ಕಿಂಗ್ ಖಾನ್ ಶಾರುಖ್ ನಟನೆಯ ಜವಾನ್ ಸಿನಿಮಾ ಸಾಕಷ್ಟು ಪ್ರಶಂಸೆಗಳನ್ನು ಸ್ವೀಕರಿಸುತ್ತಿದೆ. ಅಭಿಮಾನಿಗಳು ಮಾತ್ರವಲ್ಲದೇ ಚಿತ್ರರಂಗದವರೂ ಸಹ ಸಿನಿಮಾಗೆ ತಮ್ಮ ವಿಮರ್ಶೆ ಕೊಡುತ್ತಿದ್ದಾರೆ. ಬಹುತೇಕ ಪಾಸಿಟಿವ್ ಪ್ರತಿಕ್ರಿಯೆ ಸ್ವೀಕರಿಸುತ್ತಿರುವ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ಧೂಳೆಬ್ಬಿಸುತ್ತಿದೆ.
ಕಾಂತೆ, ಕಾಬಿಲ್, ಶೂಟೌಟ್ ಅಟ್ ಲೋಖಂಡ್ವಾಲ, ಶೂಟೌಟ್ ಅಟ್ ವಡಲ ಮತ್ತು ಜಝ್ಬಾ ಚಿತ್ರಗಳಿಗೆ ಹೆಸರುವಾಸಿಯಾದ ನಿರ್ದೇಶಕ ಸಂಜಯ್ ಗುಪ್ತಾ ಅವರು ಬ್ಲಾಕ್ಬಸ್ಟರ್ ಜವಾನ್ ಸಿನಿಮಾ ವೀಕ್ಷಿಸಿದ್ದಾರೆ. ಬಳಿಕ ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ X (ಹಿಂದಿನ ಟ್ವಿಟರ್) ನಲ್ಲಿ ಸಿನಿಮಾ ಮತ್ತು ಶಾರುಖ್ ನಟನೆ ಕುರಿತು ಗುಣಗಾನ ಮಾಡಿದ್ದಾರೆ. ಖಾನ್ ಕೆಲಸವನ್ನು ಶ್ಲಾಘಿಸುವುದಲ್ಲದೇ, ಭೂಗತ ಜಗತ್ತಿನ ಬೆದರಿಕೆಗಳ ನಡುವೆಯೂ ಅಚಲ ದೃಢತೆ ಪ್ರದರ್ಶಿಸಿರುವ ಖಾನ್ ಸಿನಿಮಾ ಜೀವನದ ಬಹುಮುಖ್ಯ ಕ್ಷಣವನ್ನು ನೆನಪಿಸಿಕೊಂಡಿದ್ದಾರೆ.
ನಿರ್ದೇಶಕ ಸಂಜಯ್ ಗುಪ್ತಾ ಟ್ವೀಟ್: 1990ರ ದಶಕದಲ್ಲಿ ಸಿನಿಮಾ ವಲಯದ ಮೇಲೆ ಭೂಗತ ಜಗತ್ತಿನ ಪ್ರಭಾವ ಉತ್ತುಂಗದಲ್ಲಿದ್ದ ವೇಳೆ, ನಟ ಶಾರುಖ್ ಖಾನ್ ಬೆದರಿಕೆಯನ್ನು ಲೆಕ್ಕಕ್ಕೆ ತೆಗೆದುಕೊಳ್ಳದ ಏಕಾಂಗಿ ತಾರೆಯಾಗಿ ನಿಂತಿದ್ದರು. ಶೂಟ್ ಮಾಡಬೇಕೆಂದರೆ ಶೂಟ್ ಮಾಡಿ, ಆದರೆ ನಾನು ನಿಮಗಾಗಿ ಕೆಲಸ ಮಾಡುವುದಿಲ್ಲ, ನಾನು ಪಠಾಣ್ ಎಂದು ಹೇಳುವ ಮೂಲಕ ಶಾರುಖ್ ಖಾನ್ ಬೆದರಿಕೆಗಳನ್ನು ಬಹಳ ಧೈರ್ಯದಿಂದ ಎದುರಿಸಿದ ಘಟನೆಯನ್ನು ಟ್ವೀಟ್ನಲ್ಲಿ ಗುಪ್ತಾ ನೆನಪಿಸಿಕೊಂಡರು. ಗುಪ್ತಾ ಅವರು ತಮ್ಮ ಟ್ವೀಟ್ನಲ್ಲಿ ಶಾರುಖ್ ಖಾನ್ ಅವರ ತತ್ವ ಸಿದ್ಧಾಂತ, ಅವುಗಳ ಮೇಲಿನ ಅಚಲ ಬದ್ಧತೆಯನ್ನು ಎತ್ತಿ ತೋರಿಸಿದರು.
