'ರಾಝಿ ಸಿನಿಮಾದಲ್ಲಿ ಆಲಿಯಾ ಭಟ್ ಅಭಿನಯ ಅಮೋಘ, ಕಣ್ಣೀರು ತಡೆಯಲಾಗಲಿಲ್ಲ': ಸುಧಾ ಮೂರ್ತಿ

ಸುಧಾ ಮೂರ್ತಿ ಅವರು ಆಲಿಯಾ ಭಟ್​ ಅಭಿನಯದ ಬಗ್ಗೆ ಗುಣಗಾನ ಮಾಡಿದ್ದಾರೆ.

ಇನ್ಫೋಸಿಸ್ ಫೌಂಡೇಶನ್‌ನ ಅಧ್ಯಕ್ಷೆ ಸುಧಾ ಮೂರ್ತಿ ಅವರು ಸಿನಿಮಾ ಬಗ್ಗೆ ತಮ್ಮ ಪ್ರೀತಿಯನ್ನು, ಮೆಚ್ಚುಗೆಯನ್ನು ಆಗಾಗ್ಗೆ ವ್ಯಕ್ತಪಡಿಸಿದ್ದಾರೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ, ಅವರು ಚಲನಚಿತ್ರಗಳ ಮೇಲಿನ ಉತ್ಸಾಹವನ್ನು ವ್ಯಕ್ತಪಡಿಸಿದ್ದಾರೆ. ರಾಝಿ (Raazi) ಸಿನಿಮಾದಲ್ಲಿ ಬಾಲಿವುಡ್​ ನಟಿ ಆಲಿಯಾ ಭಟ್ ಅವರ ಅಭಿನಯವು ಅಮೋಘ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ವರ್ಷ ಕಳೆದಂತೆ ಸುಧಾ ಮೂರ್ತಿ ಅವರ ಮೆಚ್ಚಿನ ತಾರೆಯರ ಪಟ್ಟಿ ದೊಡ್ಡದಾಗುತ್ತಾ ಬಂದಿದೆ. ಲೆಜೆಂಡರಿ ಆ್ಯಕ್ಟರ್ ದಿಲೀಪ್ ಕುಮಾರ್, ಎವರ್ ಚಾರ್ಮಿಂಗ್ ರಾಜೇಶ್ ಖನ್ನಾರಿಂದ ಹಿಡಿದು ಬಹುಮುಖ ಪ್ರತಿಭೆ ಹೃತಿಕ್ ರೋಷನ್ ಮತ್ತು ಬಾಲಿವುಡ್‌ ಕಿಂಗ್​ ಶಾರುಖ್ ಖಾನ್​ವರೆಗೆ ಸುಧಾ ಮೂರ್ತಿ ಅವರು ತಮ್ಮ ಜೀವನದ ವಿವಿಧ ಹಂತಗಳಲ್ಲಿ ಹಲವು ನಟರ ಅದ್ಭುತ ಅಭಿನಯವನ್ನು ಆನಂದಿಸಿದ್ದಾರೆ. ನಟರ ಪ್ರತಿಭೆಯನ್ನು ಮೆಚ್ಚಿ ಕೊಂಡಾಡಿದ್ದಾರೆ. ಮಿಸ್ಟರ್​ ಪರ್ಫೆಕ್ಷನಿಸ್ಟ್ ಅಮೀರ್ ಖಾನ್ ಮತ್ತು ಪ್ರತಿಭಾವಂತ ನಟ ಆಯುಷ್ಮಾನ್ ಖುರಾನಾ ಕೂಡ ಸುಧಾ ಮೂರ್ತಿ ಅವರ ಮೇಲೆ ಸಾಕಷ್ಟು ಪ್ರಭಾವ ಬೀರಿದ್ದಾರೆ.

ನಟಿಯರ ವಿಷಯಕ್ಕೆ ಬಂದರೆ, 1950ರ ದಶಕದ ಬಹುಬೇಡಿಕೆ ನಟಿ ವೈಜಂತಿಮಾಲಾ ಅವರಿಂದ ಹಿಡಿದು ಇಂದಿನ ಆಲಿಯಾ ಭಟ್​ ವರೆಗೂ ಹಲವು ಮಂದಿ ಇದ್ದಾರೆ. ಸುಧಾ ಮೂರ್ತಿ ಅವರು ನಟಿ ವೈಜಯಂತಿಮಾಲಾ ಅವರ ಕಟ್ಟಾ ಅಭಿಮಾನಿ ಕೂಡ ಹೌದು. ಅಸಾಧಾರಣ ನಟನಾ ಪ್ರತಿಭೆಯಿಂದ ಪ್ರೇಕ್ಷಕರನ್ನು ಮಂತ್ರಮುಗ್ಧರನ್ನಾಗಿಸುವ ನರ್ಗೀಸ್‌ ಅವರಂತಹ ನಟಿಮಣಿಯರೂ ಕೂಡ ಸುಧಾ ಮೂರ್ತಿಯವರ ಮೆಚ್ಚಿನ ನಟಿಯರ ಪಟ್ಟಿಯಲ್ಲಿದ್ದಾರೆ. ಇತ್ತೀಚಿನ ದಿನಗಳಲ್ಲಿ, ಸುಧಾ ಅವರು ಬಾಲಿವುಡ್​ ಬಹುಬೇಡಿಕೆ ನಟಿ ಆಲಿಯಾ ಭಟ್ ಅವರ ಅದ್ಭುತ ಪ್ರತಿಭೆಗೆ ಪ್ರಭಾವಿತರಾಗಿದ್ದಾರೆ. ಅವರನ್ನು ಗಮನಾರ್ಹ ನಟಿ ಎಂದು ಕೂಡ ಪರಿಗಣಿಸುತ್ತಾರೆ.

