ಸಿನಿಮಾ ಜೊತೆಜೊತೆಗೆ ತಮ್ಮ ಹೇಳಿಕೆಗಳಿಂದಲೂ ಸದಾ ಸುದ್ದಿಯಲ್ಲಿರುವ ನಟಿ ಕಂಗನಾ ರಣಾವತ್. ತರಾಟೆ ತೆಗೆದುಕೊಳ್ಳಲು ನಿಂತ್ರೆ ಸ್ಟಾರ್ ನಟ, ನಟಿ ಎಂಬುದನ್ನೂ ನೋಡಲ್ಲ. ಬೋಲ್ಡ್ ಹೇಳಿಕೆಗಳಿಗೆ ಇವರು ಹೆಸರುವಾಸಿ. ಹೆಚ್ಚಾಗಿ ನಿರ್ದೇಶಕ, ನಿರ್ಮಾಪಕರು, ನಟ, ನಟಿಯ ಬಗ್ಗೆ ಕಾಮೆಂಟ್ ಮಾಡುವ 'ಚಂದ್ರಮುಖಿ' ಇದೀಗ ಎಸ್ಆರ್ಕೆ ಅವರನ್ನು ಬಾಯ್ತುಂಬ ಹೊಗಳಿದ್ದಾರೆ.
ಹೌದು, ಜನಪ್ರಿಯ ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ ಇನ್ಸ್ಟಾಗ್ರಾಮ್ನಲ್ಲಿ ಬಾಲಿವುಡ್ 'ಕ್ವೀನ್' ಕಂಗನಾ ರಣಾವತ್ ಅವರು ಬಾಲಿವುಡ್ ಕಿಂಗ್ ಖಾನ್ ಬಗ್ಗೆ ಮಾತನಾಡಿದ್ದಾರೆ. ಇನ್ಸ್ಟಾ ಸ್ಟೋರಿನಲ್ಲಿ ಹೃದಯಸ್ಪರ್ಶಿ ಬರಹದೊಂದಿಗೆ ನಟ ಶಾರುಖ್ ಬಗ್ಗೆ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಬಾಲಿವುಡ್ಗೆ ಕಿಂಗ್ ಖಾನ್ ಪುನರಾಗಮನವನ್ನು ಸುದೀರ್ಘ ಹೋರಾಟದ ನಂತರದ ಅದ್ಭುತ ಪ್ರಯಾಣ ಎಂದು ವರ್ಣಿಸಿದ್ದಾರೆ.
ಸೆಪ್ಟೆಂಬರ್ 7, ಅಂದರೆ ನಿನ್ನೆ ಬಹುನಿರೀಕ್ಷಿತ ಜವಾನ್ ಸಿನಿಮಾ ಬಿಡುಗಡೆ ಆಗಿದೆ. ಶಾರುಖ್ ಖಾನ್ ಸಿನಿಮಾವನ್ನು ಅಭಿಮಾನಿಗಳು ಅದ್ಧೂರಿಯಾಗಿ ಸ್ವಾಗತಿಸಿದ್ದಾರೆ. ನಿನ್ನೆ ದೇಶಾದ್ಯಂತ ಜವಾನ್ನದ್ದೇ ಸದ್ದು. ಚಿತ್ರಮಂದಿರಗಳ ಒಳಗೂ ಮತ್ತು ಹೊರಗೂ ಸಂಭ್ರಮವೋ ಸಂಭ್ರಮ. ಹಬ್ಬದ ವಾತಾವರಣ ನಿರ್ಮಾಣಗೊಂಡಿತ್ತು. ಜವಾನ್ ಸಂಭ್ರಮಾಚರಣೆ ಕುರಿತಾದ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ಇನ್ನೂ ಸದ್ದು ಮಾಡುತ್ತಿವೆ. ಮೊದಲ ದಿನವೇ ದೇಶೀಯ ಗಲ್ಲಾಪೆಟ್ಟಿಯಲ್ಲಿ 75 ಕೋಟಿ ರೂ. ಕಲೆಕ್ಷನ್ ಮಾಡುವ ಮೂಲಕ ಹಿಂದಿ ಚಿತ್ರರಂಗದಲ್ಲಿ ದಾಖಲೆ ಸೃಷ್ಟಿಸಿದೆ. ಇಷ್ಟೆಲ್ಲಾ ಸಂಭ್ರಮ, ಸಾಧನೆ ನೋಡಿದ ನಟಿ ಕಂಗನಾ ರಣಾವತ್ ಅವರಿಗೆ ಶಾರುಖ್ ಬಗ್ಗೆ ಗುಣಗಾನ ಮಾಡುವುದರಿಂದ ಹಿಂದೆ ಸರಿಯಲು ಸಾಧ್ಯವಾಗಲಿಲ್ಲ.
