, ಸರಿಯಾಗಿ ನಿದ್ದೆ ಮಾಡದಿದ್ದರೆ ಅಥವಾ ಒತ್ತಡಕ್ಕೆ ಒಳಗಾಗಿದ್ದರೆ ಅದರ ಪರಿಣಾಮ ಮರುದಿನ ಎದ್ದಾಗ ಮುಖದ ಮೇಲೆ ಕಾಣುತ್ತದೆ. ಆದರೆ, ಈ ಸಮಸ್ಯೆಗೆ ನಾನು ಸರಳವಾದ ಸಲಹೆಯನ್ನು ಅನುಸರಿಸುತ್ತೇನೆ. ಅದೇನೆಂದರೆ ಒಂದು ಬೌಲ್ನಲ್ಲಿ ಐಸ್ ವಾಟರ್ ತೆಗೆದುಕೊಂಡು, ಕೆಲವು ಸೆಕೆಂಡ್ಗಳ ಕಾಲ ಅದರಲ್ಲಿ ನಿಮ್ಮ ಮುಖವನ್ನು ಅದ್ದಿ. ಹೀಗೆ ಮಾಡುವುದರಿಂದ ಚರ್ಮದ ರಂಧ್ರಗಳು ತೆರೆಯುತ್ತದೆ ಮತ್ತು ಪಫಿನೆಸ್ ಮಾಯವಾಗುತ್ತದೆ. ಜೊತೆಗೆ ನನ್ನ ಚರ್ಮವು ಮತ್ತೆ ಮೇಕಪ್ ಮಾಡಲು ಸಿದ್ಧವಾಗುತ್ತದೆ. ವೈಯಕ್ತಿಕ ಅನುಭವದಿಂದ ಹೇಳುವುದಾದರೆ ಈ ಸಲಹೆಯು ಅದ್ಭುತಗಳನ್ನು ಮಾಡುತ್ತದೆ. ನೀವು ಬೇಕಾದರೆ ಇದನ್ನು ಪ್ರಯತ್ನಿಸಿ.
ಇದು ನನ್ನ ನೆಚ್ಚಿನ ಫೇಸ್ ಪ್ಯಾಕ್: ನಾನು ಶೂಟಿಂಗ್ ಮಾಡುವಾಗ ಸಹಜವಾಗಿ ಮೇಕಪ್ ಮಾಡಬೇಕಾಗುತ್ತದೆ. ಆದರೆ, ವಾಸ್ತವವಾಗಿ ನಾನು ಮೇಕಪ್ ಇಲ್ಲದೇ ಇರಲು ಇಷ್ಟಪಡುತ್ತೇನೆ. ಹೀಗಾಗಿ ನಾನು ಹೆಚ್ಚಾಗಿ ಮನೆಯಲ್ಲಿ ಕಂಡುಬರುವ ನೈಸರ್ಗಿಕ ಪದಾರ್ಥಗಳ ಫೇಸ್ ಪ್ಯಾಕ್ ತಯಾರಿಸುತ್ತೇನೆ. ಬೇಳೆ ಹಿಟ್ಟು, ಅರಿಶಿನ, ಶ್ರೀಗಂಧ, ಮತ್ತು ಬೇವುಗಳಿಂದ ಮಾಡಿದ ಪ್ಯಾಕ್ ನನಗೆ ಹೆಚ್ಚು ಇಷ್ಟ. ಇದು ಉತ್ತಮ ಸ್ಕ್ರಬ್ ಆಗಿಯೂ ಕೆಲಸ ಮಾಡುತ್ತದೆ. ಇಷ್ಟೇ ಅಲ್ಲದೇ ನೀವು ತಿನ್ನುವ ಆಹಾರದ ಬಗ್ಗೆಯೂ ಜಾಗರೂಕರಾಗಿರಿ. ಚರ್ಮದ ಆರೋಗ್ಯ ಸುಧಾರಿಸಲು ಆವಕಾಡೊ ಮತ್ತು ಬ್ರೊಕೊಲಿಯನ್ನು ಹೆಚ್ಚು ಸೇವಿಸಿ. ಚೆನ್ನಾಗಿ ನೀರು ಕುಡಿಯಿರಿ.
