ಇಂದೋರ್ ಪ್ರಕರಣದ ಬಳಿಕ ಖ್ಯಾತ ಚಿತ್ರ ನಿರ್ಮಾಪಕಿ ಏಕ್ತಾ ಕಪೂರ್ ಮತ್ತು ಅವರ ತಾಯಿ ಶೋಭಾ ಕಪೂರ್ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಬಿಹಾರದ ಬೇಗುಸರಾಯ್ ನ್ಯಾಯಾಲಯದಿಂದ ಇಬ್ಬರ ವಿರುದ್ಧ ಅರೆಸ್ಟ್ ವಾರೆಂಟ್ ಜಾರಿಯಾಗಿದೆ. ಪ್ರಕರಣವು ಒಂದು ವರ್ಷ ಹಳೆಯದಾಗಿದ್ದು, ಇದು ಏಕ್ತಾ ಕಪೂರ್ ಅವರ ವೆಬ್ ಸರಣಿ 'XXX' ಸೀಸನ್ 2 ಗೆ ಸಂಬಂಧಿಸಿದೆ. ಈ ವೆಬ್ ಸಿರೀಸ್ನಲ್ಲಿ ಭಾರತೀಯ ಸೈನಿಕರ ಬಟ್ಟೆ ಹರಿಯುವ ಮತ್ತು ಧರ್ಮ ನಿಂದನೆಯಂತಹ ದೃಶ್ಯಗಳು ಕಂಡು ಬಂದಿವೆ ಎಂದು ಆರೋಪಿಸಲಾಗಿದೆ. ಇದರಿಂದಾಗಿ ಕಳೆದ ವರ್ಷ ಬಿಹಾರದ ಬೇಗುಸರಾಯ್ ನ್ಯಾಯಾಲಯದಲ್ಲಿ ಈ ಇಬ್ಬರೂ ನಿರ್ಮಾಪಕರ ವಿರುದ್ಧ ಪ್ರಕರಣ ದಾಖಲಾಗಿತ್ತು.
ಈ ವೆಬ್ ಸಿರೀಸ್ನಲ್ಲಿ ಕೆಲವು ಆಕ್ಷೇಪಾರ್ಹ ದೃಶ್ಯಗಳನ್ನು ತೋರಿಸಲಾಗಿದ್ದು, ಸೈನಿಕರ ಭಾವನೆಗೆ ಧಕ್ಕೆ ತಂದಿದೆ ಎಂದು ಆರೋಪಿಸಲಾಗಿದೆ. 'ಟ್ರಿಪಲ್ ಎಕ್ಸ್ ಸೀಸನ್ 2' ವೆಬ್ ಸರಣಿಯ ಸಂಚಿಕೆಯಲ್ಲಿ ಸೈನಿಕನು ಗಡಿಯಲ್ಲಿ ತನ್ನ ಕರ್ತವ್ಯವನ್ನು ನಿರ್ವಹಿಸುತ್ತಿರುವಾಗ, ಅವನ ಹೆಂಡತಿ ಇತರ ಪುರುಷರೊಂದಿಗೆ ಅಕ್ರಮ ಸಂಬಂಧವನ್ನು ಹೊಂದುತ್ತಾಳೆ ಎಂದು ತೋರಿಸಲಾಗಿದೆ. ಇಷ್ಟೇ ಅಲ್ಲ, ಈ ಪತ್ನಿಯರು ಮನೆಗೆ ಬೇರೆ ಗಂಡಸರನ್ನು ಕರೆಸಿ ತಮ್ಮ ಮಿಲಿಟರಿ ಗಂಡನ ಸಮವಸ್ತ್ರ ಧರಿಸಿ ಸಂಸಾರ ನಡೆಸುತ್ತಾರೆ ಎಂದು ಚಿತ್ರೀಕರಿಸಲಾಗಿದೆ.
ಬಿಹಾರದ ಮಾಜಿ ಸೈನಿಕರ ಸಂಘದ ಜಿಲ್ಲಾಧ್ಯಕ್ಷ ಶಂಭುಕುಮಾರ್ ಅವರು ವರ್ಷದ ಹಿಂದೆ ಪ್ರಕರಣ ದಾಖಲಿಸಿದ್ದರು. ಈ ಸರಣಿಯಲ್ಲಿ ತೋರಿಸಿರುವ ಈ ದೃಶ್ಯದಿಂದ ನನಗೆ ತುಂಬಾ ನೋವಾಗಿದೆ ಎಂದು ಶಂಭು ಕುಮಾರ್ ಹೇಳಿದ್ದಾರೆ. ಅಲ್ಲಿ ಭಾರತೀಯ ಸೈನಿಕರು ತಮ್ಮನ್ನು ತಾವು ಅಪಾಯಕ್ಕೆ ಸಿಲುಕಿಸಿಕೊಂಡು ದೇಶಕ್ಕೆ ಸೇವೆ ಸಲ್ಲಿಸುತ್ತಾರೆ. ಅಂತಹ ಪರಿಸ್ಥಿತಿಯಲ್ಲಿ, ಅವರ ಮತ್ತು ಅವರ ಕುಟುಂಬವನ್ನು ಸಂಪೂರ್ಣ ಗೌರವದಿಂದ ನೋಡಬೇಕು. ಆದರೆ ಏಕ್ತಾ ತನ್ನ ವೆಬ್ ಸಿರೀಸ್ನಲ್ಲಿ ಬೇರೆಯದನ್ನೇ ತೋರಿಸಿದ್ದಾರೆ ಎಂದು ದೂರಿದ್ದರು.
