ಬೆಳ್ತಂಗಡಿ : ತುಂಡಾಗಿ ಬಿದ್ದ ವಿದ್ಯುತ್ ತಂತಿ ಸ್ಕೂಟರ್ ಸವಾರನ ಕುತ್ತಿಗೆಗೆ ಸಿಲುಕಿ ಬಿದ್ದ ಪರಿಣಾಮ ವ್ಯಕ್ತಿ ಸ್ಥಳದಲ್ಲೇ ಸಾವನ್ನಪ್ಪಿದ ಘಟನೆ ದಿಡುಪೆ ರಸ್ತೆಯ ಹೇಡ್ಯ ಎಂಬಲ್ಲಿ ಗುರುವಾರ (ಜ. 6) ತಡರಾತ್ರಿ ನಡೆದಿದೆ.
ಕೊಯ್ಯೂರು ಮಲೆಬೆಟ್ಟು ನಿವಾಸಿ ರಘು ಮೃತರು. ಇವರು ಉಜಿರೆಯಲ್ಲಿ ಹೋಟೆಲ್ ಉದ್ಯಮ ನಡೆಸುತಿದ್ದು, ತನ್ನ ಹೋಟೆಲ್ನಲ್ಲಿ ಕೆಲಸ ಮಾಡುತಿದ್ದ ನೌಕರನನ್ನು ರಾತ್ರಿ ಅವರ ಮನೆಗೆ ಬಿಟ್ಟು ಹಿಂದಿರುಗುವ ವೇಳೆ ಅವಘಡ ಸಂಭವಿಸಿದೆ ಎನ್ನಲಾಗಿದೆ.
ಹೇಡ್ಯ ಜಂಕ್ಷನ್ ಬಳಿ ಪಿಕಪ್ ವಾಹನವೊಂದು ವಿದ್ಯುತ್ ಕಂಬಕ್ಕೆ ಡಿಕ್ಕಿ ಹೊಡೆದ ಪರಿಣಾಮ ಮುರಿದು ಬಿದ್ದು ತಂತಿ ರಸ್ತೆಯಲ್ಲಿತ್ತು. ತಕ್ಷಣ ಸ್ಥಳೀಯರು ತೆರವು ಕಾರ್ಯ ಮಾಡುತ್ತಿದ್ದು, ದೂರದಿಂದ ಸ್ಕೂಟರ್ ಬರುವುದನ್ನು ಗಮನಿಸಿದ ಕೆಲವರು ನಿಲ್ಲಿಸಲು ಸೂಚಿಸಿದ್ದಾರೆ.
ಆದರೆ, ಮಧ್ಯರಾತ್ರಿಯಾದ್ದರಿಂದ ಹೆದರಿ ಅವರು ಸ್ಕೂಟರ್ ನಿಲ್ಲಿಸದೇ ಮುಂದೆ ಚಲಿಸಿದಾಗ ತುಂಡಾಗಿ ಬಿದ್ದಿರುವ ವಿದ್ಯುತ್ ತಂತಿ ಇವರ ಕುತ್ತಿಗೆಗೆ ಸಿಲುಕಿ ರಸ್ತೆಗೆ ಎಸೆಯಲ್ಪಟ್ಟು, ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ ಎಂದು ತಿಳಿದು ಬಂದಿದೆ.
ಈ ಸಂಬಂಧ ಬೆಳ್ತಂಗಡಿ ಸಂಚಾರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ: ಲಾಭದ ಆಮಿಷವೊಡ್ಡಿ ಹುಬ್ಬಳ್ಳಿಯ ಉದ್ಯಮಿಗೆ 32 ಲಕ್ಷ ರೂ. ವಂಚನೆ