2014 ರಲ್ಲಿ ನಟ ಶಾರುಖ್ ಖಾನ್ ಅವರಿಗೆ ಭೂಗತ ಜಗತ್ತಿನಿಂದ ಜೀವ ಬೆದರಿಕೆಗಳು ಹೆಚ್ಚಾದ ಹಿನ್ನೆಲೆ, ಹೆಚ್ಚುವರಿ ಪೊಲೀಸ್ ಭದ್ರತೆಯನ್ನು ಒದಗಿಸಲಾಗಿತ್ತು. ನಿರ್ಮಾಪಕ ಅಲಿ ಮೊರಾನಿ ಅವರು ಎಸ್ಆರ್ಕೆಗೆ ಸಂಬಂಧಿಸಿದ ಬೆದರಿಕೆಗಳನ್ನು ಸ್ವೀಕರಿಸಿದ್ದರು. ಹಾಗಾಗಿ ಖಾನ್ಗೆ ಬಿಗಿ ಭದ್ರತೆ ವಹಿಸಲಾಗಿತ್ತು. ಈ ಸವಾಲುಗಳ ಹೊರತಾಗಿಯೂ ಯಾವುದೇ ರಾಜಿ ಮಾಡಿಕೊಳ್ಳದೇ ಹಿಂದಿ ಚಿತ್ರರಂಗದಲ್ಲಿ ಶಾರುಖ್ ಖಾನ್ ವೃತ್ತಿಜೀವನ ಮುಂದುವರಿಸಿದರು.
ಇದನ್ನೂ ಓದಿ: Jawan: ಬಾಕ್ಸ್ ಆಫೀಸ್ನಲ್ಲಿ 'ಜವಾನ್' ಅಬ್ಬರ: ಅಬ್ಬಬ್ಬಾ.. ಎರಡು ದಿನದಲ್ಲಿ ಇಷ್ಟೊಂದು ಕಲೆಕ್ಷನ್
ದಕ್ಷಿಣ ಚಿತ್ರರಂಗದ ನಿರ್ದೇಶಕ ಅಟ್ಲೀ ಕುಮಾರ್ ನಿರ್ದೇಶನದಲ್ಲಿ ಮೂಡಿ ಬಂದ ಜವಾನ್ ನಲ್ಲಿ ಎಸ್ಆರ್ಕೆ ಜೊತೆ ನಯನತಾರಾ, ವಿಜಯ್ ಸೇತುಪತಿ ಸೇರಿದಂತೆ ಪ್ರಮುಖ ನಟರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಬಾಕ್ಸ್ ಆಫೀಸ್ನಲ್ಲಿ ಅದ್ಭುತ ದಾಖಲೆ ಮಾಡಿದೆ. ಮೊದಲ ದಿನವೇ ಅತಿ ಹೆಚ್ಚು ಗಳಿಕೆ ಮಾಡಿದ ಸಿನಿಮಾವಾಗಿ ಹೊರಹೊಮ್ಮಿದೆ. ಭಾರತೀಯ ಬಾಕ್ಸ್ ಆಫೀಸ್ನಲ್ಲೇ 2 ದಿನಕ್ಕೆ 125 ಕೋಟಿ ರೂ. ಸಂಪಾದನೆ ಮಾಡಿದೆ.
ಇದನ್ನೂ ಓದಿ: ಜನ್ಮದಿನದ ಸಂಭ್ರಮದಲ್ಲಿ ಬಾಲಿವುಡ್ ಕಿಲಾಡಿ: ಅಭಿಮಾನಿಗಳ ಹೃದಯ ಗೆದ್ದ ಅಕ್ಷಯ್ ಕುಮಾರ್ ಸಿನಿಮಾಗಳಿವು!
