ಮೀನಾ ಲಾಂಗ್ಜಮ್ ಅವರ ಮಣಿಪುರಿ ಚಿತ್ರ 'ಆ್ಯಂಡ್ರೋ ಡ್ರೀಮ್ಸ್' ಮುಂಬೈನಲ್ಲಿ ನಡೆದ ಚಲನಚಿತ್ರೋತ್ಸವದಲ್ಲಿ ಅತ್ಯುತ್ತಮ ಸಾಕ್ಷ್ಯಚಿತ್ರ ವಿಭಾಗದಲ್ಲಿ ಪ್ರಶಸ್ತಿ ಗೆದ್ದಿದೆ. ಈ ಸಾಕ್ಷ್ಯಚಿತ್ರವು, ಮಣಿಪುರದ ಪೂರ್ವ ಇಂಫಾಲ್ ಜಿಲ್ಲೆಯ ಆ್ಯಂಡ್ರೋ ಎಂಬ ಹಳ್ಳಿ ಹುಡುಗಿಯರ ಫುಟ್ಬಾಲ್ ಕ್ಲಬ್‌ನ ಕಥೆಯನ್ನು ಒಳಗೊಂಡಿದೆ.
ಮಾಸ್ ಕಮ್ಯುನಿಕೇಶನ್ನಲ್ಲಿ ಡಾಕ್ಟರೇಟ್ ಸ್ವೀಕರಿಸಿರುವ ಮೀನಾ ಲಾಂಗ್ಜಮ್ (Meena Longjam) ಅವರು ಭಾನುವಾರ ಮುಂಬೈನಲ್ಲಿ ನಡೆದ ಅದ್ಧೂರಿ ಸಮಾರಂಭದಲ್ಲಿ ಈ ಪ್ರತಿಷ್ಠಿತ ಪ್ರಶಸ್ತಿಯನ್ನು ಸ್ವೀಕರಿಸಿದರು. ಪ್ರಶಸ್ತಿಯನ್ನು ಮಣಿಪುರಿ ಸಿನಿಮಾದ ಮತ್ತೊಂದು ಹೈಲೈಟ್ ಎಂದು ಬಣ್ಣಿಸಿದ ಮಣಿಪುರ ಸ್ಟೇಟ್ ಫಿಲ್ಮ್ ಡೆವಲಪ್‌ಮೆಂಟ್ ಸೊಸೈಟಿ (MSFDS)ಯ ಕಾರ್ಯದರ್ಶಿ ಸುಂಜು ಬಚಸ್ಪತಿಮಾಯುಮ್ (Sunju Bachaspatimayum) ಅವರು 'ಆ್ಯಂಡ್ರೋ ಡ್ರೀಮ್ಸ್' ತಂಡವನ್ನು ಅಭಿನಂದಿಸಿದ್ದಾರೆ.
ಪ್ರಶಸ್ತಿ ಸ್ವೀಕರಿಸಿದ ನಿರ್ದೇಶಕಿ ಮೀನಾ ಲಾಂಗ್ಜಮ್ ಮಾತನಾಡಿ, 'ಆಂಡ್ರೋ ಡ್ರೀಮ್ಸ್' ಒಂದು ಹಳ್ಳಿಯಲ್ಲಿ ನಡೆಯುವ ಕಥೆ. ಮಣಿಪುರದ ಆ್ಯಂಡ್ರೋ ಎಂಬ ಹಳ್ಳಿಯಲ್ಲಿ ಆರ್ಥಿಕ ಸವಾಲುಗಳು, ಪಿತೃಪ್ರಧಾನ ವ್ಯವಸ್ಥೆ, ಸಂಪ್ರದಾಯವಾದದ ವಿರುದ್ಧ ಹೋರಾಡುವ ವೃದ್ಧೆ ಲಿಬಿ ಮತ್ತು ಹುಡುಗಿಯರ ಫುಟ್‌ ಬಾಲ್ ಕ್ಲಬ್‌ನ ಕಥೆಯನ್ನು ಈ ಪ್ರಾಜೆಕ್ಟ್ ಒಳಗೊಂಡಿದೆ. ಮಣಿಪುರ ಸಂಸ್ಕೃತಿ ವಿಶ್ವವಿದ್ಯಾನಿಲಯದ ಸಹಾಯಕ ಪ್ರಾಧ್ಯಾಪಕಿ ಹಾಗೂ ಸಾಂಸ್ಕೃತಿಕ ಅಧ್ಯಯನ ವಿಭಾಗದ ಮುಖ್ಯಸ್ಥೆ ಆಗಿರುವ ಮೀನಾ ಲಾಂಗ್ಜಮ್, ನವದೆಹಲಿಯ ವಿಜ್ಞಾನ ಭವನದಲ್ಲಿ ನಡೆಯಲಿರುವ 69ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಪ್ರದಾನ ಸಮಾರಂಭಕ್ಕೂ ಮುನ್ನ ಈ ಪ್ರತಿಷ್ಠಿತ ಪ್ರಶಸ್ತಿಯನ್ನು ಸ್ವೀಕರಿಸಿದ್ದಾರೆ. ಇವರಲ್ಲದೇ, ಇಬ್ಬರು ಹೆಸರಾಂತ ಮಣಿಪುರಿ ನಿರ್ದೇಶಕರಾದ ಮಾಯಾಂಗಲಂಬಮ್ ರೋಮಿ ಮೈತೆಯ್ ಮತ್ತು ಸೈಖೋಮ್ ರತನ್ ಅವರು ತಮ್ಮ 'ಇಖೋಗಿ ಯಾಮ್' ಮತ್ತು 'ಬಿಯಾಂಡ್ ಬ್ಲಾಸ್ಟ್' ಚಿತ್ರಗಳಿಗಾಗಿ ಪ್ರಶಸ್ತಿಗಳನ್ನು ಸ್ವೀಕರಿಸಲಿದ್ದಾರೆ.
