ತುಮಕೂರು: ಹೆಬ್ಬಾವೊಂದು ನರಿಯನ್ನು ಸುತ್ತಿಕೊಂಡು ಉಸಿರುಗಟ್ಟಿಸಿ ಕೊಂದು ಹಾಕಿರುವ ಘಟನೆ ಜಿಲ್ಲೆಯ ಗುಬ್ಬಿ ತಾಲೂಕಿನ ಹಂಡನಹಳ್ಳಿ ಗ್ರಾಮದಲ್ಲಿ ನಡೆದಿದೆ.
ಗ್ರಾಮದ ರಂಗಪ್ಪ ಎಂಬುವರ ತೋಟದಲ್ಲಿ ಹೆಬ್ಬಾವಿನ ಪಾಶಕ್ಕೆ ಸಿಲುಕಿದ್ದ ನರಿ ಪ್ರಾಣ ಉಳಿಸಿಕೊಳ್ಳಲು ಹರಸಾಹಸ ಪಟ್ಟಿದೆ. ಆದರೆ ನೋಡನೋಡುತ್ತಲೇ ನರಿ ಪ್ರಾಣ ಬಿಟ್ಟಿದೆ. ಇಷ್ಟಾದರೂ ನರಿಯ ದೇಹವನ್ನು ಸುತ್ತಿಕೊಂಡಿದ್ದ ಹೆಬ್ಬಾವು ಅಲ್ಲಿಂದ ಹೋಗಿರಲಿಲ್ಲ. ವಿಷಯ ತಿಳಿದು ಸುತ್ತಮುತ್ತಲ ಜನರು ತಂಡೋಪತಂಡವಾಗಿ ಬಂದು ವೀಕ್ಷಿಸಿದರು.
ನರಿಯನ್ನು ಸುತ್ತಿಕೊಂಡಿರುವ ಹೆಬ್ಬಾವು
ನರಿಯ ಪ್ರಾಣ ರಕ್ಷಿಸಲು ಸ್ಥಳೀಯರು ಹೆಬ್ಬಾವನ್ನು ಅದರ ದೇಹದಿಂದ ಬಿಡಿಸಿದರು. ಆದ್ರೆ ಅಷ್ಟೊತ್ತಿಗಾಗಲೇ ನರಿಯ ಪ್ರಾಣ ಕಳೆದುಕೊಂಡಿತ್ತು. ನಂತರ ಅರಣ್ಯ ಇಲಾಖೆ ಸಿಬ್ಬಂದಿ ಹಾಗೂ ಸ್ಥಳೀಯರು ಹೆಬ್ಬಾವನ್ನು ಸೆರೆ ಹಿಡಿದು ಸಮೀಪದ ಅರಣ್ಯಕ್ಕೆ ಬಿಟ್ಟಿದ್ದಾರೆ.
