ಕಲಬುರಗಿ: ಈಜುವಾಗ ತಲೆಗೆ ಬಲವಾದ ಪೆಟ್ಟು ಬಿದ್ದ ಪರಿಣಾಮ ನೀರಿನಿಂದ ಮೇಲೇಳಲಾಗದೆ ಯುವಕನೋರ್ವ ತನ್ನ ಸ್ನೇಹಿತರ ಕಣ್ಣಮುಂದೆಯೇ ಸಾವನ್ನಪ್ಪಿದ್ದಾನೆ.
ಯುವಕ ನೀರಿಗೆ ಜಿಗಿಯುವುದು, ಈಜಾಡುವುದು, ಕೊನೆಯಲ್ಲಿ ನೀರಿಂದ ಮೇಲೆ ಬಾರಲು ಆಗದೆ ಒದ್ದಾಡುತ್ತಾ ಸಾವನ್ನಪ್ಪಿರುವ ದೃಶ್ಯ ಮೊಬೈಲ್ ವಿಡಿಯೋದಲ್ಲಿ ಸೆರೆಯಾಗಿದೆ.
ನಗರದ ಹೊರವಲಯ ರುಕಮೋದ್ದಿನ್ ತೋಲಾ ದರ್ಗಾ ಹತ್ತಿರದ ಕಲ್ಲಿನ ಖಣಿಯಲ್ಲಿ ಈ ದುರ್ಘಟನೆ ಸಂಭವಿಸಿದೆ. ನವಾಜ್ ದರ್ಗಾ ಹತ್ತಿರದ ಮಿಜಗುರಿ ಬಡಾವಣೆ ನಿವಾಸಿ ಜಾಫರ್ ಅಯುಬ್ (22) ಮೃತ ದುರ್ದೈವಿ.
ಜಾಫರ್ ಸ್ನೇಹಿತರೊಂದಿಗೆ ಅಯುಬ್ ಕಲ್ಲಿನ ಕಣಿಯಲ್ಲಿ ಈಜಾಡಲು ಹೋಗಿದ್ದ. ಈಜುವಾಗ ತಲೆಗೆ ಗಂಭೀರವಾಗಿ ಪೆಟ್ಟು ಬಿದ್ದ ಪರಿಣಾಮ ನೀರಿನಿಂದ ಮೇಲೆ ಬಾರಲು ಆಗದೆ ಮೃತಪಟ್ಟಿದ್ದಾನೆ ಎಂದು ತಿಳಿದುಬಂದಿದೆ. ಅಗ್ನಿ ಶಾಮಕ ದಳದ ಸಿಬ್ಬಂದಿ ಮೃತ ಯುವಕನ ಶವ ಪತ್ತೆ ಹಚ್ಚಿ ಹೊರ ತೆಗೆದಿದ್ದಾರೆ. ಈ ಕುರಿತು ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.