'ಚಕ್ ದೇ ಇಂಡಿಯಾ', 'ಹ್ಯಾಪಿ ನ್ಯೂ ಇಯರ್', 'ಮರ್ದಾನಿ' ಚಿತ್ರಗಳಿಗೆ ಹೆಸರುವಾಸಿಯಾಗಿರುವ ಬಾಲಿವುಡ್ ನಟ ರಿಯೊ ಕಪಾಡಿಯಾ ಇಂದು ನಿಧನರಾದರು. ಕ್ಯಾನ್ಸರ್ನೊಂದಿಗಿನ ಸುದೀರ್ಘ ಹೋರಾಟದ ನಂತರ ಗುರುವಾರ ಇಹಲೋಕ ತ್ಯಜಿಸಿದ್ದಾರೆ. ಅವರಿಗೆ 66 ವರ್ಷ ವಯಸ್ಸಾಗಿತ್ತು. ನಟನ ಅಂತ್ಯಕ್ರಿಯೆಯು ಶುಕ್ರವಾರ ಮುಂಬೈನ ಗೋರೆಗಾಂವ್ನಲ್ಲಿ ನಡೆಯಲಿದೆ. ರಿಯೊ ಕಪಾಡಿಯಾ ಕೊನೆಯದಾಗಿ 'ಮೇಡ್ ಇನ್ ಹೆವೆನ್ ಸೀಸನ್ 2' ವೆಬ್ ಸಿರೀಸ್ನಲ್ಲಿ ನಟಿ ಮೃಣಾಲ್ ಠಾಕೂರ್ ಅವರ ತಂದೆಯಾಗಿ ಕಾಣಿಸಿಕೊಂಡಿದ್ದರು.
ರಿಯೊ ಕಪಾಡಿಯಾ ನಿಧನದ ಸುದ್ದಿಯನ್ನು ಅವರ ಸ್ನೇಹಿತ ಫೈಸಲ್ ಮಲಿಕ್ ಖಚಿತಪಡಿಸಿದ್ದಾರೆ. ನಟ ಪತ್ನಿ ಮರಿಯಾ ಫರಾಹ್ ಮತ್ತು ಇಬ್ಬರು ಮಕ್ಕಳಾದ ಅಮನ್ ಮತ್ತು ವೀರ್ ಅವರನ್ನು ಅಗಲಿದ್ದಾರೆ. ರಿಯೊ ಕಪಾಡಿಯಾ ಅವರಿಗೆ ಕಳೆದ ವರ್ಷ ಕ್ಯಾನ್ಸರ್ ಇರುವುದು ಪತ್ತೆಯಾಯಿತು.
ರಿಯೊ ಕಪಾಡಿಯಾ ಬಗ್ಗೆ.. ರಿಯೊ ಕಪಾಡಿಯಾ ಅವರು ಖುದಾ ಹಾಫಿಜ್, ದಿ ಬಿಗ್ ಬುಲ್, ಏಜೆಂಟ್ ವಿನೋದ್ ಮತ್ತು ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಇತ್ತೀಚೆಗೆ ಅಮೆಜಾನ್ ಪ್ರೈಮ್ ವಿಡಿಯೋದಲ್ಲಿ ಬಿಡುಗಡೆಯಾದ ವೆಬ್ ಸಿರೀಸ್ 'ಮೇಡ್ ಇನ್ ಹೆವೆನ್ ಸೀಸನ್ 2'ನಲ್ಲಿಯೂ ನಟಿಸಿದ್ದರು. ಹಿಂದಿ ಸಿನಿಮಾಗಳ ಹೊರತಾಗಿ ಕಿರುತೆರೆಯಲ್ಲೂ ಮಿಂಚಿದ್ದಾರೆ. ಸಪ್ಮೆ ಸುಹಾನೆ ಲಡಕ್ಪಾನ್ ಕೆ ಮತ್ತು ಸಿದ್ಧಾರ್ಥ್ ತಿವಾರಿಯ ಮಹಾಭಾರತದಲ್ಲೂ ಬಣ್ಣ ಹಚ್ಚಿದ್ದರು. ಗಾಂಧಾರಿಯ ತಂದೆ, ಗಾಂಧಾರದ ರಾಜ ಸುಲಬನ ಪಾತ್ರವನ್ನು ನಿರ್ವಹಿಸಿದ್ದರು.
