ಅಪಾರ ಸಂಖ್ಯೆ ವೀಕ್ಷಕರನ್ನು ಸಂಪಾದಿಸಿರುವ ಕನ್ನಡ ಕಿರುತೆರೆಯ ಜನಪ್ರಿಯ ಶೋ 'ವೀಕೆಂಡ್ ವಿತ್ ರಮೇಶ್'. ಸೀಸನ್ 5 ರಲ್ಲಿ ಈಗಾಗಲೇ 7 ಸಾಧಕರು ಬಂದಿದ್ದು, 8ನೆಯ ಅತಿಥಿಯಾಗಿ ನಟ, ನಿರ್ಮಾಪಕ, ಆಹಾರ ಪ್ರೇಮಿ ಸಿಹಿ ಕಹಿ ಚಂದ್ರು ಆಗಮಿಸಿದ್ದಾರೆ. ಸಾಧಕರ ಸೀಟ್ನಲ್ಲಿ ಕುಳಿತು ಬಾಲ್ಯ, ಶಿಕ್ಷಣ, ಉದ್ಯೋಗ, ಸಿನಿಮಾ, ಅಡುಗೆ ಕಾರ್ಯಕ್ರಮ, ಕುಟುಂಬ, ಸ್ನೇಹಿತರು ಹೀಗೆ ಹಲವು ವಿಚಾರಗಳ ಬಗ್ಗೆ ಹಂಚಿಕೊಂಡಿದ್ದಾರೆ. ರಂಗಭೂಮಿ, ಕಿರುತೆರೆ, ಹಿರಿತೆರೆಯಲ್ಲಿ ವಿಶೇಷ ಸಾಧನೆಗೈದ ಸಿಹಿ ಕಹಿ ಚಂದ್ರು ತಮ್ಮ ಜೀವನದ ಕಥೆಯನ್ನು ತೆರೆದಿಟ್ಟಿದ್ದಾರೆ.
ಕಾಲೇಜು ದಿನಗಳಲ್ಲಿ ನಾಟಕಗಳಲ್ಲಿ ಅಭಿನಯ: ಸಿಹಿ ಕಹಿ ಚಂದ್ರು ಅವರು ಕಾಲೇಜು ದಿನಗಳಿಂದ ನಾಟಕಗಳಲ್ಲಿ ಅಭಿನಯಿಸುತ್ತಿದ್ದರು. ಹೀಗಾಗಿ ಅವರು ನಟನೆಯಲ್ಲಿ ಹೆಚ್ಚು ಆಸಕ್ತಿಯನ್ನು ಗಿಟ್ಟಿಸಿಕೊಂಡರು. ಬಾಲ್ಯದಿಂದಲೇ ಅವರಿಗೆ ಒಂದಿಪ್ಪತ್ತು ಮಂದಿಯ ಮುಂದೆ ಮೈಮ್ ಮಾಡಲು ಆಸಕ್ತಿಯಿತ್ತಂತೆ. ಅವರು ಈ ಮೈಮ್ ಮಾಡಿದ್ದರು. ವೀಕೆಂಡ್ ವಿತ್ ರಮೇಶ್ ಶೋನಲ್ಲಿ ರಮೇಶ್ ಅವರು ಕೂಡ ಮೈಮ್ ಮಾಡಿ ತೋರಿಸಲು ಅವಕಾಶ ಮಾಡಿಕೊಟ್ಟರು. ಅವರ ಮೈಮ್ ಪ್ರೇಕ್ಷಕರನ್ನು ಹೊಟ್ಟೆ ಹುಣ್ಣಾಗಿಸುವಂತೆ ಮಾಡಿತು.
ನೂರು ರೂಪಾಯಿಯಲ್ಲಿ ಕರ್ನಾಟಕ ಸುತ್ತಿದ ಚಂದ್ರು: ಚಂದ್ರು ಅವರು ಒಬ್ಬರೇ ದ್ವಿತೀಯ ಪಿಯುಸಿಯಲ್ಲಿ ಇರಬೇಕಾದ್ರೆ ಕೇವಲ ನೂರು ರೂಪಾಯಿ ಇಟ್ಟುಕೊಂಡು ಇಡೀ ಕರ್ನಾಟಕವನ್ನು ಸುತ್ತಿದ್ದರಂತೆ. ಪಿಯುಸಿ ಮುಗಿದ ಮೇಲೆ ಟೆಕ್ಸ್ಟೈಲ್ ಇಂಜಿನಿಯರಿಂಗ್ ಮಾಡಬೇಕೆಂಬ ಆಸೆ ಅವರಿಗಿತ್ತು. ಆದರೆ ಅವರ ಅಪ್ಪ ಸೀಟ್ ಕೊಡಿಸಲಿಲ್ಲವಂತೆ. ಹೀಗಾಗಿ ಕೋಪದಲ್ಲಿ ಕೈಯಲ್ಲಿದ್ದ ನೂರು ರೂಪಾಯಿ ಇಟ್ಟುಕೊಂಡು ಇಡೀ ಕರ್ನಾಟಕ ಟೂರ್ ಮಾಡಿದ್ದರು. ಫ್ರೆಂಡ್ ಮನೆಗೆಲ್ಲಾ ಹೋಗಿ ಅಲ್ಲಿ ಊಟ ಮಾಡಿ ಅಲ್ಲೇ ಸುತ್ತಮುತ್ತ ಸುತ್ತಾಡಿಕೊಂಡು ವಾಪಸ್ ಮನೆಗೆ ಬಂದಿದ್ದರಂತೆ.