ನಟಿ ಆಲಿಯಾ ಭಟ್ ಅವರು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ರಾಝಿ ಸಿನಿಮಾ ಸುಧಾ ಅವರ ಮೇಲೆ ಪ್ರಭಾವ ಬೀರಿದೆ. ಈ ಚಿತ್ರ ವೀಕ್ಷಿಸಿ ಇನ್ಫೋಸಿಸ್ ಫೌಂಡೇಶನ್‌ನ ಅಧ್ಯಕ್ಷೆ ಭಾವುಕರಾಗಿದ್ದಾರಂತೆ. ಇತ್ತೀಚಿನ ಸಂದರ್ಶನದಲ್ಲಿ ಈ ಚಿತ್ರದ ಬಗ್ಗೆ ಮಾತನಾಡುತ್ತ, ಮೇಘನಾ ಗುಲ್ಜಾರ್ ಅವರ ನಿರ್ದೇಶನದ ಈ ಸಿನಿಮಾ ಉತ್ತಮವಾಗಿದೆ. ಆಲಿಯಾ ಅವರ ಅಸಾಧಾರಣ ನಟನಾ ಸಾಮರ್ಥ್ಯಕ್ಕೆ ರಾಝಿ ಸಿನಿಮಾ ಸಾಕ್ಷಿಯಾಗಿದ್ದು, ಚಿತ್ರವನ್ನು ವೀಕ್ಷಿಸುವಾಗ ಕಣ್ಣೀರು ಸುರಿಸುವುದನ್ನು ತಡೆಯಲಾಗಲಿಲ್ಲ ಎಂದು ತಿಳಿಸಿದರು.

ಇದನ್ನೂ ಓದಿ: ಗಲ್ಲಿಭಾಯ್​ ಬಳಿಕ ರಾಕಿ ರಾಣಿ ಲವ್​ಸ್ಟೋರಿ: ಭರ್ಜರಿ ಪ್ರಚಾರದಲ್ಲಿ ರಣ್​ವೀರ್​-ಆಲಿಯಾ; ಹಿಟ್​ ಹಿಸ್ಟರಿ ಮರುಕಳಿಸುತ್ತಾ?

ಈ ಹಿಂದೆ ಜನಪ್ರಿಯ ದಿ ಕಪಿಲ್ ಶರ್ಮಾ ಶೋನಲ್ಲಿ ಕಾಣಿಸಿಕೊಂಡಿದ್ದ ವೇಳೆ ಮತ್ತು ಜನಪ್ರಿಯ ಚಲನಚಿತ್ರ ವಿಮರ್ಶಕರೊಂದಿಗಿನ ಸಂದರ್ಶನದಲ್ಲಿ, ಸುಧಾ ಮೂರ್ತಿ ಅವರು ಸಿನಿಮಾ ಕುರಿತು ಮಾತನಾಡಿದ್ದರು. ತಮ್ಮ ಕುಟುಂಬಸ್ಥರು ಮತ್ತು ಸ್ನೇಹಿತರೊಂದಿಗೆ ಸಿನಿಮಾ ಕುರಿತು ಸುದೀರ್ಘ ಚರ್ಚೆ ನಡೆಸುವುದನ್ನು ಇಷ್ಟ ಪಡುತ್ತೇನೆ ಎಂದು ಹೇಳಿದ್ದರು. ಎಂಜಿನಿಯರಿಂಗ್ ವೃತ್ತಿಯನ್ನು ಆಯ್ದುಕೊಳ್ಳದಿದ್ದರೆ, ನಿಸ್ಸಂದೇಹವಾಗಿ ಚಲನಚಿತ್ರ ವಿಮರ್ಶೆ ಕ್ಷೇತ್ರಕ್ಕೆ ಪ್ರವೇಶಿಸುತ್ತಿದ್ದೆ ಎಂಬುದನ್ನು ಕೂಡ ಬಹಿರಂಗಪಡಿಸಿದ್ದರು.

ಇದನ್ನೂ ಓದಿ: ರಜನಿಕಾಂತ್ 'ಜೈಲರ್'​ ಆಡಿಯೋ ಲಾಂಚ್: ತಲೈವನ ಗ್ರ್ಯಾಂಡ್ ಈವೆಂಟ್​ಗೆ ನೀವೂ ಹೋಗಬೇಕೇ? ಡೀಟೆಲ್ಸ್ ಇಲ್ಲಿದೆ