ಉದ್ಯಮಿ ಆನಂದ್ ಅಹುಜಾ ಜೊತೆ 2018ರಲ್ಲಿ ಸಪ್ತಪದಿ ತುಳಿದಿದ್ದ ಬಾಲಿವುಡ್ ಬೆಡಗಿ, ಅನಿಲ್ ಕಪೂರ್ ಮಗಳು ನಟಿ ಸೋನಂ ಕಪೂರ್ ಈಗ ಮುದ್ದಾದ ಗಂಡು ಮಗುವಿನ ತಾಯಿ. 20.08.2022 ರಂದು ಪೋಷಕರಾದ ಈ ದಂಪತಿ ಇದೀಗ ಈ ಬಗ್ಗೆ ವಿಶೇಷ ಕಲಾಕೃತಿಯ ಫೋಟೋ ಹಂಚಿಕೊಂಡು ಘೋಷಿಸಿದ್ದಾರೆ. ಈ ಕಲಾಕೃತಿಯಲ್ಲಿ ಹದ್ದು ಮತ್ತು ಜಿಂಕೆ ಇದೆ. ಆಕಾಶವನ್ನು ತಂದೆ, ಭೂಮಿಯನ್ನು ತಾಯಿಗೆ ಹೋಲಿಸುವ ಕಲಾಕೃತಿ ಇದಾಗಿದೆ.
ಕಲಾಕೃತಿ ಹಂಚಿಕೊಂಡಿರುವ ಸೋನಂ ಕಪೂರ್, ನಮ್ಮ ಮಗುವಿನ ಜನನವನ್ನು ಘೋಷಿಸಲು ವಿಶೇಷ ಕಲಾಕೃತಿಯನ್ನು ರಚಿಸಬೇಕೆಂದು ಬಯಸಿದ್ದೆವು. ಈ ಚಿತ್ರದಲ್ಲಿ ಕ್ರಮವಾಗಿ ಹದ್ದು ಮತ್ತು ಜಿಂಕೆ ಇದೆ. ಹದ್ದುಗಳು ಅಥವಾ ಗಿಡುಗಗಳು ಪಿತೃತ್ವಕ್ಕೆ ಸಂಬಂಧಿಸಿದೆ. ಜಿಂಕೆ ಮಾತೃತ್ವವನ್ನು ಪ್ರತಿನಿಧಿಸುತ್ತದೆ. ಅವು ಶಾಂತವಾಗಿರುತ್ತವೆ, ಗಮನ ಹರಿಸುತ್ತವೆ ಮತ್ತು ಜಾಗರೂಕ ಜೀವಿಗಳು. ಅವು ಯಾವಾಗಲೂ ಕಾವಲುಗಾರರಂತೆ ಕೆಲಸ ಮಾಡುತ್ತವೆ. ಅತ್ಯಂತ ಸವಾಲಿನ ಪರಿಸ್ಥಿತಿಗಳಲ್ಲಿ ಸಹ ಹೋರಾಡಿ ಜಯ ಸಾಧಿಸುತ್ತವೆ. ಅದರಂತೆ ನಾವು ನಮ್ಮ ಮಗುವಿನ ರಕ್ಷಕರಾಗಿರುತ್ತೇವೆ ಎಂದು ತಿಳಿಸಿದ್ದಾರೆ.
