ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ನಟನೆಯ ಬಹುನಿರೀಕ್ಷಿತ ಚಿತ್ರ ಬೈರಾಗಿ ತೆರೆಗೆ ಬರಲು ಸಿದ್ಧವಾಗಿದೆ. ಇದು ಶಿವರಾಜ್ ಕುಮಾರ್ ಅವರ 123ನೇ ಚಿತ್ರ. ಸಿನಿಮಾವನ್ನು ತಮಿಳಿನ ಖ್ಯಾತ ಛಾಯಾಗ್ರಾಹಕ, ನಿರ್ದೇಶಕ ವಿಜಯ್ ಮಿಲ್ಟನ್ ನಿರ್ದೇಶಿಸುತ್ತಿದ್ದಾರೆ.
ಶಿವಣ್ಣನ ಹುಲಿ ವೇಷದ ಗೆಟಪ್‌ ಅಭಿಮಾನಿಗಳನ್ನು ರಂಜಿಸಿದೆ. ಅಲ್ಲದೇ ಹೊಸ ಲುಕ್ ಇರುವ ಪೋಸ್ಟರ್ಗಳು ಆಟೋ ಹಾಗೂ ಕಾರುಗಳಲ್ಲಿ ರಾರಾಜಿಸುತ್ತಿದೆ. ಬೈರಾಗಿಯಲ್ಲಿ ಟಗರು ಸಿನಿಮಾ ಖ್ಯಾತಿಯ ಡಾಲಿ ಧನಂಜಯ್ ಹಾಗು ವಸಿಷ್ಠ ಸಿಂಹ ಮತ್ತೆ ಶಿವಣ್ಣನಿಗೆ ಜೊತೆಯಾಗಿದ್ದಾರೆ. ಟಗರು ಸಿನಿಮಾದ ಶಿವರಾಜ್ ಕುಮಾರ್, ಡಾಲಿ, ಚಿಟ್ಟೆ ಕಾಂಬಿನೇಷನ್ಗೆ ಭಯಂಕರ ಫ್ಯಾನ್ ಫಾಲೋಯಿಂಗ್ ಇದೆ. ಆದರೆ ಈ ಸಿನಿಮಾದಲ್ಲಿ ವಸಿಷ್ಠ ಸಿಂಹ ಬಣ್ಣ ಹಚ್ಚುತ್ತಿಲ್ಲ. ಅವರು ತೆರೆಯ ಹಿಂದೆ ಮಾತ್ರ ಇರಲಿದ್ದಾರೆ. ಸಿನಿಮಾ ಒಂದು ಹಾಡನ್ನು ವಸಿಷ್ಠ ಸಿಂಹ ಹಾಡಿದ್ದಾರೆ.
ಶಿವಣ್ಣನಿಗೆ ನಾಯಕಿಯಾಗಿ ಅಂಜಲಿ ಬಣ್ಣ ಹಚ್ಚಿದ್ದಾರೆ. ದಿಯಾ ಖ್ಯಾತಿಯ ಪೃಥ್ವಿ ಅಂಬರ್ ಪ್ರಮುಖ ಪಾತ್ರದಲ್ಲಿದ್ದಾರೆ. ಹಿರಿಯ ನಟ ಶಶಿಕುಮಾರ್ ಪೊಲೀಸ್ ಅಧಿಕಾರಿಯಾಗಿದ್ದಾರೆ. ಕೃಷ್ಣ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ಕೃಷ್ಣ ಸಾರ್ಥಕ್ ಅದ್ದೂರಿಯಾಗಿ ಸಿನಿಮಾವನ್ನು ನಿರ್ಮಿಸಿದ್ದಾರೆ.
ಚಿತ್ರದಲ್ಲಿ ಸಾಕಷ್ಟು ನುರಿತ ಕಲಾವಿದರು ಕಾರ್ಯ ನಿರ್ವಹಿಸಿದ್ದಾರೆ. ಜುಲೈ 1ಕ್ಕೆ ಬೈರಾಗಿ ರಾಜ್ಯಾದ್ಯಂತ ಬಿಡುಗಡೆ ಆಗಲಿದೆ. ಮತ್ತೆ ಶಿವರಾಜ್ ಕುಮಾರ್ ಹಾಗು ಧನಂಜಯ್ ಅವರ ಜೋಡಿ ಪ್ರೇಕ್ಷಕರನ್ನು ಮೋಡಿ ಮೋಡಲಿದೆಯೇ? ಕಾದುನೋಡಬೇಕು.
ಇದನ್ನೂ ಓದಿ: ಪ್ರಿಯಾಂಕ ಉಪೇಂದ್ರ ಅಭಿನಯದ ಹೊಸ ಚಿತ್ರ 'ಕರ್ತ ಕರ್ಮ ಕ್ರಿಯ' ಮುಹೂರ್ತ