ಇದನ್ನೂ ಓದಿ: ಮುಂಜಾನೆ 4 ಗಂಟೆಗೆ ಪ್ರದರ್ಶನಕ್ಕೆ ಅವಕಾಶ ನೀಡುವಂತೆ ಕೋರಿ ಕೋರ್ಟ್ ಮೊರೆ ಹೋದ 'ಲಿಯೋ' ನಿರ್ಮಾಪಕರು
ಚಲನಚಿತ್ರ ನಿರ್ಮಾಪಕಿಯಾಗಿ, ನಿರ್ದೇಶಕಿಯಾಗಿ ಮೀನಾ ಲಾಂಗ್ಜಮ್ ಅವರು ತಮ್ಮ ವೃತ್ತಿ ಜೀವನದಲ್ಲಿ ಅನೇಕ ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿದ್ದಾರೆ. ಇಂಫಾಲದ ಮೊದಲ ಮಹಿಳಾ ಆಟೋ ಡ್ರೈವರ್‌ನ ಹೋರಾಟದ ಕಥೆಯನ್ನೊಳಗೊಂಡಿರುವ 'ಆಟೋ ಡ್ರೈವರ್' ಸಾಕ್ಷ್ಯಚಿತ್ರಕ್ಕಾಗಿ 2015ರಲ್ಲಿ ಪ್ರಶಸ್ತಿ (ಉತ್ತಮ ಸಾಕ್ಷ್ಯಚಿತ್ರ) ಗೆದ್ದುಕೊಂಡಿದ್ದರು. ಇದು ಇವರು ಗೆದ್ದುಕೊಂಡಿರುವ ಅವಾರ್ಡ್ನಲ್ಲಿ ಅತ್ಯಂತ ಪ್ರಮುಖ ಪ್ರಶಸ್ತಿಯಾಗಿದೆ. ಇವರ ಬಹುತೇಕ ಚಿತ್ರಗಳು ಮಹಿಳಾ ಸಬಲೀಕರಣದ ಮೇಲೆ ಕೇಂದ್ರೀಕರಿಸಿವೆ. ಮೀನಾ ಅವರ ಎರಡನೇ ಸಾಕ್ಷ್ಯಚಿತ್ರ 'ಅಚೌಬಿ ಇನ್ ಲವ್', 30ಕ್ಕೂ ಹೆಚ್ಚು ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿ ಭಾಗವಹಿಸಿದೆ.
ಇದನ್ನೂ ಓದಿ: ನಟಿ ಜಯಪ್ರದಾ ಕೇಸ್: ಕಾರ್ಮಿಕರಿಗೆ ಇಎಸ್‌ಐ ಪಾವತಿಸಿದರೆ ಜೈಲುಶಿಕ್ಷೆ ರದ್ದು- ಮದ್ರಾಸ್ ಹೈಕೋರ್ಟ್
'ಆ್ಯಂಡ್ರೋ ಡ್ರೀಮ್ಸ್' ಇಬ್ಬರು ವೀರ ಮಹಿಳೆಯರ ಹೋರಾಟದ ಕಥೆ. ಅವರಲ್ಲಿ ಓರ್ವರು - 60ರ ಹರೆಯದ ಲಿಬಿ ಎಂಬ ವೃದ್ಧೆ ಫುಟ್ಬಾಲ್ ಕ್ಲಬ್ ನಡೆಸುತ್ತಿರುತ್ತಾರೆ. ಇನ್ನೋರ್ವರು, ಭರವಸೆಯ ಯುವ ಫುಟ್ಬಾಲ್ ಆಟಗಾರ್ತಿ ನಿರ್ಮಲಾ ಪಾತ್ರ ನಿರ್ವಹಿಸಿದ್ದಾರೆ. ಸಾಕ್ಷ್ಯಚಿತ್ರ ಅನೇಕ ದೇಶೀಯ ಹಾಗೂ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿ ಪ್ರದರ್ಶನಗೊಂಡಿದೆ.