ಈಗ ಈ ಇಡೀ ವಿಷಯಕ್ಕೆ ಜನರ ಪ್ರತಿಕ್ರಿಯೆಗಳು ಮುನ್ನೆಲೆಗೆ ಬಂದಿವೆ. ಇದನ್ನು ನೋಡಿದ ನೆಟ್ಟಿಗರು ತಮ್ಮ ಆಕ್ರೋಶವನ್ನು ಹೊರ ಹಾಕುತ್ತಿದ್ದಾರೆ. ಏಕ್ತಾ ಕಪೂರ್ ಅವರ ಈ ವೆಬ್ ಸಿರೀಸ್ ಪೋರ್ನ್ ವಿಡಿಯೋಗಿಂತ ಕಡಿಮೆಯಿಲ್ಲ. ಇದು ಲೈಂಗಿಕ ಶೋಷಣೆಗೆ ಉತ್ತೇಜನ ನೀಡುತ್ತಿದ್ದು, ಇದೀಗ ದೇಶದ ರಕ್ಷಣೆಗೆ ನಿಂತಿರುವ ಸೈನಿಕರನ್ನೂ ಅವಮಾನಿಸುತ್ತಿದೆ ಎಂದು ನೆಟ್ಟಿಗರು ಏಕ್ತಾ ಕಪೂರ್ ವಿರುದ್ಧ ಹರಿಹಾಯ್ದಿದ್ದಾರೆ.
ಈ ಹಿಂದೆ ಟಿವಿ ನಿರ್ಮಾಪಕಿ ಏಕ್ತಾ ಕಪೂರ್ ಅವರ ವೆಬ್ ಸೀರೀಸ್ "XXX ಸೀಸನ್ 2"ನಲ್ಲಿ ಆಕ್ಷೇಪಾರ್ಹ ವಿಷಯವಿದೆ ಎಂದು ಆರೋಪಿಸಿರುವ ಇಂದೋರ್ ಪ್ರಕರಣದಲ್ಲಿ ಸುಪ್ರೀಂಕೋರ್ಟ್ ಏಕ್ತಾ ಕಪೂರ್ಗೆ ಬಂಧನದಿಂದ ಮಧ್ಯಂತರ ರಕ್ಷಣೆ ನೀಡಿತ್ತು. ಆಗಿನ ಮುಖ್ಯ ನ್ಯಾಯಮೂರ್ತಿ ಎಸ್‌ಎ ಬೊಬ್ಡೆ ನೇತೃತ್ವದ ನ್ಯಾಯಪೀಠವು ಕಪೂರ್ಗೆ ಮಧ್ಯಂತರ ರಕ್ಷಣೆ ನೀಡಿತ್ತು. ನವೆಂಬರ್‌ನಲ್ಲಿ ಮಧ್ಯಪ್ರದೇಶ ಹೈಕೋರ್ಟ್‌ನ ಇಂದೋರ್ ನ್ಯಾಯಪೀಠದಲ್ಲಿ, "XXX ಸೀಸನ್ 2" ವೆಬ್ ಸೀರೀಸ್ನಲ್ಲಿ ಆಕ್ಷೇಪಾರ್ಹ ವಿಷಯಕ್ಕಾಗಿ ತನ್ನ ವಿರುದ್ಧ ದಾಖಲಾದ ಪ್ರಕರಣವನ್ನು ರದ್ದುಗೊಳಿಸಬೇಕೆಂದು ಕೋರಿ ಏಕ್ತಾ ಕಪೂರ್ ಸಲ್ಲಿಸಿದ್ದ ಅರ್ಜಿಯನ್ನು ವಜಾಗೊಳಿಸಿದ ನಂತರ ಅವರು ಸುಪ್ರೀಂಕೋರ್ಟ್‌ಗೆ ತೆರಳಿದ್ದರು. ವೆಬ್ ಸೀರೀಸ್ನಲ್ಲಿ ಅಶ್ಲೀಲ ವಿಚಾರಗಳಿವೆ ಎಂದು ಆರೋಪ ಹೊರಿಸಿ ಕಪೂರ್ ವಿರುದ್ಧ ದಾಖಲಾದ ಪ್ರಕರಣವನ್ನು ರದ್ದುಗೊಳಿಸುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ಹೈಕೋರ್ಟ್ ವಜಾಗೊಳಿಸಿತ್ತು. 'XXX ಅನ್ಸೆನ್ಸರ್ಡ್ ಸೀಸನ್ 2' ಸೀರೀಸ್ ಅಶ್ಲೀಲವಾಗಿದ್ದು, ಧಾರ್ಮಿಕ ಭಾವನೆಗೆ ಧಕ್ಕೆಯುಂಟುಮಾಡಿದೆ. ಜೊತೆಗೆ ಸೈನ್ಯವನ್ನು ಅವಮಾನಿಸಿದೆ ಎಂದು ದೂರಿನಲ್ಲಿ ಆರೋಪಿಸಿಲಾಗಿದೆ.
ಓದಿ: ವೆಬ್ ಸೀರೀಸ್ ಪ್ರಕರಣದಲ್ಲಿ ಏಕ್ತಾ ಕಪೂರ್ಗೆ ಬಂಧನದಿಂದ ಮಧ್ಯಂತರ ರಕ್ಷಣೆ ನೀಡಿದ ಸುಪ್ರೀಂ