''90ರ ಕಾಲದಲ್ಲಿ ಲವರ್ ಬಾಯ್ ಆಗಿ, ಸೂಪರ್ ಸ್ಟಾರ್ ಆಗಲು ಸುದೀರ್ಘ ಹೋರಾಟ, ಅಭಿಮಾನಿಗಳೊಂದಿಗೆ ಮತ್ತೆ ಸಂಪರ್ಕ ಸಾಧಿಸಲು ಸರ್ವ ಪ್ರಯತ್ನ, ಅಂತಿಮವಾಗಿ ತಮ್ಮ 60ರ (ಆಸುಪಾಸು) ಹರೆಯದಲ್ಲಿ ಇಂಡಿಯನ್ ಮಾಸ್ ಸೂಪರ್ ಹೀರೋ ಆಗಿ ಹೊರಹೊಮ್ಮಿದ್ದಾರೆ. ನಿಜಜೀವನದಲ್ಲೂ ಸೂಪರ್ ಸ್ಟಾರ್. ನನಗೆ ನೆನಪಿದೆ, ನಟನ ಆಯ್ಕೆಗಳ ಕುರಿತು ಟೀಕೆ ಮಾಡಿದ್ದರು. ಆದ್ರೆ ಇವರ ಸುದೀರ್ಘ ಹೋರಾಟ ಅದೆಷ್ಟೋ ಕಲಾವಿದರಿಗೆ ಒಂದು ಮಾಸ್ಟರ್ ಕ್ಲಾಸ್. ಎಸ್ಆರ್ಕೆ ಸಿನಿಮಾ ಗಾಡ್. ಕಿಂಗ್ ಖಾನ್, ನಿಮ್ಮ ಪರಿಶ್ರಮ ಮತ್ತು ನಮ್ರತೆಗೆ ನನ್ನ ದೊಡ್ಡ ನಮಸ್ಕಾರಗಳು'' ಎಂದು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ: ಅಕ್ಷಯ್ ಕುಮಾರ್ ಬರ್ತ್ಡೇಯಂದು ಘೋಷಣೆಯಾಗುವುದೇ ವೆಲ್ಕಮ್ 3, ಹೇರಾ ಫೇರಿ 3?
ಕಂಗನಾ ರಣಾವತ್ ಅವರ ಮುಂದಿನ ಸಿನಿಮಾ ಚಂದ್ರಮುಖಿ 2. ದಕ್ಷಿಣ ಚಿತ್ರರಂಗದ ಖ್ಯಾತ ಚಲನಚಿತ್ರ ನಿರ್ಮಾಣ ಸಂಸ್ಥೆ ಲೈಕಾ ನಿರ್ಮಾಣದ ಈ ಚಿತ್ರವನ್ನು ಸ್ಟಾರ್ ಡೈರೆಕ್ಟರ್ ಪಿ ವಾಸು ನಿರ್ದೇಶಿಸಿದ್ದಾರೆ. ಇತ್ತೀಚೆಗಷ್ಟೇ ಚಿತ್ರದ ಟ್ರೇಲರ್ ಅನಾವರಣಗೊಂಡು ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸಿದೆ. ಇದೇ ಸೆಪ್ಟೆಂಬರ್ 19ರಂದು ಬಹುಭಾಷೆಗಳಲ್ಲಿ ಸಿನಿಮಾ ತೆರೆಕಾಣಲಿದೆ.
ಇದನ್ನೂ ಓದಿ: 'ಬಜಾರ್' ಹುಡುಗನ ಹುಟ್ದಬ್ಬ: ಧನ್ವೀರ್ ಗೌಡ ನಟನೆಯ ಹೊಸ ಸಿನಿಮಾ ಘೋಷಣೆ
