ಛತರಪುರ್(ಮಧ್ಯಪ್ರದೇಶ): ಕಳ್ಳತನದ ಆರೋಪಕ್ಕೆ ಸಂಬಂಧಿಸಿದಂತೆ ಪೊಲೀಸರಿಗೆ ಬೇಕಾಗಿದ್ದ ವ್ಯಕ್ತಿಯನ್ನು ಸಾವನ್ನಪ್ಪಿದ 9 ತಿಂಗಳ ಬಳಿಕ ಪೊಲೀಸರು ಬಂಧಿಸಿರುವ ವಿಚಿತ್ರ ಪ್ರಕರಣ ಮಧ್ಯಪ್ರದೇಶದಲ್ಲಿ ಬೆಳಕಿಗೆ ಬಂದಿದೆ. ಅರೇ.. ಇದೇನಿದು ಸತ್ತೋಗಿದ್ದ ವ್ಯಕ್ತಿಯನ್ನು ಪೊಲೀಸರು ಬಂಧಿಸಿದ್ದು ಹೇಗೆ ಅಂತಾ ಅಚ್ಚರಿ ಆಯ್ತಾ?
ಹೌದು, ಇದು ಖಂಡಿತ ಅಚ್ಚರಿ ಆಗುವಂತಹ ಪ್ರಕರಣವೇ..! ವ್ಯಕ್ತಿಯೋರ್ವ 9 ತಿಂಗಳ ಹಿಂದೆ ಮೃತಪಟ್ಟಿದ್ದ. ಬಳಿಕ ಕುಟುಂಬಸ್ಥರು ಆತನೇ ತಮ್ಮ ಸಂಬಂಧಿ ಎಂದು ತಿಳಿದು ಅಪರಿಚಿತ ವ್ಯಕ್ತಿಯ ಮೃತದೇಹಕ್ಕೆ ಅಂತ್ಯಸಂಸ್ಕಾರ ಮಾಡಿ ಎಲ್ಲಾ ವಿಧಿ ವಿಧಾನಗಳನ್ನು ಸಹ ನೆರವೇರಿಸಿದ್ದರು. ಆದ್ರೆ ಡಿಎನ್ಎ ಪರೀಕ್ಷೆಯ ವರದಿ ಬಂದಾಗ ಮೃತನಿಗೂ ಆ ಕುಟುಂಬಕ್ಕು ಹೋಲಿಕೆ ಆಗಿಲ್ಲ ಅನ್ನುವ ಸತ್ಯ ಹೊರಬಿದ್ದಿದೆ.
6. 65 ಲಕ್ಷ ರೂ. ಕಳ್ಳತನ ಪ್ರಕರಣದಲ್ಲಿ ಬೇಕಾಗಿದ್ದ ಆರೋಪಿ.. ಪಿಕಪ್ ವಾಹನದ ಚಾಲಕನಾಗಿದ್ದ ಸುನೀಲ್ ನಾಮ್ದಿಯೊ ಅಂದು ರಾಜನಗರದಲ್ಲಿ ಕಬ್ಬಿಣದ ರಾಡ್ಗಳನ್ನು ವ್ಯಾಪಾರಿಯೊಬ್ಬರಿಗೆ ಸಾಗಿಸಿ 6. 65 ಲಕ್ಷ ರೂಪಾಯಿ ಹಣವನ್ನು ಪಡೆದ ಬಳಿಕ ನಾಪತ್ತೆಯಾಗಿದ್ದ. ಜುಲೈ 16, 2021 ರಂದು ವ್ಯಾಪಾರಿ ಸುಧೀರ್ ಅಗರ್ವಾಲ್ ಈ ಸಂಬಂಧ ಬಮಿತಾ ಠಾಣೆಯ ಪೊಲೀಸರಿಗೆ ದೂರು ನೀಡಿದ್ದರು. ನಂತರ ಗೊಡೌನ್ ಬಳಿ ಸುನೀಲನ ವಾಹನ ಪತ್ತೆಯಾಗಿತ್ತು.