ಆಹಾರ ಕ್ರಮಗಳನ್ನು ಅನುಸರಿಸಿ: ಸೌಂದರ್ಯ ಎನ್ನುವುದು ನಾವು ಬಳಸುವ ಸೌಂದರ್ಯವರ್ಧಕ ಉತ್ಪನ್ನಗಳಲ್ಲಿ ಮಾತ್ರವಲ್ಲ. ನಾವು ಸೇವಿಸುವ ಆಹಾರದ ಮೇಲೂ ಅವಲಂಬಿತವಾಗಿರುತ್ತದೆ. ಹೀಗಾಗಿ ವಿವಿಧ ರೀತಿಯ ಡಯಟ್ ಟ್ರೆಂಡ್ ಗಳನ್ನು ಅನುಸರಿಸುವುದು ಹಲವರ ಅಭ್ಯಾಸ. ನಾನು ಕೂಡ ಈ ಹಿಂದೆ ವಿವಿಧ ಆಹಾರ ಕ್ರಮಗಳನ್ನು ಅನುಸರಿಸಿದ್ದೇನೆ. ಆದರೆ ಯಾವುದೂ ಫಲಿಸಲಿಲ್ಲ.
ಅದಕ್ಕಾಗಿ ನಾನು ಆಹಾರದ ವಿಷಯವಾಗಿ ಕೆಲವೊಂದು ದಿನಚರಿಗಳನ್ನು ಅಳವಡಿಸಿಕೊಂಡಿದ್ದೇನೆ. ಉದಾಹರಣೆಗೆ ಇಂದು ಸಂಜೆ 5.30ಕ್ಕೆ ನಾನು ತಿಂದರೆ ಮರುದಿನ ಬೆಳಗ್ಗೆ 6 ಗಂಟೆಯವರೆಗೆ ಏನನ್ನೂ ತಿನ್ನುವುದಿಲ್ಲ. ಇದರಿಂದ ನನ್ನ ಸೌಂದರ್ಯ ಇಮ್ಮಡಿಗೊಂಡಿದೆ. ನೀವು ಈ ಡಯಟ್ ಟ್ರೆಂಡ್ ಅನುಸರಿಸಲು ಬಯಸಿದರೆ, ಮೊದಲು ತಜ್ಞರ ಸಲಹೆಯನ್ನು ತೆಗೆದುಕೊಳ್ಳಿ. ಅದರ ನಂತರ, ನಿಮ್ಮ ಶಕ್ತಿಯ ಮಟ್ಟವನ್ನು ಅವಲಂಬಿಸಿ ನೀವು ಊಟದ ನಡುವಿನ ಅಂತರವನ್ನು ಹೆಚ್ಚಿಸಬಹುದು.
ಮೇಕಪ್ ತೆಗೆದು ಮಲಗಿ: ಸೌಂದರ್ಯವನ್ನು ಕಾಪಾಡಿಕೊಳ್ಳುವ ಭಾಗವಾಗಿ ನಾವು ಮಾಡಿಕೊಳ್ಳುವ ಮೇಕಪ್ ಅನ್ನು ರಿಮೂವ್ ಮಾಡುವುದು ಕೂಡ ಬಹಳ ಮುಖ್ಯ. ಒಂದು ದಿನ ಮೇಕಪ್ ತೆಗೆಯದೇ ಮಲಗಿದರೆ ಮರುದಿನ ಚರ್ಮ ಒಣಗಿ ನಿರ್ಜೀವವಾಗಿ ಕಾಣುತ್ತದೆ. ರಾತ್ರಿ ಎಷ್ಟೇ ತಡವಾದರೂ ಮೇಕಪ್ ತೆಗೆದೇ ಮಲಗುತ್ತೇನೆ. ಮಲಗುವ ಮುನ್ನ ನೈಟ್ ಕ್ರೀಮ್ ಮತ್ತು ಐ ಕ್ರೀಂ ಹಚ್ಚಿಕೊಳ್ಳುವುದನ್ನೂ ಮರೆಯುವುದಿಲ್ಲ.
