ಬಾಲಿವುಡ್ ಸೂಪರ್ಸ್ಟಾರ್ ಅಮೀರ್ ಖಾನ್ ಮಗಳು ಇರಾ ಖಾನ್ ತನ್ನ ದೀರ್ಘಕಾಲದ ಗೆಳೆಯ ಫಿಟ್ನೆಸ್ ಟ್ರೈನರ್ ನೂಪುರ್ ಶಿಖರೆ ಜೊತೆಗೆ ಜನವರಿ 3ರಂದು ಮುಂಬೈನಲ್ಲಿ ರಿಜಿಸ್ಟರ್ ಮದುವೆಯಾಗಿದ್ದರು. ಇದೀಗ ಉದಯಪುರದಲ್ಲಿ ಈ ಜೋಡಿ ಸಾಂಪ್ರದಾಯಿಕ ವಿವಾಹ ಬಂಧನಕ್ಕೆ ಒಳಗಾಗಿದೆ. ನಾಲ್ಕು ದಿನಗಳ ಈ ಸಾಂಪ್ರದಾಯಿಕ ಮದುವೆ ಸಮಾರಂಭ ಬುಧವಾರ ಸಂಜೆ ಅಂತಿಮಗೊಂಡಿದೆ.
ಈ ಸಮಾರಂಭದ ಚಿತ್ರಗಳು ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿವೆ. ಇದರಲ್ಲಿ ಒಂದು ಫೋಟೋ ಇದೀಗ ಎಲ್ಲರ ಮನ ಸೆಳೆಯುತ್ತಿದೆ. ಅದುವೇ ಅಮೀರ್ ಖಾನ್ ತಮ್ಮ ಮಗಳು ಇರಾ ಅವರ ತಲೆ ಮೇಲೆ ಹಾಕಿದ್ದ ಪರದೆ (ವೇಲ್) ಸರಿ ಮಾಡುತ್ತಿರುವ ಫೋಟೋ ಆಗಿದೆ.
ಈ ವೈಟ್ ವೆಡ್ಡಿಂಗ್ನ ಮೊದಲ ಫೋಟೋದಲ್ಲಿ ಇರಾ ಖಾನ್ ಮತ್ತು ನೂಪುರ್ ಇಬ್ಬರು ಕೈ ಹಿಡಿದು ಜೊತೆಯಾಗಿ ಸಾಗುತ್ತಿದ್ದು, ಅತಿಥಿಗಳು ಅವರ ಮೇಲೆ ಹೂವಿನ ಮಳೆಗರೆದಿದ್ದಾರೆ. ಫೋಟೋದಲ್ಲಿ ಇರಾ ಶ್ವೇತವರ್ಣದ ಗೌನ್ನಲ್ಲಿ ಕಂಗೊಳಿಸಿದ್ದು, ಕೈಯಲ್ಲಿ ಬಿಳಿ ಹೂವುಗಳನ್ನು ಹಿಡಿದಿದ್ದಾರೆ. ಬನ್ ರೀತಿಯ ಕೇಶ ವಿನ್ಯಾಸದ ಮೆರುಗನ್ನು ಹೂವಿನ ಅಲಂಕಾರ ಹೆಚ್ಚಿಸಿದೆ.
ಮತ್ತೊಂದು ಚಿತ್ರದಲ್ಲಿ ನೂಪುರ್ ಶಿಖರೆ ತಮ್ಮ ತಾಯಿ ಪ್ರೀತಂ ಶಿಖರೆ ಜೊತೆಗೆ ಸಾಗುತ್ತಿದ್ದು, ಈ ವೇಳೆ ಗಾಳಿಯಲ್ಲಿ ಅತಿಥಿಗಳತ್ತ ಮುತ್ತೊಂದನ್ನು ಹರಿಬಿಟ್ಟಿದ್ದಾರೆ. ಮತ್ತೊಂದು ಚಿತ್ರದಲ್ಲಿ ನಟ ಆಮೀರ್ ಖಾನ್ ಮತ್ತು ರೀನಾ ದತ್ ಜೊತೆಗೆ ಮಧುಮಗಳು ಹೆಜ್ಜೆ ಹಾಕಿದ್ದಾರೆ. ರೀನಾ ದತ್ ಬಿಳಿ ಲೇಸ್ ಸೀರೆಯಲ್ಲಿ ಕಂಡು ಬಂದರೆ, ಅಮೀರ್ ಖಾನ್ ಕಪ್ಪು ಟುಕ್ಸೆಡೊದಲ್ಲಿ ಕಂಗೊಳಿಸಿದ್ದಾರೆ.
ಮತ್ತೊಂದು ಚಿತ್ರದಲ್ಲಿ ಆಮೀರ್ ಖಾನ್ ಮಗಳು ತಲೆಗೆ ಹಾಕಿದ್ದ ವೇಲ್ ಅನ್ನು ಸರಿ ಪಡಿಸುತ್ತಿದ್ದು, ಈ ವೇಳೆ ರೀನಾ ಮಕ್ಕಳನ್ನು ಪ್ರೀತಿಯಿಂದ ನೋಡುತ್ತಿರುವುದನ್ನು ಕಾಣಬಹುದಾಗಿದೆ.
ಮಗದೊಂದು ಚಿತ್ರದಲ್ಲಿ ಇರಾ ಸೋದರ ಸಂಬಂಧಿ ಝೈನ್ ಮೇರಿ ಮದುವೆಯನ್ನು ನಡೆಸುತ್ತಿರುವುದು ಕಂಡು ಬಂದಿದೆ. ಇರಾ ಮತ್ತು ನೂಪೂರ್ ಗಂಡ - ಹೆಂಡತಿ ಆದ ಈ ಸಂಭ್ರಮದಲ್ಲಿ ಚುಂಬಿಸಿದ ಚಿತ್ರಗಳು ಕೂಡ ಕಂಡು ಬಂದಿವೆ. ಅಲ್ಲದೇ ಕಾರ್ಯಕ್ರಮದಲ್ಲಿ ಆಮೀರ್ ಖಾನ್ ನೃತ್ಯ ಮಾಡುತ್ತಿರುವ ಫೋಟೋ ಸಹ ಸಖತ್ತಾಗೇ ಗಮನ ಸೆಳೆಯುತ್ತಿದೆ. ಅಲ್ಲದೇ ಮಗಳನ್ನು ಅಪ್ಪಿ, ಪ್ರೀತಿ ತುಂಬಿದ ತೋಳುಗಳಲ್ಲಿ ಬಂಧಿಸಿರುವ ಫೋಟೋ ಅವರ ನಡುವಿನ ಬಂಧವನ್ನು ತಿಳಿಸುವಂತಿದೆ.
ಇದನ್ನೂ ಓದಿ: ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಅಮೀರ್ ಪುತ್ರಿ: ಇರಾ-ನೂಪುರ್ ಮದುವೆ ವಿಡಿಯೋ