ಕುಟುಂಬಸ್ಥರಿಂದ ಅಂತ್ಯಸಂಸ್ಕಾರ.. ಜುಲೈ 24, 2021 ರಂದು ಅಪರಿಚಿತ ವ್ಯಕ್ತಿಯ ಮೃತದೇಹವೊಂದು ಪತ್ತೆಯಾಗಿತ್ತು. ಇದು ಸುನೀಲ್ ಶವ ಎಂದು ಆತನ ಕುಟುಂಬಸ್ಥರು ಗುರುತಿಸಿ ಅಂತಿಮ ವಿಧಿ -ವಿಧಾನಗಳನ್ನು ಸಹ ನೆರವೇರಿಸಿದ್ದರು. ಈ ಕುರಿತು ಪೊಲೀಸರು ತನಿಖೆ ನಡೆಸಿದಾಗ ಮೃತ ವ್ಯಕ್ತಿಯೊಂದಿಗೆ ಆತನ ಕುಟುಂಬಸ್ಥರ ಡಿಎನ್ಎ ಹೊಂದಿಕೆ ಆಗದಿರುವುದನ್ನು ಸುನೀಲ್ ಕುಟುಂಬಸ್ಥರಿಗೆ ತಿಳಿಸಿದಾಗ ಅವರು ಸಹ ಬೆಚ್ಚಿಬಿದ್ದಿದ್ದಾರೆ ಎಂದು ಪೊಲೀಸ್ ಅಧಿಕಾರಿ ಮನಮೋಹನ್ ಸಿಂಗ್ ಬಾಘೇಲ್ ತಿಳಿಸಿದ್ದಾರೆ.
ವರ್ಷದ ಬಳಿಕ ವ್ಯಾಪಾರಿ ಕಣ್ಣಿಗೆ ಬಿದ್ದ ಸುನೀಲ್.. ಕಳೆದ ವರ್ಷ ಮೃತಪಟ್ಟಿದ್ದ ಎಂದು ನಂಬಲಾದ ಸುನೀಲ್ ಇತ್ತೀಚೆಗೆ ಮೇ 3ರಂದು ಗಧಾ ತಿಗದ್ದಾ ಪ್ರದೇಶದಲ್ಲಿರುವ ಬಾಘೇಶ್ವರ್ ಧಾಮ್ ದೇವಸ್ಥಾನದಲ್ಲಿ ವ್ಯಾಪಾರಿ ಅಗರ್ವಾಲ್ ಕಣ್ಣಿಗೆ ಬಿದ್ದಿದ್ದ. ಆಗ ತನ್ನ ಹಣವನ್ನು ಕೊಡುವಂತೆ ಸುನೀಲ್ಗೆ ಅಗರ್ವಾಲ್ ಕೇಳಿದ್ದರು. ಆದ್ರೆ ತಾನು ಈಗಾಗಲೇ ಪೊಲೀಸ್ ದಾಖಲೆ ಪ್ರಕಾರ ಸತ್ತುಹೋಗಿದ್ದು, ಯಾವುದೇ ರೀತಿಯ ಹಣವನ್ನು ಕೊಡಲು ಸಾಧ್ಯವಿಲ್ಲ ಎಂದು ಬೆದರಿಕೆ ಹಾಕಿದ್ದ.
ಮತ್ತೆ ಪೊಲೀಸರ ಮೊರೆ ಹೋದ ವ್ಯಾಪಾರಿ.. ಸುನೀಲ್ ಬದುಕಿದ್ದು, ಹಣ ಕೇಳಿದ್ರೆ ತನಗೆ ಬೆದರಿಕೆ ಹಾಕಿದ್ದಾನೆ ಎಂದು ಅಗರ್ವಾಲ್ ಅವರು ಪೊಲೀಸ್ ಠಾಣೆ ಮೆಟ್ಟಿಲೇರಿದರು. ತಕ್ಷಣ ದೂರು ದಾಖಲಿಸಿಕೊಂಡು, ತನಿಖಾ ತಂಡ ರಚಿಸಿ ಕಾರ್ಯಾಚರಣೆಗಿಳಿದ ಪೊಲೀಸರು ಸುನೀಲ್ನನ್ನು ಬಂಧಿಸಿದ್ದಾರೆ. ಆತನಿಂದ 5 ಲಕ್ಷ ರೂಪಾಯಿಯನ್ನು ಜಪ್ತಿ ಮಾಡಿರುವುದಾಗಿ ಪೊಲೀಸ್ ಅಧಿಕಾರಿ ಬಾಘೇಲ್ ಅವರು ಒಂದು ಸುಳ್ಳು ಸಾವಿನ ಕಥೆಯನ್ನು ಬಿಚ್ಚಿಟ್ಟಿದ್ದಾರೆ.
ಇದನ್ನೂ ಓದಿ- ಹಾಡಹಗಲೇ ಪುತ್ತೂರು ಬಸ್ ನಿಲ್ದಾಣದಲ್ಲಿ ಅಪ್ರಾಪ್ತೆಗೆ ಲೈಂಗಿಕ ಕಿರುಕುಳ.. ಆರೋಪಿ ಪೊಲೀಸ್ ವಶಕ್ಕೆ