ಇದನ್ನೂ ಓದಿ: ಜೈಲರ್ ಚಿತ್ರದಲ್ಲಿ ಅಭಿನಯಿಸಿದ್ದ ಖ್ಯಾತ ತಮಿಳು ನಟ, ನಿರ್ದೇಶಕ ಜಿ.ಮಾರಿಮುತ್ತು ಹೃದಯಾಘಾತದಿಂದ ನಿಧನ
ರಿಯೊ ಕಪಾಡಿಯಾ ಕೇವಲ ಒಬ್ಬ ನಟ ಮಾತ್ರವಲ್ಲ, ಚಿತ್ರ ಕಲಾವಿದ ಕೂಡ ಆಗಿದ್ದರು. ಅವರು ತಮ್ಮ ಕೆಲಸದ ಸ್ನೀಕ್ ಪೀಕ್ಗಳನ್ನು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡುತ್ತಿದ್ದರು. ದಿವಂಗತ ನಟ ದಿಲೀಪ್ ಕುಮಾರ್, ಅಮುತಾಭ್ ಬಚ್ಚನ್, ಜಯಾ ಬಚ್ಚನ್, ರಿಷಿ ಕಪೂರ್, ಶ್ರೀದೇವಿ, ಐಶ್ವರ್ಯಾ ರೈ ಮತ್ತು ಮಾಧುರಿ ದೀಕ್ಷಿತ್ ಸೇರಿದಂತೆ ಅನೇಕ ಸೆಲೆಬ್ರಿಟಿಗಳ ಫೋಟೋಗಳನ್ನು ಚಿತ್ರಿಸಿದ್ದಾರೆ. ಎಲ್ಲವೂ ಪರ್ಪೆಕ್ಟ್ ಆಗಿದೆ. ಇವರ ಕೊನೆಯ ಪೋಸ್ಟ್ ಜೂನ್ 5ರಂದು ಇದೆ. ಯುರೋಪ್ಗೆ ಪ್ರವಾಸಕ್ಕೆ ತೆರಳಿದ್ದ ಫೋಟೋಗಳನ್ನು ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದರು.
ಅಭಿಮಾನಿಗಳಿಂದ ಸಂತಾಪ: ರಿಯೊ ಕಪಾಡಿಯಾ ಅವರ ನಿಧನವು ಕುಟುಂಬಸ್ಥರಿಗೆ ಆಘಾತ ನೀಡಿದೆ. ಅವರ ಅಭಿಮಾನಿಗಳು ನಟನಿಗೆ ಸಂತಾಪ ಸೂಚಿಸಲು ಸೋಷಿಯಲ್ ಮೀಡಿಯಾವನ್ನು ವೇದಿಕೆಯಾಗಿ ಬಳಸಿಕೊಂಡಿದ್ದಾರೆ. ಅನೇಕ ಸೆಲೆಬ್ರಿಟಿಗಳು ಕೂಡ ಶ್ರದ್ಧಾಂಜಲಿ ಸಲ್ಲಿಸುತ್ತಿದ್ದಾರೆ. ಒಬ್ಬ ಅದ್ಭುತ ನಟನನ್ನು ಕಳೆದುಕೊಂಡಿರುವುದು ಹಿಂದಿ ಚಿತ್ರರಂಗಕ್ಕೆ ತುಂಬಲಾರದ ನಷ್ಟ.
ಇದನ್ನೂ ಓದಿ: 'ಬೀರ್ಬಲ್' ಖ್ಯಾತಿಯ ಹಿರಿಯ ಹಾಸ್ಯನಟ ಸತೀಂದರ್ ಕುಮಾರ್ ಖೋಸ್ಲಾ ನಿಧನ