ಸರಿಯಾದ ಡ್ರೆಸ್ಸಿಂಗ್ ಮುಖ್ಯ: ಡ್ರೆಸ್ಸಿಂಗ್ ಕೂಡ ನಮ್ಮ ಸೌಂದರ್ಯವನ್ನು ಇಮ್ಮಡಿಗೊಳಿಸುತ್ತದೆ. ನನ್ನ ಬಟ್ಟೆಯ ಆಯ್ಕೆಯು ನನ್ನ ಮನಸ್ಥಿತಿ ಮತ್ತು ಆಲೋಚನೆಗಳನ್ನು ಅವಲಂಬಿಸಿರುತ್ತದೆ. ಮೇಲಾಗಿ ನಾನು ಟ್ರೆಂಡ್ ಅನ್ನು ಕುರುಡಾಗಿ ಅನುಸರಿಸುವುದಿಲ್ಲ. ನೀವು ಯಾವುದೇ ಉಡುಪನ್ನು ಆರಿಸಿಕೊಂಡರೂ, ಅದು ನಿಮಗೆ ಕಂಪರ್ಟ್ ಆಗಿರಬೇಕು. ನಾನು ನನಗೆ ಸರಿ ಹೊಂದುವಂತಹ ಡ್ರೆಸ್ಗಳನ್ನೇ ಆಯ್ದುಕೊಳ್ಳುತ್ತೇನೆ.
ಪ್ರತಿದಿನ ವ್ಯಾಯಾಮ ಮಾಡಿ: ಹಲ್ಲಿನ ಆರೈಕೆಗಾಗಿ ನಾವು ಪ್ರತಿದಿನ ನಮ್ಮ ಹಲ್ಲುಗಳನ್ನು ಬ್ರಷ್ ಮಾಡಿದಂತೆ, ದೇಹವನ್ನು ಆರೋಗ್ಯಕರ ಮತ್ತು ಸಂತೋಷವಾಗಿರಲು ದೈನಂದಿನ ವ್ಯಾಯಾಮ ಮುಖ್ಯವಾಗಿದೆ. ನಾವು ಪ್ರತಿದಿನ ಅನೇಕ ವಿಷಯಗಳಲ್ಲಿ ಸಂತೋಷವನ್ನು ಹುಡುಕುತ್ತೇವೆ. ಅದರಲ್ಲಿ ವ್ಯಾಯಾಮವೂ ಒಂದು. ಇದು ದಿನವಿಡೀ ನನ್ನನ್ನು ಧನಾತ್ಮಕವಾಗಿರಿಸುತ್ತದೆ. ದೇಹಕ್ಕೆ ಶಕ್ತಿಯನ್ನು ನೀಡುತ್ತದೆ. ಒಳ್ಳೆಯ ವಿಚಾರಗಳನ್ನು ಮುಂದಕ್ಕೆ ತರುವುದು, ಅಂದವನ್ನು ಇಮ್ಮಡಿಗೊಳಿಸಲು ಬೇಕಿರುವುದು ಈ ರೀತಿಯ ಸಕಾರಾತ್ಮಕತೆ.
ಇದನ್ನೂ ಓದಿ: ನಾಟು ನಾಟು ಸಾಧನೆಗೆ ಅಮೆರಿಕನ್ ಗಾಯಕ ಪ್ರಶಂಸೆ: ಭಾವುಕರಾದ ಕೀರವಾಣಿ, RRR ತಂಡ