ಇದನ್ನೂ ಓದಿ: 50ಕ್ಕೂ ಹೆಚ್ಚು ಸೆಲೆಬ್ರಿಟಿಗಳಿಂದ ಬಿಡುಗಡೆಯಾಯ್ತು ಹುಲಿಯಾ ಸಿನಿಮಾ ಪೋಸ್ಟರ್
ಸಿಹಿ ಕಹಿ ಚಂದ್ರು ಅವರು ಹಾಸ್ಯನಟ ಮತ್ತು ಪೋಷಕ ನಟರಾಗಿ ಅನೇಕ ಕನ್ನಡ ಚಲನಚಿತ್ರಗಳಲ್ಲಿ ನಟಿಸಿದ್ದಾರೆ. ಬ್ಯಾಂಕ್ ಜನಾರ್ಧನ್ ಮತ್ತು ಉಮಾಶ್ರೀ ಅವರ ಹಾಸ್ಯ ದೃಶ್ಯಗಳಿಗೆ ಚಂದ್ರು ಹೆಚ್ಚು ಹೆಸರುವಾಸಿಯಾಗಿದ್ದಾರೆ. ಶಂಕರ್ ನಾಗ್ ಅವರ ಸಂಕೇತ್ ತಂಡದಲ್ಲೂ ಕೂಡ ಇವರು ಕೆಲಸ ಮಾಡಿದ್ದಾರೆ. ನಿರ್ದೇಶಕರಾಗಿ ಚಂದ್ರು ಕಿರುತೆರೆಯ ಸಿಲ್ಲಿ ಲಲ್ಲಿ ಮತ್ತು ಪಾಪ ಪಾಂಡು ಧಾರಾವಾಹಿಗಳನ್ನು ನಿರ್ದೇಶಿಸಿದ್ದಾರೆ. ಚಂದ್ರು ಅವರು 450ಕ್ಕೂ ಅಧಿಕ ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ಗೌರಿ ಗಣೇಶ, ಪುಟ್ಟಕ್ಕನ ಹೈವೇ ತೆನಾಲಿ ಅವರ ಜನಪ್ರಿಯ ಕೃತಿಗಳು.
ಎಲ್ಲಾ ಸಿನಿಮಾಗಳಲ್ಲೂ ಹಾಸ್ಯ ಕಲಾವಿದರಾಗಿ, ವಿಲನ್ ಆಗಿ ಪಾತ್ರ ನಿರ್ವಹಿಸಿದ್ದಾರೆ. 10 ಸಾವಿರಕ್ಕೂ ಹೆಚ್ಚು ಕಾಮಿಡಿ ಸೀರಿಯಲ್ಸ್ ಸಂಚಿಕೆಗಳನ್ನು ನಿರ್ದೇಶಿಸಿ, ನಿರ್ಮಾಣ ಕೂಡ ಮಾಡಿದ್ದಾರೆ. ಸಾವಿರಕ್ಕೂ ಹೆಚ್ಚು ಅಡುಗೆ ಸಂಚಿಕೆಗಳನ್ನು ಮಾಡಿದ್ದಾರೆ. 2017ರ ಬಿಗ್ ಬಾಸ್ ಕನ್ನಡ 5ರಲ್ಲಿ ಭಾಗವಹಿಸಿದ್ದರು. 2021ರಲ್ಲಿ ಅವರು ಬಾಣಸಿಗ ವೆಂಕಟೇಶ್ ಭಟ್ ಅವರೊಂದಿಗೆ ಕುಕ್ಕು ವಿತ್ ಜೊತೆ ಕಿರಿಕ್ಕು ಎಂಬ ಅಡುಗೆ ರಿಯಾಲಿಟಿ ಶೋ ತೀರ್ಪುಗಾರರಾಗಿದ್ದರು. ಈಗಾಗಲೇ ಹಲವು ಅಡುಗೆ ಕಾರ್ಯಕ್ರಮಗಳನ್ನು ಸಹ ನಡೆಸಿಕೊಟ್ಟಿದ್ದಾರೆ.
ಇದನ್ನೂ ಓದಿ: 110 ದಿನ ಮಗಳು ಆಸ್ಪತ್ರೆಯಲ್ಲಿದ್ದ ದಿನ ನೆನಪಿಸಿಕೊಂಡ ಪ್ರಿಯಾಂಕಾ ಚೋಪ್ರಾ
